2 कुरिन्थि 5
5
आपाआ होरगाआ कोओ
1काहाके आमाहा मालुम होय का जांहा आमा पृथ्वी पोर्यो मंडपा सार्खू कोअ पोडित जाय ताहा आमाहा परमेश्वारापो रोत होर्गाम एक एहलो कोअ मिले जे आथोवाही बोनाविल्यो नाहा पण कायमस्वरूपी होय. 2यामे ताहा आमू कोईओलो अने इच्छा कोअत्लू आपाआ होर्गाआ कोओहो पेईत लेअलो 3की याहा पेईत आपू उगडाला नि रोजे. 4अने आमू आव मंडपा मेहेरोत ओयताहा दाबावु दाबीन कण्हत रोतलू काहाके आमू काडीलो नाहा पोन पेअहू कोईलो मागोहो तो जो देनारो होय जीवनामे बुडीत जाअलो. 5जीआ आमाहा आव गोठी साठीच बोनाडहि होय तो परमेश्वर जीआ आमाहा आत्मा भी आप्यू होय. 6म्हणजे आमाहा हरेक टेमे हिमंत तोईत रोतलू अने ओ मालुम होय का जोपोरोत आमाहा डीलोम रोतलू तोपोरोत प्रभूपासून अलग होय 7काहाके आमू चेहरू देखित नाहा पोन विश्वासा सी सालताहा 8त्यापोत आमू हिमंत तोईत रोतलू अने डीलोवांही अलग ओतगोयु प्रभू आरी रोहिलो फासी हाजो होमजीत्लू.
मसीहोओ न्याय आसन
9यामुळे आमा मोनाआ शोख होय एज होय का जेबी आरी रोल्या पण आमाहा तियाहा गोमेहे रोंहु जोवे. 10काहाके ओ जरुरी होय का आपु आखाआ वागणुक ख्रिस्ताच्या न्यायाआ आसन आगोज उगाडीत जाहू जोवे म्हणजे हर एक माहहू आप आपाआ हाजा-हाजा वाईट कामा प्रतिफोल जो तियाहा डिलोपरोत कोअयु होय मीलनारो.
परमेश्वरो सी मेल-मिलापोओ सेवा
11त्यापोत प्रभूऊ बिक मानित आमू मांहोहो समजाडत्ला, पण परमेश्वरोओ आमाआं वागणुक उघड होय अने माहु आशा होय का तुमाआ विवेक पण उघड उवे होय. 12आमू तेबी पोन आमाआं प्रशंसा तुमा आगाडी कोईत नाहा पण आमाहा आपा विषयी खत कोअला संधी आपोहो का तुमु तियाहा उत्तर आपुहू सेकेहे? तुमामे काजे मोन कायनय पण देखानारो गोठीपो खत कोअता. 13जर आमू बेशुद्ध होय ताहा ओ परमेश्वरा कोअता अने जर शुद्धीपो होय ताहा ते तुमा कोअता. 14काहाके ख्रिस्ताचे प्रेम आमाहा विवेश कोईत आपोहो का त्यापोत आमाहा ओ होमजीत्लू का जर एक आखा आरी मोल्यु ताहा आखे मोअये. 15अने ते यावाही आखे आरी मोल्यु का जो जिवंत होय ते आगाडी आपाहा जिवंत उवूंहू नाहा पण त्याकोअता जो त्यांकोअता मोल्यु अने फासी जिवंत ओवयू.
मसीह मेहे नवली सृष्टि
16यामुळे अमेरोत आमाहा कोडोबी डीलो प्रमाणे होमजुत्लू नाहा म्हणजे आमू ख्रिस्ताहा पण डिलो प्रमाणे होमज्ये ओते तेबी पोन अमेरोत तियाहा एहलो होमजुत्लू नाहा. 17त्यापोत जर कोडु ख्रिस्तात होय ताहा तो नोवो जग होय जुनो गोठी निहित गोयी होय, पाला, आखे गोठी नवो ओवल्यु होय. 18आव आखे गोठी परमेश्वारापो रोत होय तिये ख्रिस्ताद्वारे आपाआरी मेलमिलाप कोईत लेदो अने मेल मिलापोओ सेवा आपाआ आथोमेहे आपित आप्यी. 19म्हणजे परमेश्वराने ख्रिस्तात रोत आपाआरी जगाआ मेलमिलाप कोईत लेदो अने तियाआ अपराधाआ दोष तियापो लागाड्यू नाहा अने तिये मेलमिलापाचे वचन आमाहा होपे आप्लु होय. 20त्यापोत आमाहा ख्रिस्ताचे राजदूत होय जेहेकाय परमेश्वर आमा त्यापोरत विनंती कोईत होय आमाहा ख्रिस्ताकडून आमंत्रण कोअत्लू का परमेश्वरा बरोबर मेल मेलनु कोईत ल्या. 21जो पापीही रोतेहे अनोळखाती नाहा ओतु, तीयाहा तिये आमा कोअता पापी ठेरव्यो का आमाहा तीयाम ओत परमेश्वरोओ धार्मिकता बोनाळीलो.
Currently Selected:
2 कुरिन्थि 5: NOINT
Highlight
Share
Copy
Want to have your highlights saved across all your devices? Sign up or sign in
Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.