LUKA 11
11
Akyu" Mho' Ru We' Sin: Yang: Mho" Ru
(Mathe 6.9-13; 7.7-11)
1Daba mae- Yesu wa jo, qo dalam: mae akyu" mho' na: ra". Yao: akyu" bin: mho' lao" yao" mho"zo: qemae" dayaug wa- Asang we"- Yohan wa yao" mho"zo: qere akyu" mho' nae" mho" byid' ru we' dakhyo:- ngonhaung" re akyu" mho' nae" mho" byid: la,- ga: Yesu re ta" ra".
2Yesu wa yao: bam re- Naonhaung" akyu" mho' gelao"- ceru: mho' ge,-
Pho" we"-
Ni" gyang" lho" ra" mang a re phug' myao: vageshao:-
Ni" mung"dan: joe" lo vashao:-
3Ngonhaung" qo ca" ra" zo:ve ba khao: ngo" ngonhaung" re byid: la,-
4Ngonhaung" re shad' ra" mo; qobo re ngonhaung" khyad' byid' ruyang ngonhaung" qobo jham re khyad' byid: la,-
Ngonhaung" re gyai qug' ra" ju" phyo' ru khyo dajhui" ye: la,- ein: mho' ge,- ga: ta" ra".
5Yesu wa yao" mho"zo: qere- Naonhaung" mae" dayaug yaug wa gae gaung: myi: re ba nam pho" yham khyo ye: mung:- Ba nam pho" we"- ngore mug sam khai" ko lhau" jhid' byid: la,. 6Nga" ba nam pho" dayaug gyaung: su" rumae" nga" yham khyo joe" vao lo: ra"- yao: re byid: zho: nae" pe" re: maqo"- ga: ta" re- 7Ba nam pho" wa- ngore dakhin jang la,- Kham: pyid' pye' va"- ngo we' nga" zoshao qere: yab qo vao va"- Airumung: ngo to" yang: nao re mug maqo" byid:- ga: yham khug mae" ta" li" nae". 8Naonhaung" re ngo ta" geli"- nao wa yao" ba nam pho" ngad: ruyang yao: wa to" li" mung: nao re ai: mug jham re mabyid: nae"- ngadqere: nao wa mathang mano: mho' na: ruyang yao: wa to" li" mung: nao qo: ra" mug jham re byid' li" nae". 9Naonhaung" re ngo ta" geli"- Mho' ge,- ailao" qo" yu: li" genae"- Qho ge,- ailao" naonhaung" qhug' myao genae"- Kham: ko' ge,- ailao" naonhaung" re kham: phung" byid' li" nae". 10Pe"mung:ga"re mho' ra" yaug khag' ngadqere: qo" yu: li" nae"- Qho: ra" yaug wa qhug' myao: li" nae"- Kham: ko' yaug re wa kham: phung" byid' li" nae". 11Naonhaung" yao: pho" qe khag' ngadqere: naonhaung" yao: zo: ngo: mho' re- lhao maui byid: nae" i? 12Qo, au" mho' re gung gug' byid: nae" i? 13Makhyang" ra" mo, naonhaung" lhao" re:- naonhaung" yao: zo: qere gai: ra" ja: byid: nae" ba: ako"- ai:tho' mae" je yang: mug:gaung dao mae" Pho" wa- yao: re mho' ra" mo, re Gyang" Lho" Byo byid' li" nae" mangad: i? ga: ta" ra".
Yesu We' Bezelbu
(Mathe 12.22-30; Marku 3.20-27)
14Yesu wa nhad' jid: ra" yui re khe' thug' pye' ra"- ai: yui phao: thug' lo" byaug lao"- nhad' jid: ra" yaug wa dao: jhau: li" ra". Mo, byu qe wa mug' hao" byaug: ako". 15Ngadqere: byu daqhae: wa yui zug: mo" Bezelbu yang yao: re qam: so' byid: mung: yui jham re khe' thug' pye' ru ngad: ra"- ga: ta" ako".
