1 KHO:KHAM 2
2
Sholamon Qhid' Mae" Davi Nho: Lo" Thao" Pyang Dao: Jham
1Davi shid: lo" na lao"- yao: wa yao" yauggai zo: Sholamon re khai: yu mung: yao" lo" thao" pyang dao: jham yao: re pyang co' ra". 2Ai: pyang dao: wa ngo shid nae" ayo, joe" va"- lam lam za: qam: qhao: wa, 3Ni" Mao"So Asang: yang nao re kad' nhao: ra" amyin" re kad' wa,- nao khai: khyo ye: ye: nao kad' ra" mau" ja: khao: ngo" dao mae bo vashao:- Moshe tarha" mae tung" to" ru we' dakhyo: yao" tarha" alhab' re we' yao" amyin" dao: alhab' re phug' cao" wa,. 4Nao yao: re phug' cao" ngad: re wa- yao: bam: aung khug nhag' lam: alhab' we' yao" amyin" dao: jham re nyang" za: jhaug' zaug phug' cao" na ko" ra" myhao"- nga" myid:zo: qe wa Israel mung" re qo" eib li" genae"- ga: yao: ngore ta" ra" au: ngore dao:so: byid' to" ra" dao:so: re Asang zaui" pyang" byid' li" nae".
5Gatau daja: wa- Israel gyezug: mo" ngad ko" ra" Nera nho: yauggai zo: Abne we' Yetha nho: yauggai zo: Amasa shid' yaug re se' pye' ra" yaug: Yoab ngore pe" ru: kad' lai: lo: rure nao myid: beim: wa,- yao: shid' yaug gye poe mae kad ko" ra" byu shid: ru qhid' mae" mang: dae yaug yo: ra" ayo, mae lage, phaug' yang: ai: shid' yaug re yao: se' pye' rure nao myid: beim" ra". Yao: wa qobo maqo" ra" byu qere se' pye' mung:- yao: kad' lo: ra" lo, mau" mathao mae ana" ngo wa qo yu mung: ai: qobo dae yug: re- ngo kham zo: ca" ra". 6Khoru: kad' nae" rure nao ba: ra". Nao wa yao: re jo, gyae: tarha" khyo" dashid nhao wa,.
7Ngadqere: Gilead mae" Barzilai nho: yauggai zo: qe re wa nhag' khyag' ru qhu" byid: mung: yao: bam re gun caung byid: wa,- pe"mung:ga"re yao: bam wa ngo ni" mao: Absalom nho: lo, mae" phao: qin" au: ngore nhag' khyag' yu: ako".
8Benyamin mung" Bahurim vogaung: mae" Gera nho: yauggai zo: Shimi re: na: ashi"- yao: wa ngo Mahanaim khyo ye" lo" ra" ba mae ngore dae xo sho' nhang" ra". Ngadqere: Yodan gyaung: mae yao: ngore li" tug: yu: au:- ngo yao: re mase' nae" ein: Asang: mang re lao: yang: ta" ra" nga" dao:so: yao: re ngo byid: va". 9Ngadqere: nao wa yao: re qobo dae mabyid: lo: danhao: ke'- pe" ru: kad' nae" rure nao ba: ra". Yao: re se' pye' rure nao myao ca" ra" ga" ru ngad: ra".
Davi Shid: Ra" Khyo
10Davi wa shid mung: yao" vomo" mae nyhab' pye' ako". 11Yao: wa Israel kho:kham khyo" zin lam byid xe kad' lo: ra"- Hebron mae nhad' zin- Yerusalem mae sam xe: sam zin kad' ra". 12Sholamon wa yao: pho" Davi khug mae kho:kham xo' kad' mung: yao" kho:kham kheim: so' wa gyai tang sho' kad' to" ra".
Adoniya Shid: Ra" Khyo
13Ai: thao yao: myhi" wa Hagi ngad: ra" Adoniya wa Sholamon nho: yao: myhi" Badsheba jhao" ye: mung:- Badsheba wa- nao ba nam zam" khug: ra" khyo" lae" li" i? ga: lham: myid' ra".
Yao: wa ngad: ga: tau" ra".
14Ailao" yao: wa nao re mho' nae" ngo daja: qo"- ga: ta" ra".
Badsheba wa pe" ngad: i? ga: myhid' ra".
15Yao: wa ngo kho:kham boe" ang: ru we' Israel byu qe yaug khao: ngo" airu: myid: lao" na ko" ra" khyo re nao ba: ra". Ngadqere: ai we' shai" yang: boe" lai: lo: ra". Nga" nhaung: wa kho:kham boe" lo: ra". Pe"mung:ga"re ai wa Asang nho: myid o: ru ngad: ra". 16Ana"- ngo mho' nae" daja: qo"- jeju khyo" ngore daha byid: la,-
Badsheba wa ai pe" i? ga: myid' ra".
