KUAN-KUANEN 3
3
Ajaren man anak perana
1Ndigan pe ola ilupakenndu kai si kuajarken man bandu o anakku. Ingetlah lalap kai si kukataken man bandu. 2Ajarku bandu erbahanca gedang umurndu janah senang geluhndu. 3Tetaplah kam erkemalangen man Dibata janah bujurlah perbahanenndu man kerina manusia. Burakenlah e i bas kerahungndu dingen suratken i bas pusuhndu. 4Adi bage perbahanenndu subuk Dibata bage pe manusia ngena atena ngenehen kam. #Luk 2:52
5Ernalemlah man Dibata alu bulat ukurndu. Ndigan pe ola ernalem man pemetehndu jine. 6Ingetlah Dibata i bas kerina si idahikenndu e maka IA si nuduhken dalan si payo man bandu. 7Ola iakapndu pentar kam lebih asa patutna; erkemalangenlah man Dibata janah ola kam nggit ngelakoken si jahat. #Rom 12:16 8Adi bage pengelakondu, perbahanenndu e desken tambar si pepalem penakit ras si mesuindu. 9Mehamatlah man TUHAN alu mpersembahken ulih jumandu si mehulina kal man baNa. 10Adi bage perbahanenndu la banci lang dem lumbungndu alu gandum dingen lau anggurndu sampur, seh maka lanai siat ingan munikenca pe.
11Kune kam iajarken TUHAN, o anakku, perdiatekenlah e, janah bahanlah e jadi sada persinget. #Jop 5:17 #Heb 12:5-6 12Iukum TUHAN kap kalak si ikelengiNa, bali ras bapa ngukum anak buah atena. #Ket 3:19 13Sangap kal kalak si ndatken kepentaren, e me kalak si ndatken pengertin. 14Untungna belinen asangken pirak, janah ergan kap e asangken emas. 15Ergan kap kepentaren asangken permata; bicara kerina pe si isurandu ipersada la kap terpeseri ras kepentaren e. 16Kepentaren kap si mereken man bandu umur si gedang, bage pe kebayaken ras kehamaten. 17Kepentaren kap si erbahanca senang geluhndu, janah si mabai kam arah dalan dame. 18Kalak pentar kap kalak sangap. Kepentaren si mereken kegeluhen man bana.
19 TUHAN njadiken doni enda alu kepentarenNa,
alu kebeluhenNa itamakenNa langit i bas inganna.
20Alu pemetehNa ibahanNa maler lau belin,
bage me embun si mereken udan ku doni enda.
21Erkiteken si e o anakku, ola kal sirangi kepentaren ras pemeteh! Ola pulahi pe. 22E kap si mereken kegeluhen, kegeluhen si senang dingen dame man bandu. 23La kam biar-biaren erdalan janah la terantuk pe. 24Tupung tunduh la kam mbiar janah badeh pertunduhndu gedang-gedang berngi. 25La pada aru atendu kerna kebiaren si rempet rehna, desken galumbang si rempet ngombakken kalak jahat. 26TUHAN si njagai kam, la ipelepasna kam jertuh kena siding.
27Asa bancina, bahanlah mehuli man kerina kalak si perlu penampatndu. 28Ola suruh temanndu nimai seh pagi, adi banci nge isampatindu ia genduari. 29Ola isurakenndu erbahan jahat nandangi temanndu si balengen; ia ringan ideherndu janah tek ia man bandu. 30Ola erjengil la ersebap ras kalak si la pernah erbahan ceda man bandu. 31Ola mecimberu man kalak si erbahan la bujur, janah ola usih pe perbahanenna, 32sabap TUHAN ernembeh ate man kalak si erbahan jahat, tapi ibahanNa bujur man kalak si ndalanken si ngena ateNa. 33TUHAN masu-masu rumah kalak benar tapi isumpahiNa rumah kalak jahat. 34Kalak si meganjang rukur, juru me i ban TUHAN, tapi melias IA man kalak si meteruk rukur. #Jak 4:6; 1Pet 5:5 35Kalak pentar ertambah-tambah kap gelarna merim, tapi kalak bodoh ertambah-tambah si erbahanca iakapna mela.
Currently Selected:
KUAN-KUANEN 3: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.