16Byu daqhae: wa Yesu re kung" nug gemung:- Mao"So: qam: so' qo" yaug ngad: rure qhu" byid: nae" mug' pho: ve, lho daja: kad' qhu" nae" qhid' mae" Yesu re mho' ako". 17Ngadqere: Yesu wa yao: bam: aung khug mae pe" myid: na ko" rure ba yang: yao: bam re- mung"dan: dalam: wa phung: jho" kho' yang: yao: cao: gye jho" se' na ko" ngad: re wa myao" sho' magang" tang: jo; li" nae"- ai we' dakhyo:- ug' khug' dinkhu: dalam: re: yao: cao: nhag' lam: majho" vang" re wa byo; qeim: lo" li" nae". 18Airu: mung: Satan" nho: mung"dan: wa phung: jho" kho' mung: yao: cao: gye jho" se' na ko" re wa khoru: qo" gang" tang: jo, nae" i? Naonhaung" wa ngore Belzebu qam: so' yang yui jham re khe' thug' ra"- ga: ta" ako". 19Ngo wa Bezelbu qam: so' yang yui jham re khe' thug' ngad: re wa naonhaung" mho"zo: qe wa khag' qam: so' yang yui jham re khe' thug' ko" ra" i? Naonhaung" yao" mho"zo: qe yao: naonhaung" shad' rure sagse: qhu" byid: vako" ra". 20Ceru: angad:- ngo wa Mao"So: qam: so' yang yui jham re khe' thug' pye' ru ngad: ra". Ce wa naonhaung" jhao" Mao"So: mung"dan: joe" li" va"- ga" ra" sagse: ngad: ra"- ga: ta" ra".
21Qam: bo yaug wa yao" yham re shae lhae cao jab we' zaung" na: au:- yao" jo,nho" jham wa gug: za: ngad: ra". 22Ngadqere: qam: je: bo: ra" yaug yao: re li" khe' aung: pye' lao"- ai: qam: je: bo: ra" yaug wa- ai: yaug khug ngha: na: ra" shae lhae jham re sham" yu mung: qo" lhad' yu: ra" lanyab rere: gae byid' pye' ra".
23Nga" bo: made; ra" yaug wa ngore gye kad' yaug ngad: ra"- amung: ngo we' daga" masham" zhang: ra" yaug wa abyo asin" yaug ngad: ra".
Makhyang" Ra" Yui Dam: Tug' Lo: Ru
(Mathe 12.43-45)
24Ai: Makhyang" ra" yui wa byu mae" thug' lo" lao"- kyaug' ho: ra" jo, qo khaung: mae yedu" qin" mung: no:qo cao" qho: qin" ra"- No:qo maqhug' lao"- yui wa Azhao ngo na co' ra" yham khyo dam: tug' lo" nae" ngad: ra"- ga: ta" ra". 25Airu: mung: yao: dam: tug' joe" lo: re- phyao: sham" pye' mung:- nyang" za: shaung: nyhang" to" rure lomyao: ra". 26Ailao"ai: yui wa thug' ye" lo" mung: yao: tho' je: makhyang" ra" yui nhad' dau: re khai: jhui" lo mung:- yao: bam wa ai: yham mae lona: ako". Airumung: byu ai: yaug: ave, wa sao qhid' mae" tho' je: qo: byaug: ra"- ga: ta" ra".
Dang Man" Ra" Ngaui Lho" Khyo
27Airu: Yesu bin: ta" lao"- mo, phaung mae" myiqe: dayaug wa Yesu re- Nao re khau mung: nug' jhaug' ra" myiqe: wa ngaui lho" ra" wo"- ga: hug' ta" ra".
28Ngadqere: Yesu wa Mao"So: mungdao: re tae" gyo: mung: phug' cao" ko" ra" mo, kam" wa ngaui lho" ko" ra"- ga: tau" ra".
