RUTHA 2
2
Bua Nho: Yo Mae Rutha Mau" Zaui" Ra" Khyo
1Naomi wa yao" yham sang pho" Elimeleg we' ba nam sang: tin: ngad: ra" jo,nho" qo" ru we' vomyhi" vopho" ngad: ra" Bua ga: mang: ra" amyu" ba nam dayaug qo" ra". 2Daba re Rutha wa Naomi re gaug yad mo, tang" to: co' ko" ra" gaug gyo" jham yegaug: yu nae" yethaung: khyo ye: nhao la,
ngore gaug gyo" lham: gaug nhao nae" dayaug yaug na nae" ein: rure ngo ba: ga: tau" ra".
3Airumung: Rutha yothaung: khyo ye" lo" mung: mau" zaui: mo; nhaung thao" mae su: mung: yao: bam tang" to: co' ko" ra" gaug gyo" jham re gaug: zhang: yu: ra".
4Thao re Bua wa Betlehem mae" joe" li" ra" mau" zaui: mo re bang" se" yang: Asang wa naonhaung" we' daga" ngad vashao: wo"- ga: ta" ra".
Yao: bam wa Asang wa nao re shaman" byid: vashao: ga: tau" ako".
5Bua wa mau" pyo yaug re thoe: myiqe: wa khag' nau" ngad: ra" i? ga: myid' ra".
6Aiyaug wa Naomi we' daga" Moba mung" mae" tug' lo: ra" taungbug myiqe: nau" ngad: ra". 7Yao: wa mau" zaui: mo, thao cao" mung: gaug gyo" gaug: yu nhao la, ga: ngore mho' ra". Yao: wa ne, seim no' mae" mau" zaui" na mung: ba sham khug mae dazab no" yu nae" qhid' mae" ana" za: lhau" thang: na: ra" ga: ta" kyo" ra".
8Ailao" Bua wa Rutha re nao re pha,jhi" byid: li". Ce: yothaung: mae" lai yang: gatau khyo daye: gaug wa, cemae" myiqe: qe we' daga" mau" zaui: wa,. 9Yao: bam khai: yad: joe" lo" ko" rure qu" mung: yao: bam we' na wa, nao re manghin" genae" qhid' mae" nga" byu qere ngo amyin" byid' to: va". Nao qid shab' lao" re: yao: bam khae: to" ra" qid re yu shaug' wa,- ga: ta" ra".
10Rutha wa yao" myo, khung: myidgaung khyo tin: sho' goe; gyo" mung: Bua re, nao pe"mung: ngore ceqhi" shono: i? Nao pe"mung: taung bug byu re ceqhi" nhag' khyag' i? ga: ta" ra".
11Bua wa ni" yham sang pho" shid ra" yo, mae" ni" na re nao khoru: kad' ra" khyo cao jab alhab' re ngo the' gyo: va". Ni" pho"- ni" myhi" we' ni" mug: re nao to: co' mung: qhid' phyao: nao khonhae" re: maba mase" qu" ra" byumyu" phaung mae khoru: li" joe" na: ra" khyo re ngo ba: ra". 12Asang wa nao kad' lo: ra" lo,mau" qhid' mae" aphug' jhaung qhu" byid: vashao: wo". Nao li" joe" khug: na: ra" yaug Israel qenho: Asang Mao"So mae" aphug' jhaung qhu" byang" sho' qo" khae: yu vashao: wo"- ga: ta" ra".
13Rutha wa nhag' bo pho" we"- nao wa ngore gyai nhag' khyag' ra". Ngo wa ni" daui daui mo, mae" dayaug we' lhao" re: maman: yaug ngad sho' ngadqere: ngore nau" nhae" dao: jhau yang: nao wa ngore nhag' lam: gyai yaug yo nhao: ra"- ga: tau" ra".
14Zozo: yo, re Bua wa Rutha re lo ri: mug dakhai" lozo: ri:- aire ajhin qang: mae lojam zo: wa,- ga: ta" ra". Aimung: yao: wa mau" zaui: mo, we' daga" zaung: jo, mung: Bua wa yao: re gaug shin: dajhid' byid' ra". Yao: wa aire gyi: sho' zo: mung: zo:ve dajhid' zo" tang" to" ra". 15-16Yao: gaug gyo" yegaug nae" ye" lo" thao- Bua wa yao" mau" zaui: mo, re gaug dang: jo; ra" jo, qo mae" lhao" re: yao: re gaug gyo" gaug: yu nhao: ge, yao: re tam" ra" dao: dakheim: re: dajhau ge,. Ai: tho' mago" gaug dang: mae" gaug nhae daqhae: re she: thad' yu mung: aijham re yao: gaug: yu nae" qhid' mae" khyo" to: byid: co' ge,- ga: ta" ra".
17Airumung: Rutha wa myi" thao joe" sho' gaug gyo" gaug: yu: ra" aijham re be; shu: khyo" yu: re dabung alaug dau: rure myao: ra". 18Yao: wa ai: gaug re vogaung: khyo vin: lo" mung: yao: khonho" qo" gaug: zhang: yu: ra" khyo yao: na re loqhu" ra". Na" zao: zo" tang" ra" gaug shin: rere: yao: re lo" byid' ra". 19Naomi wa yao: re nao ana" ba ce gaug khai: mae" yegaug: zhang: yu: i? Khag' yo mae nao mau" yezaui" i? Nao re nyang" lham: kad' yaug re Mao"So shaman" byid: vashao:- ga: ta" ra".
Airumung: Rutha wa Bua ga: mang: ra" yaug: yo mae yao: mau" yezaui" ra" khyo Naomi re ta" kyo" ra".
20Naomi wa Asang wa Bua re shaman" byid: vashao:- Asang wa daui na mo, we' shid mo, re khonhae" re: yao" dao:so: zaung yaug ngad: ra"- ga: ta" ra". Amung: yao: wa xo' mung: aiyaug wa ngonhaung" nho: sa: jhao" ra" amyu" ba nam ngad mung: ngonhaung" re gun caung nae" qo qo" ra" byu dayaug ngad: ra"- ga: ta" ra".
21Ailao" Rutha wa je yang: yao: wa ngore yao: bam gaug bin: yad sho' yao" mau" zaui: mo, we' daga" gaug gyo" xo' gaug: yu wa,- ga: ta" ra"- ga: ta" kyo" ra".
22Naomi wa Rutha re ngad va" nga" dau mo" we"- Bua nho: yo mae mau" zaui" ra" myiqe: qe we' daga" nao mau" zaui" ru wa ni" qhid' mae" je: gai nae". Nao su gaje qe: yo khyo ye" re wa anghin" ashe' ru nao gai: qhug' nae"- ga: ta" ra". 23Airumung: Rutha wa yao: bam we' daga" mau" zaui: mung: bale we' jung: gaug alhab' re bin: yad: yu sho' gaug gyo" gaung: zhang: yu: ra". Yao: wa xo' yang: yao: na we' daga" na: jo; ra".
Currently Selected:
RUTHA 2: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009