17Yao: wa jeju khyo" kho:kham Sholamon re Shunem mae" myiqe: nau" Abishag re nga" yham sang myhi" khyo" kad' nhao la, mho' byid: la,- yao: ni" dao: re maha nae" rure ngo ba:- ga: ta" ra".
18Batsheba wa gai: va"- ni" qhid' mae" ngo kho:kham pho" re dao: jhau byid: nae"- ga: ta" ra".
19Aimung: Badsheba wa Adoniya nho: gaung tha" yao: re dao: jhau nae" kho:kham jhao" ye" ra". Kho:kham pho" wa yao: myhi" re au" nae" qhid' mae" to" ye, mung: phug' myao: byid' ra". Ai: thao yao: wa yao" kho:kham tao" mae zaung: ra". Tao" dalam: yu: lo mung: yao" lo, yo shad' mae Badsheba zaung: ra". 20Badsheba wa- ngore myo, nho dajhid' byid: la,- ein: mho' nug: ra". Jeju khyo" ngore daha: pye' la,- ga: ta" ra".
Yao: wa nga" myhi" we"- pe" nam i? ga: myid' mung: ngo wa nao re maha: pye' nae" ga: ta" ra".
21Badsheba wa ni" mao: Adoniya re yao" yham sang myhi" khyo" Abishag re ngho" nhao wa,- ga: tau" ra".
22Kho:kham pho" wa- Abishag yao: re byid: nae" qhid' mae" nao ngore pe"mung: mho: i? Yao" qhid' mae" kho:kham tao" rere: nao gai: mho' ra". Aitho' mago"- yao: wa nga" mao: ngad: mung: khinjaung Abiatha we' Yoab wa yao" shad' mae bo de; ako" ga: tau" ra". 23Ailao"-Sholamon wa Asang mang mae ceru: mho' ru mathao mae Adoniya yao" kao so' re ngo mayu: pye' re wa Mao"So ngore se' pye' vashao:- 24Asang wa nga" pho" Davi nho: kho:kham tao" dao mae ngore tang sho' kad' to" ava". Yao: wa yao" dao:so: re zaui" pyang" mung:- ngo we' nga" myid:zo: qere mung"dan: byid' to" ra". Ana" ceba mae yao: Adoniya shid: li" nae" ein: rure daui: na: ra" Asang mang re lao: yang: ngo jham tang" ra".
25Aimung: kho:kham Sholamon wa Benaia re amyin" byid' ke' mung: yao: wa Adoniya re yese' pye' ra".
Abiatha Re Khe' Thug' Ke' Ru We' Yoab Shid: Ra" Khyo
26Ai: thao kho:kham Sholamon wa khinjaung Abiatha re- ni" yham mug: Anathod khyo lo" wa,- nao shid man" ra" yaug ngad: ra". Ngadqere: ana"- ngo nao re mase' nae"- nao nga" pho" Davi we' daga" na: ra" gyo: mae Asang Dao: Thang" Ban" re au: jhaung kad' yang: vo; lo yang ngad: ra". Amung: yao" qug: khai: alhab' re bomyho" kham zo" lo yaug ngad: ra"- ga: ta" ra". 27Ai: thao Sholamon wa Abiatha re Asang: khinjaung khyo" caung da" byid' rumae" phoe' pye' ra". Airumung: yao: wa Shilo mae khinjaung Eli we' yao" myid:zo: qe dao mae boe" li" nae" khyo we' sin: yang: Asang ta" to" rure kad' pyang" ra".
28Ai: boe" ra" khyo re Yoab the' gyo" ra" (Yao: wa Adoniya re bao" thaug' byid: ra". Ngadqere: Absalom re wa mabao" thaug' byid: ngad: ra".) Aimung: yao: wa Asang qhid' kheim: Zaung khyo phao: ye: mung: phan khyug jham re yezaui" ci: ra". 29Yoab wa Zaung khyo tao" ye: mung: yang: phan nhae mae yena: jo; ra" khyo lau dao: kho:kham Sholamon jhao" joe" lo" ra". Sholamon wa pe"mung: yao: phan khyo phao: ye" ra" khyo re lagyo: nhao yang: myid: nhao: ke' ra". Yoab wa Sholamon re gyaug yang: Asang jhao" phao: ye" ru ngad: ga: tau" ra". Airumung: kho:kham Sholamon wa Benaia re Yoab re se' nae" nhao: ke' ra". 30Benaia wa Asang qhid' kheim: Zaung khyo ye: mung: Yoab re- nao re thug' lo nae" kho:kham amyin" byid' ke' ra"- ga: ta" ra". Yoab wa mathug' lo nae"- ngo cetau shid nae"- ga: tau" ra". Benaia wa kho:kham jhao: dam: lo mung: Yoab ta" rure lota" kyo" ra".
