2 SAMUELA 2
2
Davi Re Yuda Kho:kham Kad' Nhao: Ra" Khyo
1Ceru thao- Davi wa Asang re- ngo wa ye: mung: Yuda mung" mae" vogaung: jham mae" dalam: lam: re ye eib zai i? ga: myid' ra".
Asang wa gai: ra"- ga: tau" ra".
Asang wa Hebron vogaung:- ga: ta" ra". 2Aimung: Davi wa yao" yham sang myhi" shid' yaug we' daga" Hebron khyo ye" ra". Ai shid' yaug wa Yezre mae" Ahinoam we' Khame mae" Naba nho: cug' mo" Abigai tao ngad: ako". 3Yao: wa yao" byu qe we' yao: bam: yham byu qere: re: jhui" ye: mung: Hebron lhang" gam: mae" vogaung: jham mae yete" na: ako". 4Ailao" Yuda mung" mae" mo, wa Hebron khyo joe" li" mung: Davi re kho:kham khyo" xau li" gyad byid' ako".
Gilaead mung" mae" Yabe vobyu qe Sholu re nyham' pye' ko" ra" thoe re Davi the' gyo: lao"- 5Yao: wa aimae" byu daqhae: re yao: re nyhab' shaung: ra" khyo" yang naonhaung" kho:kham pho" re jhaug' zaug ko" ru qhu" byid' ru qhid' mae" Asang wa naonhaung" re shaman" byid: vashao:- 6Ana" Asang wa nhag' khyag' mung: naonhaung" re jhaug' zaug vashao:- naonhaung" kad' lo ko" ra" lo, mau" mathao mae ngore: naonhaung" re nyang" kad' nae". 7Qam: bo mung: lhe: myid bo ge,- naonhaung" kho:kham pho" wa shid: ava". Yuda byu qe wa yao: bam: kho:kham khyo" ngore xau gyad byid' avako"- ga" ra" mungdao: we' daga" nhao: ke' ra".
Ishboshed Re Israel Kho:kham Kad' Nhao Ko" Ra" Khyo
8Nera nho: yauggai zo: ngad: ra" Sholu nho: gyezug: Abne wa Sholu nho: yauggai zo: Ishboshed we' daga" Yodan gyaung: gau" de, yang: Mahanaim khyo phao: lo" ako". 9Abne wa Ishboshed re Gilead- Ashe- Yezre- Ephrim- Benyamin mug: myid jham we' Israel mung" alhab' dao mae kho:kham kad' nhao: ra". 10Yao: re Israel kho:kham kad' nhao: ra" au: yao" apyad wa byid xe zin ngad: ra". Yao: wa shid' zin eib: na: ra". Ngadqere Yuda amyu" kaung qe wa Davi re jhaug' zaug: ako". 11Yao: wa Yuda mung" Hebron mae nhad' zin: dakhyug' eib: lo: ra".
Israel We' Yuda Agyo: Mae Gye Khe' Poe Boe" Ra" Khyo
12Abne we' Ishboshed nho: zug: qe wa Mahanaim mae" Gibeon vogaung: khyo ye" ako". 13Zeruia nho: yauggai zo: Yoab we' Davi nho: zug: gaje qe wa qid tham: dalam: mae ai bam we' jho" qhug' ako". Ai tau mae yao: bam alhab' mo, qid tham: dashad' mae daphung: phung: zaung: jo; ako". 14Abne wa Yoab re shad' khao: ngo" mae" zolau: daqhae: qhae: re khyin: yu yang: mang: jho" zin" qu" gelang: ga: lhaung: ra".
Yoab re: gai ga: tau" ra".
15Aimung: Ishboshed shad' mae daxe: shid' yaug Davi shad' mae" Benyamin kaung mae" daxe: shid' yaug jho" zin" ako". 16Yaug khao: ngo" yao: yao" gyevo re au: sham" mae" zaui" yu yang: yao" shae pyang: re yao" gyevo pho" nho: nae dan: mae thug' kyao" ako". Amung: yao: bam shid' xe: byid yaug geim" daga" shid: gyang: lo" ako". Airumung: Gibeon mae" ai: jo, qo re Shae Pyang: Yo ga: mhang" ako".
