YOHAN 12
12
Bethani Vogaung: Mae Yesu Re Xau Gyad Byid' Ru
(Mathe 26.6-13; Marku 14.3-9)
1Lai co' Poe joe" nae" khyaug' ba ca" shi" au:- Yesu wa shid: rumae" yao" yang dam: daui: li" nhao: ra" Lazaru na: ra" Bethani vogaung: khyo ye" lo" ra". 2Yao: bam wa Yesu re myi" xeim lham: nyhang" zho" ako". Matha wa zo:ve da" byid' na: ra"- Yesu we' vae: zo: jaung: mae daga" zaung: jo; ra" mo, mae Lazaru re: bobo: ra". 3Ailao" Mari wa gyai phug' de; ra" sheim nae pyo" ra" Nard xau gyang" daxe laung ko yu: yu yang: Yesu khyid mae vhe' gyad byid: mung:- yao" xae: yang sad' pye' byid' ra". Ai: xau wa dayham geim" mae byang" sho' nae: jo; ra". 4Yao: re ab byid' pye' nae" yaug ngad: ra" Yesu mho"zo: Yuda Iskarud wa 5Ce: sheim nae pyo" ra" xau re pe"mung: ngaui sam yo kye' mae aung: yang: ai: ngaui re myaung sho" ra" mo, re magae byid: i? ga: ta" ra". 6Yao: ceru: ta" ru wa myaung sho: mo; qhid' mae" myid: ci" yang: ta" ru mangad:- yao: wa khug' hab' ngad mung: ta" ru ngad: ra". Yao: wa ngaui thaung vin yaug ngad mung:- aimae" lhaung" khug' phoe' aung: zo: yaug ngad: ra".
7Ngadqere: Yesu wa Yao: re dakhin jang wa,- ngore nyhab' shaung: pye' ra" ba na qhid' mae" ai: sheim nae pyo" ra" xau re yao: vai: to" ru ngad: ra". 8Myaung sho" ra" mo, wa khonhae" re: naonhaung" we' daga" za: na: ako". Ngadqere: ngo wa naonhaung" we' daga" khonhae" re: na: jo, nae" mangad:- ga: ta" ra".
Lazaru Re Se' Pye' Nae" Pha,jhi" Khyug' Ru
9Mo,byu qe myo: sho' mo, wa Bethani vogaung: mae Yesu na thoe re the' gyo" ako"- aimung: yao: bam wa Yesu mathao: yang za: re: mangad:- Shid: rumae" Yesu yang daui: li" nhao: ra" Lazaru rere: myao nae" qhid' mae" Bethani vogaung: khyo ye" lo" ako". 10Aimung: khinjaung qi: qe wa Lazaru rere: se' pye' nae" pha,jhi" khyug' ako". 11Pe"mung:ga"re Lazaru mathao mae Yuda byu qe wa khinjaung qi: qere to: co' mung:- Yesu re lam" lo" geyang: ngad: ra".
Yerusalem Khyo Aung Doe; Poe Khyo" Yesu Vao Ye" Ru
(Mathe 21.1-11; Marku 11.1-11; Luka 19.28-40)
12Ai: thao: ba re Lai co' Poe khyo joe" li" ko" ra" mo,byu qe myo: sho' mo, wa Yerusalem khyo Yesu li" na: ra"- ga" rure the' gyo" ako". 13Aimung: yao: bam wa Zhunpalun akaung jham re yu yang: yao: re tug: yu nae" qhid' mae" ye" lo" ako". Amung: yao: bam wa Mao"So re caung:khin" byid: ge,- Asang: mang we' joe' li" ra" yaug wa ngaui lho" vashao: wo"- Israel kho:kham wa ngaui lho" vashao: wo"- ga: zag: hug' ako".
14Ailao" Yesu wa loze re myao mung: ai: dao mae do; zaung: ra".
15Aiwa Ziun vomo" we"- Dagyaug- Ni" kho:kham pho" wa loze nau" dao mae zaung yang: joe" li" ra"- ga: jham: mugsug' mae tung" to" ru we' dakhyo: ngad: ra".
16Yao" mho"zo: qe wa ce: khyo jham re ai: au: maba: gyo: ko" ngad: ra". Ngadqere: Yesu wa phungbao re qo" khae: yu lao" yao: bam wa ce: jham: dao: wa yao" khyo re ta" to" rure re:- yao: bam wa yao" qhid' mae" ceru: kad' byid: ko" rure re:- dam: myid: beim" li" ako".
