EZEKELA 2
2
Ezekela Re Lapa Pa Nae" Qhid' Mae" Mao"So Khai: Yu: Ru
1Ai: Asang wa ngo re- Shid ba: ra" yaug we"- to" ye; ke' wa,- nao re ngo dao: jhau nug: ra"- ga: ta" ra". 2Ai: thoe jhau: na: au: re- Mao"So: byo wa ngo mae vao: jaung" mung: ngo re tau: yhe' ke' ra"- aimung: ai: thoe xo' jhau: rure ngo the' gyo" ra". 3Shid ba: ra" yaug we"- ngo wa nao re Israel byumyu" qejhao" nhao: ke' nae". Yao: bam wa ngo re tau: lhan: mung: ngo re gye phaug' kad' ako". Aimung: yao: bam: phug' phyid' qe we' dakhyo: ana" joe" sho' tau: lhan: mo, ngad: ashiko". 4Yao: bam wa sang: dang gemung: ngo re maphug' myao: ngad: ako". Aimung: ngo wa yao: bam re kheim: so' qi" ra" kho:kham Asang ngo yao: bam re ta" na: ru yeta" kyo: nae" qhid' mae" nao re nhao: ke' ra". 5Ai: tau: lhan: mo, nao re tae" gyo: geyang: ngad ngad matae" gyo: geyang: ngad ngad yao: bam: phaung gaung: mae lapa dayaug na: lai: lo vanhaung ga: yao: bam ba: li" genae".
6Ngadqere: shid ba: ra" yaug we"- nao wa yao: bam rere: yao: bam ta" ru pe" rere: magai: gyaug nae". Yao: bam wa nao re maphug' makhyad' magun masun: kad' li" genae". Gung gug' jham: phaung gaung mae na: ru we' dau: li" nae". Ngadqere: ai: tau: lhan: mo, re dagyaug- yao: bam ta" ru pe" rere: dagyaug- 7Nao wa nao re ngo ta" ru pe" ngadqere: yao: bam tae" gyo: geyang: ngad ngad- matae" gyo: geyang: ngad ngad yao: bam re ta" kyo: ca" nae". Yao: bam wa khoru" tau: lhan: mo, ngad: rure nao myid: beim: wa,.
8Shid ba: ra" yaug we"- nao re ngo ta" rure tae" gyo: wa,- yao: bam we' dakhyo: datau: lhan: daphaug' lhag'- ni" nhad' re ho" mung: nao re ngo byid: nae" rure zo: wa,- ga: ta" ra". 9Lo, dashad' ngo shad' khyo yheim" ke' rure ngo the' myao mung: ai: lo, mae mugsug' dadang: zhab' ci: ra". 10Ai: lo, wa mug' sug' dang: re pheim: ke' mung:- ai: shid' shad' geim" mae tung" to" ru ngo the' myao:- aimae kaug' qhui: ngug: rure tung" to: mung: ngug yao" yao" ru we' nokyang: kyang" ru bo: ra".
Currently Selected:
EZEKELA 2: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009