2 KHO:KHAM 25
25
Yerusalem Vogaung: Gyo" Lo" Ra" Khyo
(2 Kho:kham mhomyi: 36.13-21; Yeremia 52. 3b -11)
1Zedekia wa Babelon kho:kham Nebugkhaneza gye kad' tau: lhan" ra". Aimung: Nebugkhaneza wa yao" gyetab alhab' we' li" mung:- Zedekia eib: ru gug zin ein: zin- lho" daxe khye' ein: khye' daxe ba ein: ba mae Yerusalem re gye li" khe' ra". Yao: bam wa vogaung: taung gaung shad' mae jamu li" kad' na mung: vogaung: lhang" gam: yang: vang" to" ra" vang jham kad' ako". 2Aire Zedekia eib: ru daxe: dazin joe" sho' vang" ci: ako". 3Ai: zin: nho: lho" byid khye' ein: khye' gug ba ein: ba mae bao" khug' xo sho' khug' li" mung: mung" byu qe zo: nae" pe" madang lo:ngad: ra". 4Vogaung: vang jham re phyo' pye' ako". Ai: vogaung: re Babelon byu qe lhang" kham" to: gesho' ngadqere: gyezo: qe alhab' wa myi" re phao: loe; byaug: ako". Yao: bam wa kho:kham kho" bin: khyae khyo" thug' lo" mung: vang shid' lam: jho" xo' ra" kham: dung: khyo" thug' lo" mung: Yodan lao: khaung: shad' khyo phao: ye" lo" ako". 5Ngadqere: Babelon gyezo: qe wa kho:kham Zedekia re cao" khe' mung: Yerikho nhae mae" pa: din" mae Yao: re the' taung" yu: ako". Yao" gyezo: qe alhab' yao: re phao: cug' to: co' ako". 6Zedekia re Ribla mae na: ra" kho:kham Nebugkhaneza jhao" jhui" lo" ako". Nebugkhaneza wa yao: re aimae dao: kho' ra". 7Zedekia nho: myo, khung: mae yao: yao" yauggai zo: qere se' qhu" ako". Ai: thao Nebugkhaneza wa Zedekia nho: myo, jid' re phaug' pye' nhao mung: jao co" yang taui: yang: yao: re Babelon khyo jhui" lo" ra".
Caung:pa" Yham Re Phyo' Qheim" Pye' Ra" Khyo
(Yeremia 52.12-33)
8Babelon kho:kham eib: ru daxe: gug zin ein: zin lho" ngo" khye' ein: khye' nhad' ba ein: ba mae kho:kham pho" nho: pha,jhi" byid: yaug- yao" gyezug: pho" Nebuzaradan wa Yerusalem khyo vao ye" ra". 9Yao: wa Caung:pa" Yham- Kho:kham kho"- Yerusalem mae" akhyag: ra" byu qe alhab' mo; nho: yham jham re ngha" pye' ra". 10Amung: yao" gyezo: qe wa vomo" vang jham re phyo' khyo" pye' ako". 11Ai: thao Nebuzaradan wa vogaung: mae na: dang: jo; ra" vobyu qe -dang: jo; ra" lo, mau" jhao mo,- Babelon byu qejhao" phao: de; lo" byaug mo, re Babelon khyo pyaung" jhui" lo" ra". 12Ngadqere: yao: wa jo,nho" zai yo pe" maqo" ra" myaung: thao" ra" mo, re Yuda mung" mae nha: to: co' mung: yao" bam re sabyi khyae mae we' yothaung: jham mae mau" zaui: nhao: ra".
13Babelon byu qe wa gyid: zang baung: jham we' Caung:pa" Yham mae" lhin" jham we'daga" gyid: qid lhao: re aje, aman" be; khyoe' pye' ako". Yao: bam wa gyid: alhab' re Babelon khyo tai: lo" ako". 14Yao: bam wa phan re sham" san: pye' rumae ci: ra" qe, gag khao: jham- myimhab ke' ra" khug'- myikaug' jham re so" ra" zai jham- Xeim: ngaui" jham mae" sa: re khae: ra" khug' jham- Sheim nae pyo: ja: phad' ngaui" ra" khug' jham- Caung:pa" Yham mae caung: da" rumae ci: ra" gyid ne zai gatau jham alhab' rere: yu: pye' ako". 15Yao: bam wa khug' nau" jham we' myi:gyoe: gyang" re ci: ra" ug' the" bobo yang: qhang we' ngaui yang kad' ru ja: khao: ngo" re yu: lo" ako". 16Caung:pa" Yham qhid' mae" Sholamon yang kad' to" ra" gyid: zai jham ngad: ra"- Zang baung: shid' zang- lhin" jham we' qid lhao: qi: wa matho' lag ngad: ra". 17Zang baung: shid' zang wa dakhyo: daqi" za: ngad: ako". Zang khao: ngo" daxe: she' daung" daung" myhao mung: aau: mae gyid daung" zang de; ra"- ai wa sam daung" myhao: ra". Ai: gyid: daung" zang khao: ngo" mae gyid: yang kad' to" ra" khaung: shi: bin: myho mung: te' to" ako".
