KUAN-KUANEN 21
21
1 TUHAN si ngaturken perukuren raja,
e maka ratur bagi raturna perpaler lau maler.
2Iakapndu payo kerina perbahanenndu,
tapi ingetlah, maka TUHAN nimbang perukurenndu.
3Bahanlah kai si adil dingen benar,
senangen iakap TUHAN e asangken maba persembahen man baNa.
4Kalak jahat e perdosa,
sabap ia ikuasai ukur meganjang dingen megombang.
5Rencana si megermet maba keuntungen,
perbahanen si merudu-rudu mereken kerugin.
6Kebayaken si ialoken alu la bujur,
meter bene janah ibabaina kalak ku kubur.
7Kalak jahat tersiksa erkiteken kekejamenna jine,
perbahan itulakna ngelakoken perbahanen si bujur.
8Kalak ersalah dalanna reluk-eluk,
kalak bujur ilakokenna kai si bujur.
9Ulin ringan i bas suki tarum rumah,
asangken sada rumah ras ndehara si pet erjengil.
10Kalak jahat merincuh lalap erbahan si jahat,
nandangi ise pe labo atena mekuah.
11Adi kalak megombang iukum, kalak si langa erpengalamen ndatken pengalamen.
Adi kalak pentar iajarken, datca pemeteh.
12Dibata kap ngenca bujur,
ietehNa kai si jadi i bas rumah kalak jahat.
IA kap si nombangken kalak jahat maka kernep.
13Ise la nggit ndengkehken penderkuh kalak musil,
ia pe la ibegiken tupung ia jine mindo penampat.
14Guna pesinik rawa ras tembeh kalak,
berekenlah pemere alu sinik-sinik.
15Meriah ukur kalak bujur, adi keadilen idalanken;
tapi kalak jahat erndele ate.
16Kalak si la nggit ngikuti kegeluhen si mehuli,
tentu ia ngadi i bas kematen.
17Kalak si meriah-meriah ngenca atena,
tetap ia i bas kekurangen;
kalak si pesta-pesta akapna nggerak,
labo banci jadi bayak.
18Kalak jahat erbahan rencana gelah mesui ate kalak bujur,
tapi kalak jahat e nge dungna cilaka.
19Madin tading i gurun pasir,
asangken tading ras ndehara si perjengil ras perdegil.
20Kalak pentar tetap bayak dingen nggeluh i bas kemewahen
tapi kalak bodoh ikerikenna duit si mbaru ialoken.
21Adi kam kalak mehuli dingen bujur,
gedang me umurndu.
Mehamat kalak man bandu,
ibahanna si adil man bandu.
22Panglima si cerdik ngasup ngerebut kuta si ijaga kalak si mbisa,
dingen ngeruntuhken benteng-benteng penalemenna.
23Adi atendu isilahi kiniseran,
manjar-anjar melasken kata.
24Kalak si megombang dingen meganjang rukur,
nggit mandangi dingen jago akapna bana.
25Kalak malas mekisat erdahin,
e me sabapna mesui atena lalap.
26Gedang-gedang wari si iukurkenna,
kerina si merincuh ia ndatkenca.
Tapi kalak bujur nggit mere alu melumbar.
27La ngena ate TUHAN adi kalak jahat mpersembahken persembahen,
terlebih adi persembahen e ipersembahken alu ukur jahat.
28Kasa kai si perguak la terteki,
tapi ranan kalak si meteh perkara e banci ialoken.
29Kalak bujur lit kepercayan dirina,
kalak jahat terpaksa pekulah-kulah.
30Adi TUHAN si ngelawan kam, la lit si banci nampati kam,
sia-sia kap kebeluhen, kecerdiken dingen kepentarenndu.
31Aminna ertempur alu perlengkapen kuda perang,
tapi TUHAN kap si netapken ise menang.
Currently Selected:
KUAN-KUANEN 21: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.