17Lazaru re lab khug mae" khai: thug' yu yang:- shid: rumae" daui: li" nhao: ra" au:- Yesu we' daga" na ko" ra" mo,byu qe wa boe" lo: ra" khyo re ta" kyo" ako". 18Aimung: mo,byu qe wa yao: re li" tug: yu: ako"- pe"mung:ga"re yao: ce: mug' pho: ve, lho kad' ra" ga" rure yao: bam the' gyo: geyang: ngad: ra". 19Ailao" Pharishe qe wa Ngonhaung" wa khoru: re: maaung lo:ngad: ra"- Qu" ge,- mug: myid geim" yao" thao cao" byaug: avako"- ga: yao: cao: jho" ta" ako".
Greeg Byumyu" Qe Yesu Re Qho Ko" Ra" Khyo
20Poe ba na gyo: mae caung:pa" nae" qhid' mae" Yerusalem khyo ye" lo" ko" ra" mo,phaung mae Greeg byumyu" damyo" bobo: ako". 21Yao: bam wa (Galile mung" mae" Bedsaida vobyu) Philib jhao" ye: mung:- Nhag' bo we"- ngonhaung" wa Yesu re myao nug: ra"- ga: yeta" ako".
22Ailao" Philib wa Andre re yeta" kyo: mung: yao: shid'zo: wa Yesu jhao" ye: yang: yeta" kyo" ako". 23Yesu wa yao: shid' zo: re- Byu: Yao: Zo: phungbao qi: qo" khae: yu nae" yo, khyin: ana" joe" ava". 24Naonhaung" re ngo dang za: ta" geli"- Jung: gaug ce' wa myid gaung mae ke' yang: nyhab' pye' ru maqhug' ngad: re wa dace' mae" je yang: gatau mamyo" li" ngad: ra". Nyhab' pye' ru qhug' ngad: re wa ashi: myo: sho' zaui" li" ra". 25Yao: yao" kao so' re qhaung: ra" yaug wa kao so' jeim: nae"- ce: mug:myid dao mae yao: yao" kao so' re mabyag: ra" yaug kam" wa apyad ato: kao so' re shaung: to" li" nae". 26Ngo re caung da" nug: ra" yaug wa nga" thao cao" ca" ra"- amung: ngo na: ra" jo, qo mae nga" daui daui yaug re: na: li" nae"- nga" Pho" wa ngore caung da" ra" yaug re phug' te' nga: yhe' li" nae"- ga: tau" ra".
Yao: Shid Kham: Nae" Khyo Yesu Ta" Ru
27Ana"- nga" nhag' lam: mae myid: qug: myid: ci" na: ra"- ngo pe" ta" nae" i? Nga" Pho" we"- ce: yo, qug nga" dao mae dajoe" li" nhao wa,- ein: ta" nae" laug i? Ngadqere: ngo ce: qug' khai: khyag' qhui: rure kham zo: nae" qhid' mae" joe" li" ru ngad: ra". 28Nga" Pho" we"- ni" mang re phungbao bao: li" nhao wa,- ga: ta" ra". Ailao" mug:gaung mae" thoe dathoe jhau: thug' li" mung:- ngo phungbao bao nhao va"- ana" re: ngo wa phungbao dam: bao nhao shinae"- ga: ta" ra".
29Ai: mae ye; jo; ra" mo,byu qe wa ai: thoe re the' gyo: geyang:- yao: bam mae" damyo" wa Mug:dam: dam" ru ngad: ra" ga: ta" gemung:- damyo" wa Mug: lagyo: yao: re dao: jhau: ru ngad: ra"- ga: ta" ako".
30Yesu wa yao: bam re ce: dao: thoe wa nga" qhid' mae" jhau: thug' li" ru mangad:- naonhaung" qhid' mae" ngad: ra". 31Ce: mug:myid re dao: kho' ru wa ana" ngad: ava"- ce: mug:myid dao: zug: pho" re ana" khe' thug' pye' ru qhug' naeva" myao:- 32Ngo wa myid gaung mae" tau: to' to" ru qhug' lao"- ngo wa yaug khao: ngo" re- ngojhao" lao" yu nae"- ga: ta" ra". 33(Ceru: ta" ru wa yao: wa shid: rure khoru: kham zo: nae" ga" rure ta" shid' ru ngad: ra")
34Mo,byu qe wa Ngonhaung" nho: tarha" mae Meshia wa apyad ato daui: na: li" nae"- ga: ta" to" ra". Aire nao wa Byu: Yao: Zo: wa to' to" ru qhug' ca" ra"- ga: khoru: mung: qo" ta" i? Byu: Yao: Zo: wa khag' ngad: ra" i? ga: ta" ako".
