KUAN-KUANEN 4
4
1O anakku, begikenlah ajar nande bapandu! Megermetlah, gelah mbages pengertinndu. 2Si kuajarken man bandu e mehuli kal, e maka inget-ingetlah kerina. 3Aku anak sada-sada i bas nandengku; tupung aku kitik denga, 4iajarken bapangku aku nina, “Ingetlah kai katangku man bandu, ola lupa. Lakokenlah sentudu ras si kukataken man bandu maka kam nggeluh. 5Jadilah pentar janah pebagesi pengertinndu. Ola kam lupa, ola kam nilah i bas kai si kukataken.” 6Ola tadingken kepentaren maka kam ikawalina; kelengilah kepentaren maka kam ijagaina. 7Si pentingna si la banci lang ilakokenndu e me kap ndatken kepentaren. Kai pe atendu jadi perayakenndu, tapi si la banci langna kal si arus iayakindu e me pengertin. 8Kelengilah kepentaren, maka kam iangkatkenna. Ergailah kepentaren maka kam ipehagana. 9Iberekenna me man bandu rudang-rudang si mejile, janah itamakenna ku takalndu mahkota si mehaga.
10Begikenlah aku o anakku. Tutuslah atendu megiken kai si ku kataken man bandu maka gedang umurndu. 11Enggo kuajarken man bandu kepentaren dingen dalan kegeluhen si payo. 12Adi nggeluh i bas kepentaren, la kam dat alangen adi kam erdalan; la kam tertuktuk adi kam kiam. 13Ingetlah lalap kai si enggo ipelajarindu. Jagai lalap, sabap e kap kegeluhenndu. 14Ola kam lawes kempak perlawes kalak jahat. Perbahanenna pe ola kal usih. 15Tulak janah sirangilah si jahat; ola nilah, tapi pinterkenlah perdalanndu. 16Kalak jahat la tertunduh adi langa erbahan jahat. Langa madat matana adi langa ncilakaken kalak. 17Kejahaten ras kekejamen desken pangan ras inemen kap man kalak enda.
18Dalan si idalani kalak bujur seumpama matawari pultak erpagi-pagi, lalap reh terangna seh pantek ciger. 19Tapi dalan si nidalani kalak jahat bali kap ras berngi si gelap, jongkang ia tapi la ietehna kai si mahanca.
20O, anakku megermetlah, dengkehken rananku. Begiken kai si kukataken. 21Ola pelepas rananku sirang ras kam, ingetlah katawari pe dingen bunikenlah i bas pusuhndu. 22Man kalak si ngantusisa datca kegeluhen dingen kejuah-juahen. 23Manjar-anjar kam rukur, sabap perukurenndu kap si mabai dalan kegeluhenndu. 24Ola ndigan pe belasken kata la tuhu; pedauhlah i bas kam nari kata guak dingen ranan si mahanca kalak papak. 25Teridah min arah matandu sinalsal kinibujuren ukurndu; tatap ku lebe alu la pada mela-mela. 26Ukurkenlah mbages-mbages ope denga idalankenndu maka kai pe si ilakokenndu tuhu mehuli jadina. #Heb 12:13 27Sada jingkang pe ola kam nilah i bas dalan si benar nari.
Currently Selected:
KUAN-KUANEN 4: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.