KUAN-KUANEN 12
12
1Kalak si erngena ate man pemeteh mesikel ia ituriken kesalahenna,
kalak lenge la ngena atena ipandang.
2Kalak bujur keleng ate TUHAN
tapi si jahat sura-surana, nembeh ateNa.
3Kalak jahat labo lalap ia sikap,
tapi kalak bujur tetap me ia paguh.
4Ndehara si mehuli, ia kap kemulian ras keriahen perbulangenna,
tapi ndehara si njuruken bali kap ia ras penakit kangker.
5Kalak bujur, perbahanenna pe bujur man kalak,
tapi kalak jahat, nipu kalak ngenca sura-surana.
6Ranan kalak jahat munuh me,
tapi cakap kalak bujur ngkelini kap.
7Kalak jahat tombang me, janah masap me kesusurenna,
tapi kesusuren kalak bujur tetap kap lit.
8Kalak si erpemeteh ipujiken me,
tapi kalak motu iisakken pe.
9Madin ngemo ndatken nakan,
asangken erlagak jadi si mbelin tapi la man.
10Kalak bujur, ikelengina kap biri-birina,
tapi kalak jahat, isiksana asuh-asuhenna.
11Perjuma si erbintuas, dem kap lumbungna,
tapi motu kap kalak si muang wari-wari guna si sea-sea.
12Kalak jahat lalap jahat sura-surana,
tapi kalak bujur desken tembok si paguh.
13Kalak jahat isidingi kata si ibelaskenna,
tapi kalak bujur pulah i bas kiniseran nari.
14Manusia ndatken upah sue ras kai si ibelaskenna ras kai si ibahanna,
idatsa me kai si patut ialokenna.
15Kalak lenge tetap benar iakapna bana,
kalak pentar nggit megiken ajar.
16Kalak bodoh minter teridah menek atena,
tapi kalak si lit ukurna la megelut kune ia ipandang.
17Alu melasken kata tuhu, kalak enggo encidahken keadilen,
alu melasken kata guak, kalak enggo peturah si la adil.
18Ranan si la erpepah banci ngelukai ukur kalak desken pedang,
tapi kepentaren desken tambar si pepalemken.
19Ranan la tuhu kentisik ngenca umurna,
tapi kata tuhu tahan asa lalap.
20Kalak si ersura-sura jahat, itipuna kap dirina jine,
tapi kalak si mehuli sura-surana jumpa keriahen.
21Kalak bujur la jumpa cilaka,
tapi kalak jahat lalap lit i bas kesusahen.
22La ngena ate TUHAN man kalak perguak,
tapi ngena ateNa man kalak si engkunduli cakapna.
23Kalak si beluh rukur la encidah-cidahken kebeluhenna,
tapi si lenge ermomo ia kerna kemotunna.
24Kejingkaten erbahanca kalak ndatken kuasa,
tapi kemalasen erbahanca kalak jadi suruh-suruhen.
25Aru ate erbahanca keriahen lesap,
tapi ranan mehuli erbahanca ate malem.
26Kalak bujur jadi penegu-negu man temanna,
tapi dalan kalak jahat mabai ia jadi papak.
27Kalak malas la pernah seh sura-surana,
tapi kalak si erdahin alu tutus ndatken untung si mbelin.
28Kalak si erdalan i bas kinibujuren, nggeluh me,
si ngikutken dalan kejahaten, kematen me perayakenna.
Currently Selected:
KUAN-KUANEN 12: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.