DANIELA 10
10
Tigri Qid Gyaung: Yae Mae" Daniela Nho: Qhu" Lho
1Persia mung" mae Khuru khosin" boe" ru sam zin ein: zin mae Belteshaza ga: re: mang: ra" Daniela re mungdao: dalam: qhu" byid' ra". Ai: mungdao: wa dang ngadqere: ba: gyo: nae" qhid' mae" saung" dae xo sho' yao: qug' ra". Ai: lau dao: re qhu" lho dalam: khyo" yao: re sho' kyo" ra".
2Ai: ayo, mae ngo wa laban sam bad kaug' ngug: na:- 3Laban sam bad lai: sho' ngo wa amyan: amyho' pe" zo:ve re:-mazo: sabyi qang: re: mashaug'- nga" xae re: makyo'-
4Ai: zin: zin sag' khye' shid' xe: byid ba: ba mae- ngo wa qam: qi" ra" Tigri qid gyaung: yae mae yeye; jo;- 5Ngo tau: qu" ke' re- jid: mo" khyang mai bau: ve, mung: qhang gyang" phyid' cui: cui" ci: ra" byu dayaug re the' myao:- 6Yao: nho: gaung phug' de, laug we' dakhyo: bao: jo; ra". Yao" nho: myo, khung: wa lhe' cad' cad' ru we' dakhyo: bag bao bao: jo, mung: yao" nho: myo, jid' jham wa myi: we' dakhyo: de; na: ako". Yao" nho: lo, sin lo,pau" jham we' yao" khyid jham wa boe; jhad' to" ra" gyid: bo" we' dakhyo: bao: jo; ako". Aimung: yao" nho: jhau thoe wa mo, byu phung: mo" hug' yhai: ru we' dakhyo: myang: ra".
7Ai qhu" lho re the' myao: ru wa ngo dayaug za: ngad: ra". Ngo we' daga" na mo, wa pe" rere: mathe' myao ngad: ako". Ngadqere: yao: bam wa gyaug: din: ru we' phao: vho' qin" ako". 8Ai: jo, qo mae ngo dayaug za: ai: qhu" lho re lhaug' qu" mung: na: dang: jo;- ngo mae qam: dace' re: mabo lo: mung: nga" myo, khung: wa su khag' yang re: maba qu" xam: losho' myo, nho lai" byaug va". 9Yao" nho: thoe re ngo the' gyo: lao"- ngo wa magyang: maso: lo: myidgaung khyo gyang: lang" gyo" lo" mung: ai: jo, qo mae lamhaung: lagoe, goe; lang" jo, va". 10Aimung: lo, dalo; yang ngo re tau: to" ke' mung: lo, du: du: pad' thaug' thaug' nhao: ra"- ngo wa agyaug: nin" na shi"-
11Mug: lagyo: wa ngo re Daniela we"- Mao"So wa nao re jhid'de; ra". To" ye, mung: ngo ta" nae" rure nyang" za: tae" gyo: wa,- ngo re nao jhao" nhao: ke' ru ngad: ga: ta" ra". Yao: ceru re bin: ta" lao"- ngo wa gyaug: nin" zo" re" to" ye; ke' va".
12Ailao" yao: wa ceru: ga: ta" ra". Daniela we"- dagyaug wa,- nao ba: gyo" ru qo" yu nae" qhid' mae" nhag' lam: nyham: khyo" nae" nao myid: phyid' ra". Sao qhid' ba na mae" yao: Mao"So wa ni" akyu" mho' dao: jham re gyo: byid' ava". Ni" akyu" mho' dao: phyid qhid' mae" nao jhao" ngo joe" li" va". 13Persia mae" mug: lagyo: kho:kham nau" wa ngo re shid' xe: daba ngag: thaug' ra". Ai: thao mug: lagyo: zug: mo" jham mae" dayaug ngad: ra" Mikhae wa ngo re li" bao" yu: ra". Pe"mung:ga"re ai: Persia mung" mae ngo dayaug re za: to: co' ako". 14Joe" lo nae" ayo, mae" ni" byumyu" qe pe" qhug' phau: nae" rure nao re ba: gyo: nhao nae" qhid' mae" ngo joe" li" ru ngad:- ceru wa joe" lo nae" ayo, we' sin" ra" qhu" lho ngad:- ga: ta" ra".
15Yao: ceru: ta" ra" au: ngo wa dao: maba: jhau lo: myid gaung khyo zhaug' qu" na:- 16Ailao" byu dayaug we' dau: ra" mug: lagyo: dayaug wa yao" lo, re yheim" ke' mung: nga" nho: nhad' qid re tin: byid' ra". Ngo wa yao: re Asang we" ce: qhu" lho wa ngo re saung" qam: nang: nhao mung: ngo nin" ru maqo" thang lo:- 17Ngo wa jeim sang: qhid kheim: mae ye; jo: ra" jeim dayaug we' dakhyo: ngad:- nao re ngo khoru: ba: qo" jhau nae" i? Ngo mae pe" qam: re: pe" so' re: mabo lo: ein: ta" va".
18Yao: wa ngo re dalhang dam: she: yu mung: ngo dajhid' qam: je: bo: li" thoe gyo" ra". 19Yao: wa nao re Mao"So jhid'de; ra". Aimung: pe" yang re: nao re dasang: kho: nhao da kyaug' tin" nhao- ga: ta" ra".
Yao: ceru re bin: ta" lao" ngo je: qam: bo: li" thoe gyo: mung: Asang we"- nao ta" ca" rure ta" wa,- nao wa ngo re je: na pyo: sho' kad' ava".
20-21Yao: wa ngo pe" mung: nao jhao" li" rure nao ba: i? Dang man" ra" Tung" Paug' mae tung" to" ru nao re qhu" byid: nae" qhid' mae" joe" li" ru ngad:- ana" ngo wa dam: tug' phao mung: Persia mae" lhaug' zaung" ra" mug: lagyo: re gye lo" khe' ca". Ai: thao mae Heleni mae" lhaug' zaung" ra" mug: lagyo: na: thug' li" nae". Israel nho: lhaug' zaung" yaug mug: lagyo: Mikhae mae" lai yang: khag' re: ngo re bao" yu nae" mana.
Currently Selected:
DANIELA 10: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009