17Ai: thao gyai thin: ra" gyekhe' poe boe" thug' li" mung: Abne we' Israel byu qere Davi nho: byu qeyang zin" aung: pye' ako". 18Zeruia nho: yauggai zo: qe ngad ko" ra" Yoab- Abishai- Asahe bam wa aimae na: ako". Xe' lae" qhi" tao: qao: ra" yaug Asahe wa- 19Abne re cao" khe' mung: yao: jhao" din: za: tao" na: ra". 20Abne wa lhang: qu" mung: nao Asahe ngad: i? ga: myid' ra".
Yao: wa ngad: ga: tau" ra".
21Abne wa ngore khe' ru thang: pye' wa,- gyezo: dayaug yaug: thao cao" khe' yang: yao: qo" rure yu: yu wa,- ga: ta" ra". Ngadqere: Asahe wa mathang lo: cao" khe' ra". 22Abne wa ngore khe' rure thang: pye' wa,- nao re ngo se' pye' nae" pe"mung: deim" zag: nhao: na: ra". Ni" mao: Yoab re ngo myo, khaung: khoru: qhu" nae" i?- ga: dalhang dam: ta" ra". 23Ngadqere: Asahe wa mathang ngad: ra". Airumung: Abne wa nhaung thao" shad' khyo yao" lhae tad' re geim: ke' ra". Yao" dao kao" khyo" lhae tad' thug' li" sho' yao" vae: dug: re geim: kyao" ke' ra". Asahe wa myid gaung khyo shid: gyo" lo" ra". Yao: lang" jo; ra" jo, qo khyo joe" li " ra" mo, yaug khao ngo" wa thang mung: aimae ye; jo; ako".
24Ngadqere: Yoab we' Abishai shid' tao wa Abne" nho: thao cao" khe' ako". Yao: tao wa ba vao yo, re Amma bug gaung khyo joe" lo: ako". Aiwa Gibeon din"pyad' yo khyo joe" ra" khyo dao Gia ba thug' shad' khyo ngad: ra". 25Benyamin kaung mae" mo, wa Abne lhang" gam: mae dam: zang" ham: na mung: bug gaung au: dalam dao mae ye; jo; ako". 26Abne wa Yoab re- ngonhaung" khonhae" re: gye jho" khe' ca" nae" i? Lo" thao" re wa pe" mangad: lo: alokho" ru za: boe" rure nao mamyao i? Ngonhaung" wa naonhaung" mao:nhaung: qe ngad: ni" byu qere ngonhaung" re khe' ru thang: pye' nae" nao amyin" mabyid: shire khomyhao" myao" nae" i? ga: ta" ra".
27Yoab wa- nao dao: majhau re wa nga" byu qe wa ne, mo" ba ne, kao joe" sho' nao re mathang lo: cao" khe' li" genae" khyo daui: na: ra" Mao"So re lao: yang: ngo jham tang" ra" ga: tau" ra". 28Ai: thao Yoab wa Israel byu qere cao" khe' ru thang nae" yao" byu: qe: qhid' mae" ave, aso: khyo" labo" re mad: ke' ra". Aimung: mang: jho" zin" ru thang: lo" byaug: ra".
29Abne we' yao" byu qe wa ai: myikhyeim Yodan lao: khaung: re su" phyid' lo" ako". Yao: bam wa Yodan gyaung: re gau" de; ako". Thao: ba ne, seim geim" bin: su: gethao yao: bam wa Mahanaim khyo joe" lo" ako".
30Yoab wa cao" khe' rure thang: pye' lao" yao" byu alhab' re zhang: ke' re- Asahe re manghe' re yao: bam mae" daxe: gug yaug byaug: jo; ra". 31Davi nho: byu qe wa Benyamin kaung mae" Abne nho: byu 360 yaug re se' pye' ako". 32Yoab we' yao" byu qe wa Asahe nho: maogaung re dao: yu mung: Betlehem mae" yham khaung lab mae nyhab pye' ako". Ai: thao yao: bam wa damyi khyeim su" lo" mung: mug: bo" qid re Hebron khyo joe" lo" ako".
Currently Selected:
2 SAMUELA 2: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009