SHOLAMON NGHAUI" CAUNG: 8
8
1Nao qe nga" maung ngad: qa: we"- nga" myhi" yang nug' jhaug' yaug ngad: qa: we"-
Airu: ngad: re- nao re ngo hau" mo" khyo mae qhug' re nao re ngo bobaug baug qere: khag' pe" maga: genae".
2Nao re nga" myhi" yham khyo jhui" lo" nae"- aimae nao: yang ngore jhid'de; ra" khyo mho" byid' li" nae".
Nao re ngo: yang sheim: nae ngham: cid' ke' to" ra" sabyi qang: byid: nae".
Nga" nho: khaung: shi: shiqang: byid: jhaug' nae".
3Ni" nho: lo,kaung: lo, wa nga" au: gyid' mae jo; ra".
Aimung: ni" nho: lo, yo lo; yang ngore po: ci: ra".
4Yerusalem mae" myiqe: qe we"- ngore dao:so: byid: gela,-
nga" shid' zo: jhid'de; ra" khyo re malhau: phyo' nae" ein: jham tang: ge,.
Khyaug' Lam: Ein: Lam: nghaui" caung:
Myiqe: qe
5Yao" jhid' zoqae: pho" we' lo, jho" xo' mung: din"pyad' yo mae" lo: ra" byu ceyaug wa khag' ngad: ra" i?
Zoqae: myhi"
Nao khau: li" ra" jo, qo bin: cug shi: gae qao: mae nao re ngo nhug' to" ke' va".
6Ni" jhid'de; myid re ngo mae" je yang: gayaug alhab' re pyid' lhaung" pye' wa,-
ni" tao: kheim" mae ngo mae" je yang: khag' rere: dage; vo,-
jhid'de; myid wa- shid: ru qhi" qam: bo: ra"- jhid' kao: ru wa shid: ru qhi" qam: thin: ra".
Aiwa myishae ru: baug: nga" li" mung: thin: ra" myi: so' we' nga" na: ru ngad: ra".
7Aire qid: yang maqo" se' pye' qid gyui gyui: ruyang re: maqo" nhai" pye' ngad: ra".
Dayaug yaug qe yao" jo,nho" yang jhid'de; myid re vai: yu nae" phin" re qam: shan: ru za: aqhug' nae".
Myiqe: Nau" Nho: Yao: Maung Jham
8Ngotao ho' mae nhae mo" dayaug qo"- yao" nug' cug am wa ngai: jo, shi" ra".
Yao: re zolau: dayaug: yang li" mhai" na: au: re ngonhae ho' yao" qhid' mae" pe" kad' byid: nae" i?
9Yao: wa vang ngad: re wa ngotao ho' wa yao" qhid' mae" ngaui gyebyu zaung zhaug' byid: nae".
Ngadqere: yao: wa kham: dung: qe ngad: re wa- ngotao ho' wa yao: re shaug' the" yang yao: re gug:gam byid: nae".
Zoqae: myhi"
10Ngo wa vang ngad:- aimung: nga" nug' cug am wa ai: nho: gyebyu zaung jham ngad:-
Nga" jhid' zoqae: pho" wa yao: mae ngo nhag' dag: ru we' yaug yo: ru qhug' yu: ru ba: ra".
Zoqae: pho"
11Sholamon wa Bala Hamon ga: mang: ra" jo, qo mae sabyi khyae dakhyae qo" ra".
Ai: jo, qo mae yao: mae" yo ngho" zaui" ra" yo mau" zaui: zo: mo, na: ako".
Yaug khao: ngo" wa ngaui thang: the: dataung taung byid' ako".
12Sholamon wa yao" thang: the: dataung lham: khae: yu: ra" aimung: mau" zaui: mo, wa yao: bam: gae bam khyo" shid' yo kye' qo" ako".
Ngo wa ngo- yao" sabyi khyae dakhyae qo" lhe"-
13Nga" jhid' we"- ai: khyae mae" ni" thoe re the' gyo: nhao la,-
nga" byin cao: qe wa ni" jhau thoe re gyo: nae" qhid' mae" lao" na: ako".
Zoqae: myhi"
14Nga" jhid' zoqae: pho" we"- ngojhao" li" ri:-
xeim: ngam" cid gae jham yaug: ra" bam dao mae" yo: we' dakhyo: re: xe' nau" we' dakhyo: re: doe, wa,.
Currently Selected:
SHOLAMON NGHAUI" CAUNG: 8: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009