35Yesu wa yao: bam re- Ai: bo" bao wa naonhaung" phaung mae dazab myao" sho' na shizai ngad: ra"- Mug:cad' wa naonhaung" dao mae macad' nghoe' lo vashao:- naonhaung" wa bo" bao qo" jo, shiko" au: re xo' su" na ge,- pe"mung:ga"re mug: cad' khug mae su" lhau: ra" yaug wa yao: khokhyo ye" lo" na: rure maba ngad: ra". 36Aimung: naonhaung" wa bo" bao: nho: zo:dau qe boe" genae" qhid' mae" naonhaung" wa bo" bao ajo; jo, shi" au: re ai: bo" bao re lam" ge,- ga: ta" ra".
Malam" Ko" Ra" Mo,Byu Qe
Cedao: re bin: ta" lao"- Yesu wa thug' lo" mung: yao: bam mae" phao: vho' lo" ra". 37Yesu wa yao: bam: qhid' kheim: mae mug' pho: ve, lho jham ainho" kad' qhu" ngadqere: yao: bam wa yao: re malam" ko" ngad: ra". 38Airu: malam" ko" ru wa Asang we"- ngonhaung" ta" ra" mungdao: re khag' lam" ra" i? Asang wa yao" qam: so' re khag' re qhu" byid' ra" i? ga: lapa Esaia ta" to" ru jab byang" li" nae" qhid' mae" ngad: ra".
39-40Ai: tho' mago" Esaia wa yao: bam: myo,jid' mamyao geshao:- yao: bam: nhag' lam: maba: gyo: geshao:- ngo yao: bam re gai byid: nae" yao: bam ngojhao" matug' lo geshao:- ga: Mao"So wa yao: bam: myo,jid' re jid nhao mung:- yao: bam: nhag' lam: rere: nhag' cad' cad' nhao: ra"- ga: Mao"So ta" ra"- ga: re: ta" to" ruyang yao: bam maqo" lam" ko" ngad: ra".
41Esaia wa Yesu phungbao re the' myao yang: Yesu khyo we' sin: mung:- ceru: ta" ru ngad: ra".
42Ailao" kheim: so' qo" ra" Yuda qe myo: sho' Yesu re Lam" ako". Ngadqere: yao: bam re Pharishe qe- yang Tarha"Jung Yham mae" phoe' pye' ru maqhug' nae" qhid' mae"- yao: bam wa aikhyo re de: de: za: mata" ko" ngad: ra". 43Yao: bam wa Mao"So: yang caung:khin" ru tho' byu: yang caung:khin" rure je: o: ako".
Yesu Dao: Thoe: Yang Dao: Kho' Ru
44Yesu wa thoe qi: we' Ngo re lam" ra" yaug wa ngore za: mangad:- ngore nhao: ke' ra" yaug rere: lam" yaug ngad: ra". 45Aimung: ngore myao: ra" yaug wa ngore nhao: ke' ra" yaug rere: myao: ra". 46Ngo re lam" ra" mo, alhab' wa mug: cad' yo mae mana: jo, nae" qhid' mae" ngo wa bo" bao khyo" ce: mug:myid dao khyo joe" li" va". 47Nga" mungdao: re gyo" yu mung: maphug' cao" ra" yaug re wa ngo wa- yao: re dao: makho' nae". Ngo wa mug: myid byu qere dao: kho' nae" qhid' mae" joe' li" ru mangad:- Khyad' yu nae" qhid' mae" joe" li" ru ngad: ra". 48Ngo re ha: pye' mung: nga" mungdao: re makhae: yu: ra" yaug re dao: kho' nae" dayaug na: ra". Amung: ngo ta" to" ra" dao: thoe wa lo" thao" ra" ba na mae yao: re dao: kho' ra" tarha" zug: ngad: li" nae" 49Pe"mung:ga"re ngo wa ngoyao" akho: akhang" khyo" ta" ru mangad:- ngore nhao: ke' ra" Nga" Pho" wa ngo pe" ta" pe" jhau nae" rure ngore amyin" byid' to" ra". 50Yao" amyin" dao: wa apyad ato: kao so' re qo" nhao: rure ngo ba:. Aimung: ngo ta" ru wa Nga" Pho" yang ngore ta" nhao: to" ra" gu: re ta" ru ngad:- ga: ta" ra".
Currently Selected:
YOHAN 12: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009