Mug' Pho: Ve, Lho Kad' Qhu" Nae" Mho' Ko" Ru
(Mathe 12.38-42)
29Mo, byu qe Yesu lhang" gam: zang" ham: na: jo, ko" au:- xo' mung: Ceqae" mae" byu qe wa makhyang: mo, ngad: ako"- yao: bam wa mug' pho: ve, lho re mho' ako"- ngadqere: Yona nho: ve, lho mae" je yang: pe" ve, lho re: yao: bam re qhu" byid: nae" mangad:- 30Yona wa Nineve vobyu qe: qhid' mae" ve, lho ngad: ru we' dakhyo:- ai: Byu: Yao: Zo: re: ceqae" mae" byu qe: qhid' mae" ve, lho ngad: li" nae". 31Sheba kho:kham myhi" wa kho:kham Sholamon: pha,jhi" dao: re tae" gyo: nae" qhid' mae" va" ra" mung"dan: mae" joe" lo: ra"- Airumung: dao: kho' ra" ba na mae Sheba kho: kham myhi" wa to" ye, mung: naonhaung" re qobo zhaug' li" nae"- naonhaung" re ngo ta" geli"- ce: jo, qo mae Sholamon kho:kham tho' je: qi: yaug na: ra". 32Nineve vobyu qe wa- Yona kho" kyo" ra" mungdao: re the' gyo: gelao"- yao: bam: qobo mae" myid tha" lo: ako"- Airumung: dao: kho' ra" ba na mae Nineve vobyu qe wa to" ye, mung: naonhaung" re qobo zhaug' li" genae"- cejo, qo mae Yona tho' je: qi" ra" yaug na: ra"- ga: ta" ra".
Gaung Khyao: Nho: Bo" Bao
(Mathe 5.15; 6.22-23)
33Myikaug' re te' mung: khag' malhaung" nyham" to:- Ban" yang re: khag' malhaung" maug: lhaung" to"qu"- Yham khug khyo vao lo: ra" mo, alhab' re bao byid: nae" qhid' mae" myikaug' tao" dao mae lhaung" zhaung: to" ako". 34Ni" myo,jid' wa gaung khyao: qhid' mae" myibaung: ru" ru ngad: ra". Ai: ni" myo,jid' qang: qang: za: ngad: re wa ni" gaung geim" bao: jo; li" nae"- ngadqere: ni" myo,jid' athab zang ngad: re wa ni" gaung geim" cad' no; jo; li" nae". 35Airumung: naonhaung" mae bo: ra" bo" bao wa mug: cad' mangad: nae" qhid' mae" lha" ge,- 36Ni" gaung mae dakhyi" mae re: macad' jo, lo: gaung geim" bao: jo; ngad: re wa- myibaung: wa bao qhui: ra" bo" yang ni" dao mae bao byid' ru we' dakhyo:- ni" gaung geim" bao: jo; li" nae"- ga: ta" ra".
Pharishe Qere We' Jham: Tung" Pho" Qere Yesu Qobo Zhaug' Ru
(Mathe 23.1-36; Marku 12.38-40)
37Yesu airu: bin: ta" lao"- Pharishe dayaug wa yao: we' zo daga" zo: nae" qhid' mae" Yesu re khai: ra"- Airumung: Yesu wa ai: yaug: yham khyo ye: mung: zozo: nae" ga: yezaung: jo; ra". 38Yesu wa zo mazo: shi:re cid' san: ru makad' rure Pharishe pho"qu" ba lao" mug' ra". 39Airumung: Yesu wa yao: re- Pharishe qe naonhaung" wa naonhaung" ban- keim kang: jham re adao shad' mae za: cid' san: ako"- ngadqere: naonhaung" aung khug mae wa se' da: be, khyad' ru we' makhyang" ru byang" sho' bo: jo; ako". 40Byugo qe we"- Adao shad' re phan" to" ra" Mao"So wa akhug shad' rere: phan" to" ra" mangad: i? 41Ngadqere: naonhaung" ban we' keim kang: jham mae bo: ra" zo:ve jham re myaung sho" ra" mo, re byid: ge,- ailao" ja: khao: ngo" naonhaung" qhid' mae" thung" li we' dakhyo: san: lo" li" nae".
