Génesis 1
1
Kueraakua
1Uénakuarhu ACHA Kuerap'iri auantechani ka echerini kueraasti. 2Echeri nónanimarueni jáxespti ka pápkjantespti ka ACHA Kuerap'iriri espiritu itsïrhuechari p'arhits'ïkuxapti.
3Ka ACHA Kuerap'iri uantaspti: T'íkjante, ka t'íkjantespti.
4ACHA Kuerap'iri exespti eska t'íkjantekua ampakitispka ka arhutaspti t'íkjantekuani pápkjantekua jinkuni; 5Ka jurhiata jakankurhitaspti t'íkjantekuani ka chúrekua jakankurhitaspti pápkjantekuani ka chúrespti ka eranteni: Ka ísï uénaspti ma jurhiatekueni.
6Ka ACHA Kuerap'iri uantaspti: Parhakpenini ampe kách'akue enka atarhukuaka itsïchani.
7Ka ACHA Kuerap'iri, kueraaspti imani enka parhakpenini kách'akuni jápka; ka itsïchani arhukuspti ma karhakua péraspti ka máteruni kétsekua péraspti. Ka ísï úkorhespti. 8Ka kách'akuani auanta jakankurhitaspti. Ka chúrespti ka erantespti: Ka ísï janhaskorhespti tsimani jurhiatekua.
9Ka ACHA Kuerap'iri uantaspti: Eska márku úkorhentaaka itsïcha enka auantarhu kétsekua jaka ka eska k'arhintekua xarhanteaka. Ka ísï úkorhespti.
10Ka ACHA Kuerap'iri karhintekuani echeri jakankurhitaspti, ka itsïchani enka márku úkorhentapka k'éri japunta jakankurhitaspti; ka ACHA Kuerap'iri exespti eska sési jarhaspka.
11ACHA Kuerap'iri uantaspti: Eska echerirhu jauaka iámentu jasï uitsakuecha: Enka tsïuaaka ka amanhechakuecheri anhatapu enkaksï tsikipu jatarhaaka. Ka ísï úkorhespti. 12Ka echerirhu iámentu jasï ampe tsikispti, ka ACHA Kuerap'iri exespti eska sési jarhaspka. 13Ka ísï chúrespti ka eranteni tanimu jurhia jamani.
14ACHA Kuerap'iri uantaspti: Eska jauaka erak'ukuecha auantarhu enka arhukuaka jurhiatekuani chúrekua jinkuni ka eska marhuauaka janhaskanhani na enka jatini tsíri jats'ikueka ka na enka jatini p'ikuntskueka ka ampe enka jurhiateka ka ampe enka uéxurhinika.
15¡Eskaksï erak'ukueni marhuauaka jima enka parhakpenini kách'akuni jaka ka eska parhakpeni t'íntskaraaka! Ka ísï úkorhespti.
16ACHA Kuerap'iri tsimani k'érati erak'ukuechani kueraaspti; imani enka sánteru k'éka jurhiatekuani míntasti eska juramupirinka, ka enka sánteru sapichueka chúrekuani míntasti eska juramupirinka chúrekua. Ístu kueraasti jóskuechani. 17Ka ACHA Kuerap'iri auantarhu péraaspti eskaksï parhakpenirhu t'íntskarapirinka, 18ka eska ma, jurhiakua juramupirinka ka máteru chúrekua ka eska arhukupirinka chúrekua jurhiatekua jinkuni. Ka ACHA Kuerap'iri exespti eska sési jarhaspka. 19Ka chúrespti ka erantespti t'ámu jurhia jamani.
20ACHA Kuerap'iri uantaspti: Eska itsïrhu jatameaka mámaru járhati manakorhericha ka eskaksï káraticha káraaka ka eskaksï iótakuarhu tarharhaaka ka nóksï uéncheraani. Ka ísï úkorhespti.
21ACHA Kuerap'iri, kueraaspti k'érati itsïrhu anapu manakorherichani, ka manakorheri korokorherichani enkaksï ítsïrhu jámka ka p'araskua jukarichani; ka ACHA Kuerap'iri exespti eska sési jarhaspka. 22Ka ACHA Kuerap'iri úch'akuraaspti uantaparini: ¡Uánekua p'itarhpera je, uáne je! Ka ¡Uinime je japuntarhu! Ka ¡Eskaksï káratichat'u uáneaka echerirhu!
23Ka chúrespti ka eranteni. Ka ísï úkorhespti iúmu jurhia jamani.
24ACHA Kuerap'iri uantaspti: ¡Eska echeri kuerauaka manakorherichani: Ikimenharhichani ka no ikimenharhichani, ka akuitsechani ka mámaru jarhati manakorherichani! Ka ísï úkorhespti.
25Ka ACHA Kuerap'iri, kueraaspti manakorherichani, máru ikimenharhichani ka no ikimenharhichani, táchani jarhati. Ka ACHA Kuerap'iri exespti eska sési jarhaspka.
26Ka ACHA Kuerap'iri uantaspti: Iásïchi k'uiripuni kuerauaka, mák'uenichi ják'uaka eskachi na jáxeka ka eska parhakpenirhu juramuaka, eska juramukuaka iámentu manakorherichani enkaksï ítsïrhu jatameka ka karatichani enkaksï auantarhu jámka ka iámentu jarhati manakorherichani enkaksï echerirhu jámka.
27ACHA Kuerap'iri, kueraasti k'uiripuni eska ima na jáxeka,
tatakani ka nanakani Acha Kuerap'irini ják'usti.
28Ka ACHA Kuerap'iri úch'akuraaspti ka arhiaspti:
¡Uánekua sapichani kaa je, uáne je
ka uiniata je parhakpeni ka juramu je!
Juramukua je iámentu jásï manakorheri itsïrhu anapuechani
enkaksï japuntarhu jampka,
ka ístu káratichani enkaksï iótakuarhu tarharak'a
ka iámentu manakorherichani enkaksï echerirhu jámka.
29ACHA Kuerap'iri uantaspti: ¡Exe je! Iámentu ampeksïni tsikiracheska enka tsïuatakueka ka ístu iámentu jásï anhatapuechani enkaksï amanhech'akua jukak'a ka enka tsikipu jatarhaka; iámentu íni ampe marhuata je arhani. 30Ka iámentu manakorhericha echerirhu anapu enkaksï uitsakua t'irek'a. Ka ísï úkorhespti.
31ACHA Kuerap'iri exespti iámentu ampe enka xáni ampe kueraaka, ka iámentu ampe kánekua sési jarhaspti. Ka chúrespti ka ménteru erantespti. Ka ísï janhaskorhespti kuímu jurhiatekua.
Currently Selected:
Génesis 1: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.