MHO" PEIM: 10
10
Moshe Amyin" Dao: Daxe Lam: Re Dam: Khae: Yu: Ra" Khyo
(Phao: Thug' 34.1-10)
1Ai: thao Asang wa ngore- Sao qhid' mae" we' dakhyo: dau: ra" laug pye: shid' pye: re kho' phyid' yu mung: aire ke' nae" sag' ban" dalam: zhaug' wa,- bam dao khyo ngojhao" do, lo ri:- 2Nao pye' kho' pye' ra" laug pye: shid' pye: dao mae tung" ra" dao: jham re- ai: laug pye: shid' pye: dao mae ngo tung" nae". Ai: thao re- nao wa aishid' pye: re ban" dalam: mae ke' nae" ngad: ra"- ga: ta" ra".
3Airumung: ngo wa qhoje; sag' yang ban" dalam: zhaug' mung:- sao qhid' mae" we' dakhyo: dau: ra" laug pye: shid' pye: re kho' phyid' yu yang: bam dao khyo vo; do, lo" va". 4Ai: thao Asang wa- naonhaung" bam mae zang" ham: na: ra" ba mae myi:khug' mae" yao: jhau: ra" au: naonhaung" re byid' ra" ai: amyin" zang daxe lam: re sao qhid' lhang tung" va" ra" dao jham we' dakhyo: za: ai: laug pye: shid' lam" dao mae tung" te' ra". Asang wa ai: laug pye: shid' pye: re ngore byid' ra". 5Amung: ngo lhang: lo" mung: bam mae" gyo" lo" ra". Ai: thao Asang: yang amyin" byid' to" ru we' dakhyo:- ngo zhaug' to" ra" ban" mae ai: laug shid' pye: re ke' to: mung: ai: laug shid' pye: wa ai: yo, mae" aimae bo: jo; ako".
6(Israel byu qe wa Yakan amyu" qe sang ko" ra" qid thaung: jham mae" to" lo" mung:- Mosera khyo ye" lo" ako". Aitau mae Arun shid: lo" byaug mung:- nyhab' shaung: pye' ako". Yao" yauggai zo: Eleaza wa khinjaung khyo" yao" khu mae xo' kad' ra". 7Yao: bam wa ai: jo, qo mae" Gudgoda khyo ye" lo" gemung: aimae" qid myo: sho' yug: ra" Yodbatha khyo xo' ye" lo" ako". 8Ai bam mae Asang wa Levi byu qere- khinjaung qekhyo" yao: re caung da" byid: mung: dao: thang" ban" we' sin" ra" mau" re au: jhaung kad' yang: vin vo; nae" we' yao" mang mae shaman" byid: nae" qhid' mae" jaung: to" ra" cegu: wa yao: bam vin vo; nae" qo ngad: jo; ashi". 9Ce: mathao mae- gatau: amyu" kaung qe we' dakhyo: Levi amyu" kaung qe wa mug:myid maqo" khae: yu ko" ngad: ra". Naonhaung" Mao"So Asang dao:so: byid' to" ru we' dakhyo:- yao: bam wa Asang: khinjaung qe: mau" re qo" khae: yu: ako".)
10Ngo wa sao qhid' lhang we' dakhyo: bam dao mae byid xe ba- byid xe myi thang na: jo; ra". Asang wa ngore dalhang dam: tae" gyo: byid: mung: naonhaung" re mase' tam" pye' nae" myid vang" ra". 11Ai: thao yao: wa ngore- naonhaung" phug' pho" qere byid: nae" ga: yao: dao:so: byid' to" ra" mung"dan: jo,nho" dai kham re yeqo" sang: yu nae" qhid' mae" naonhaung" re lo" mung: jhui" ye: wa,- ga: ta" ra".
Mao"So Mho' Ra" Ja:
12Ana"- Israel byu qe we"- naonhaung" Mao"So Asang naonhaung" mae" pe" ja: mho' ra" thoe re tae" gyo: ge,- Asang re caung:pa" byid: mung: yao" amyin" dao: alhab' re phug' cao" ge,. Naonhaung" nho: aung khug nhag' lam: alhab' we' jhid'de; mung: caung da" byid: ge,. 13Amung: yao" tarha" alhab' re phug' cao" ge,. Naonhaung" akyu" qhid' mae" aijham re ana" ba naonhaung" re byid' na: ru ngad:- 14Myhao: thao" ra" mug: khaung lhao" re: Asang: mae" ngad: ra"- myidgaung we' aimae" ja: khao: ngo" rere: yao: sang: ra". 15Ngadqere: naonhaung" phug' pho" qere jhid'de; ra" Asang: jhid'de; myid wa gyai qi: gyai qam: bo: ruyang gatau: amyu" qere khyin: yu nae" atha" yao: wa naonhaung" re khyin: yu: ra". Naonhaung" wa yao" yang khyin: yu: to" ra" amyu" ngad: jo; ashiko". 16Airumung:- ana" mae" thoegu:- Asang re mho dao: gyo: ge,- nhag' lam: qao: ru thang: pye' ge,. 17Naonhaung" Mao"So Asang wa so jham alhab' tho' mae" yaug: kheim: so' alhab' tho' mae" yaug ngad: ra". Yao: wa qi" qhang: ru we' qam: bo yaug ngad mung: yao: wa phug' cao" nae" man: qi" ra" yaug ngad: ra". Yao: wa myo,nho makhyin ngad: ra". Yao: wa khug vag: re makhae: yu ngad: ra". 18Cug' zo: qere we' cug' mo" qere tarha" din: nyang: ra" khyo" kad' rure yao: ba nhao: ra". Yao: wa ngonhaung" amyu" byu qe we' daga" na ko" ra" taung bug byu qere jhid'de; ra". Amung: yao: bam re zo:ve we' mai bau: jham byid' ra". 19Airumung: taung bug byu qere jhid'de; myid qhu" byid: ge,- pe"mung:ga"re ganhae" naonhaung" re: Egutu mung" mae taung bug byu boe" lai: lo: ako". 20Naonhaung" Mao"So Asang: mho dao: re tae" gyo: ge, yao: re za: caung:pa" ge,- yao: re jhaug' zaug ge,- naonhaung" dao:so: jham re yao" mang re lao: yang: za: kad' ge,. 21Yao: re caung:khin" ge,- yao: wa naonhaung" Mao"So ngad mung:- naonhaung" qhid' mae" qi" qhang: ru we' mug' pho: mau" jham yao: kad' va" rure naonhaung" yao" myo; yang yao: the' myao: avako". 22Naonhaung" phug' pho" qe Egutu mung" khyo ye" lo" ko" au:- yao: bam wa nhad' xe yaug za: ngad: ako". Ngadqere: ana" naonhaung" Mao"So Asang wa naonhaung" re mug:gaung mae" kyi nho" myo" je" li" nhao: ava".
Currently Selected:
MHO" PEIM: 10: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009