Yuda Byu Qe Babelon Mung" Khyo Pyaung" Jhui" Lo" Qhug' Ko" Ra" Khyo
(Yeremia 52.24-27)
18Ai tho' mago" gye zug: mo" Nebuzaradan wa Khinjaung Yin" Seraia we' yao" o mae" khinjaung Zephani- Caung:pa" Yham mae' akhyag: ra" au: jhaung gatau sam yaug re kyam: byu qekhyo" pyaung" jhui" lo" ra". 19Yao: wa gyetab jham re eib: lo: ra" gye zug: pho" -vomo" mae na: jo, shiko" ra" kho:kham pho" nho: pha,jhi" byid: mo, ngo" yaug gye mau" we' sin: yang: tung" xam: au: jhaung ngad: ra" gye zug: mo" o mae" gye zug: pho" -akhyag: ra" byu khyaug' xe rere: jhui" yu: ra". 20Nebuzaradan wa ai bam re Hamad mug: mae" Ribla vogaung: mae na: ra" Babelon kho:kham pho" jhao" jhui" lo byid' ra". 21Kho:kham pho" wa aimae yao: bam re be, mung: se' pye' ra". Aimung: Yuda byu qe wa yao: bam: mung"dan: mae' pyaung" jhui" lo" ru qhug' ako".
Yuda Mung" Zug: Gedalia.
(Yeremia 40.7-9; 41.1-3)
22Babelon kho:kham Nebugkhaneza wa Shaphan nho: yao: myid:- Ahikam nho: yauggai zo: Gedalia re Yuda mung" mung" zug: kad' nhao mung: Babelon khyo majhui" lo" ra" mo, alhab' nho: au: jhaung kad' nhao: ra". 23Aseim" byid: lo, matau ko" ra" gyezug: qe we' gyezo: qe wa ai: khyo re the' gyo: gelao"- yao: bam wa Mizpa mae Gedalia we' ye qhan" ako". Ai: zug: qe wa- Nethania nho: yauggai zo: Ishmae- Karea nho: yauggai zo: Yohanan- Netopha vogaung: mae" Tanhumed nho: yauggai zo: Seraia we' Maakha mae" Yezania bam ngad: ako". 24Gedalia wa yao: bam re- naonhaung" wa Babelon gye zug: qere magyaug ca" ein: rure ngo naonhaung" re dao: byid: geli"- ce: mung" mae na ge, Babelon kho:kham re caung da" byid: ge,- naonhaung" qhid' mae" pe" maqo" nae"- ga: ta" ra".
25Ngadqere: ai zin lho" nhad' khye' ein: khye' mae Elishama nho: yao: myid:- Nethania nho: yauggai zo: ngad mung: kho:kham yham khaung byu dayaug ngad: ra" Ishmae wa byu daxe yaug we' daga" Mizpa khyo ye: mung: Gedalia re gye yezin: yang: yao: re yese' pye' ra". Yao: wa yao: we' daga" na ko" ra" Israel byu qe we' Babelon byu qere re: se' pye' ako". 26Ai: thao Israel byu alhab'- jo,nho" qo" mo,- myaung sho: mo, alhab' we' gye zug: qe daga" to" mung: Egutu mung" khyo ye" lo" ako". Pe"mung:ga"re yao: bam wa Babelon byu qere gyaug: ako".
Yehoiakhin Re Thaung: Mae" Lhoe' Ke' Ra" Khyo
(Yeremia 52.31-34)
27Evilmerodag Babelon kho:kham boe" lo ra" zin mae yao: wa Yuda kho:kham Yehoiakhin re thaung: mae" lhoe' ke' byid' ra" khyo" yang yao: re nhag' khyag' myid qhu" byid' ra". Ceru wa Yehoiakhin re kyam: byu khyo" taung" lo" thao sam xe: nhad' zin ein: zin lho" daxe: shid' khye' ein: khye' shid' xe: nhad' ba: ba mae boe" ru ngad: ra". 28Evilmerodag wa yao: re nyang" za: kad' mung: Babelon mung" mae pyaung" jhui" nha: to: qhug' ko" ra" kho:kham gaje qe tho' mae nga: yhe' ra" jo, qo re yao: byid' to" ra". 29Aimung: Yehoiakhin wa thaung: mai bau: re tha" pye' nae" akhang" qo" mung: dang: ra" yao" pyad geim" mae kho:kham pho" nho: zozo: jaung: mae zo: nae" akhang" qo" ra". 30Yao: daui: na: ra" myhao"- yao: qo ca" gu: qhid' mae" zokho ba khao: ngo" man: man: qo" yu: ra".
Currently Selected:
2 KHO:KHAM 25: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009