31Sholamon wa Yoab ta" ruru: kad' wa,- yao: re se' pye' mung: nyhab' pye' wa,- ailao"- yao" yang qobo maqo" byu qere se' pye' yang: Yoab kad' lo: ra" lo, mau" qhid' mae" ngo we' Davi nho: myid:zo: gaje qe wa qo mayu ca" lo nae"- 32Asang wa- nga" pho" maba lo: yao: shad' lhoe" lo: ra" byu se' mau" qhid' mae" Yoab re qobo dae byid' li" nae". Yoab wa yao: tho' je: doe, mung: qobo maqo" ra" byu shid' yaug ngad ko" ra" Israel gyezug: pho" Abne we' Yuda gyezug: pho" Amasa re se' pye' ra". 33Ai shid' yaug re se' ra" qobo dae wa Yoab we' yao" myid:zo: qe: dao mae apyad ato mae zao" jo; li" nae". Ngadqere: Asang wa Davi nho: kho:kham tao" khau" mae zaung: jo, ko" ra" Davi nho: myid:zo: qere wa khonhae" re: aung myaug nhao: li" nae"- ga: tau" ra".
34Aimung: Benaia wa Asang qhid' kheim: Zaung khyo ye: mung: Yoab re yese' pye' mung: pa: din" mae" yao" yham mae nyhab' pye' ako". 35Kho:kham wa gyezug: pho" Yoab khug mae Benaia re kad' nhao mung:- khinjaung Abiatha khug mae Zadog re kad' nhao: ra".
Shimi Shid: Ra" Khyo
36Ai: thao kho:kham pho" wa Shimi re byu nhao: ke' yang: yao: re- nao yao" qhid' mae" Yerusalem mae yham dalam li" kad' yang: aimae li" na wa,- vogaung: mae" dathug' wa,- ga: ta" nhao: ke' ra". 37Nao Kidron qid zo: gyaung: lai sho' thug' lo" yang: ngad: re nao wa gaigai: yao: shid li" nae". Amung: nao yao" gaung re nao yao: qobo vhin li" nae".
38Shimi wa- gai va"- Asang kho:kham we"- nao ta" rure ngo kad' nae"- ga: tau" ra". Airumung: yao: wa Yerusalem mae myao" sho' na: jo; ra".
39Ngadqere: sam zin kyo thao re- Shimi nho: jeim shid' yaug wa Gat kho:kham Makha nho: yauggai zo: Akhisha jhao" phao: lo" byaug: ako". Shimi wa ai shid' yaug Gat mae na thoe the' gyo: lao"- 40Yao: wa yao" loze mae do: ke' yang: yao" jeim shid' yaug re qho nae" Gat vogaung: mae" kho:kham Akhisha jhao" ye" lo" ra". Yao: wa ai shid' yaug re yeqho: myao yang yham khyo dam: jhui" lo: ra". 41Shimi pe" kad' rure Sholamon the' gyo: lao"- 42Yao: wa Shimi jhao" byu nhao: ke' yang:- ngo wa nao re Yerusalem mae" mathug' lo" nae" qhid' mae" Asang mang mae lao: yang: ngo nao re dao:so: byid' to" ra". Nao airu: thug' lo" re wa nao dang dang shid nae" ein: ngo nao re ta" peim" to: va". Nao aire myid vang" mung: nga" dao: re mho dao: gyo: nae" ga: nao mata" to: i? 43Aire nao pe"mung: ni" dao: so re phyo' pye' mung: nga" amyin" re pe"mung: maphug' cao" i? 44Nao nga" pho" Davi re shad' to" ra" gu: alhab' re nao nyang" za: ba: ra". Asang wa ai: qhid' mae" nao re qobo dae byid' li" nae". 45Ngadqere: yao: wa ngore shaman" byid: mung: Davi kho:kham mung"dan: re apyad ato mae gug: gam: ru byid' li" nae" ga: ta" nhao: ke' ra".
46Ai: thao kho:kham wa Benaia re amyin" byid' ke' ra". Yao: wa Shimi re yese' pye' ra". Ana"- Sholamon wa bin sho' re qo" eib khang" ci: ava".
Currently Selected:
1 KHO:KHAM 2: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009