42Pharishe qe we"- naonhaung" byuxa: vaqoe, qhug' ako"- naonhaung" wa shaban- sham: nhang:- ban gya ru" ra" ao: pho' vho' aja: ja: mae" daxe bam mae" dabam Mao"So re qhaug' byid: gengad yang: re: naonhaung" wa tarha" din: vang" ru we' Mao"So re jhid'de; rure to" pye' ko" ra". Naonhaung" wa daxe bam mae"dabam Mao"So re qhaug' byid' ru za: mangad:- tarha" din: vang" ru we' Mao"So re jhid'de; rure re: mato" pye' co' lo:- ai:gu: alhab' re phug' cao" ang: ako".
43Pharishe qe we"- naonhaung" wa byuxa: vaqoe, qhug' ako"- pe"mung:ga"re naonhaung" wa Tarha" Jung Yham jham mae" gakai: lai jaung: to" ra" tao" khau" mae zaung nug mo,- gai jao: gyo: mae su: yang lham: phug' myao: nae" o mo, ngad: ako". 44Naonhaung" wa byuxa: vaqoe, qhug' ako"- naonhaung" wa axam: aso: majo, lo" ra" lab we' dau: ako"- Byu jham wa lab ngad: rure maba mung:- ai: dao mae su" lai: qin" ko" ra"- ga: ta" ra".
45Jham: Tung" Pho" dayaug wa- Mho" Pho" we"- nao ceru: ta" ru wa ngonhaung" rere: ta" phoe: ru ngad: ra"- ga: Yesu re ta" ra".
46Yesu wa tau: mung:- Jham: Tung" pho" qe naonhaung" re: byuxa: vaqoe, qhug' ako"- naonhaung" wa su gaje qere vin qug' ra" qo jham re vin nhao gemung:- naonhaung" yao: wa ai: qo jham re lo, nyhug' yang re: mabotin: ko" ngad: ra". 47Naonhaung" wa byuxa: vaqoe, qhug' ako"- naonhaung" wa naonhaung" phug' phyid' qeyang se' pye' ra" lapa qe: lab jham re gyai yaung" sho' zao byid' ako". 48Naonhaung" phug' phyid' qe kad' lo: ra" mau" zo" re naonhaung" bomyid vang" rure naonhaung" yao: sagse: qhu" byid' na: ako". Naonhaung" phug' phyid' qe wa lapa qere se' mung:- naonhaung" wa yao: bam: lab jham re zao byid' ako". 49Airumung: Mao"So: pha,jhi" ta" ru wa- Lapa qe we' lagyo: qere yao: bam jhao" nhao: ke' byid: nae"- yao: bam wa daqhae: re se' pye' li" genae"- Daqhae: re wa yhin" li" genae"- ga: ta" ra". 50Airumung: Abela re se' pye' rumae" Gyang" Lho" Jo, qo we' phan: agyo: mae se' pye' qhug' ra" Zakari joe" sho' mae" xao qug: we' mug: myid phan" to" rumae" se' pye' qhug' ra" lapa alhab' mo; xao qug: wa ana" ceqae" mae" byu qe qhug' vin: li" genae" ngad: ra". 51Ngad va"- naonhaung" re ngo ta" geli"- ai: xao qug: alhab' wa ana" ceqae" mae" byu qe xao qug: qhug' vin: li" genae".
52Jham: Tung" Pho" qe we"- naonhaung" byuxa: vaqoe, qhug' ako"- naonhaung" wa ai: pha,jhi" yham kham: thug' re sang: ci gemung:- naonhaung" yao: re: ai:khyo mavao ye:- Vao ye: nae" qam: ke' mo, rere: naonhaung" tam" to" ako"- ga: ta" ra".
53-54Yesu ai: jo, qo mae" thug' lo" lao"- Jham: Tung" Pho" qe we' Pharishe qe wa Yesu re xo sho' gaui mho mung: yao" nhad' thoe: yang jhau: shad' rure qobo taung: nae" qhid' mae" dao: myid: myo: sho' ja: Yesu re myid' ako".
Currently Selected:
LUKA 11: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009