KUAN-KUANEN 13
13
1Anak si pentar ipergermetkenna adi bapana mereken ajar,
tapi kalak si meganjang rukur la nggit ngaku salah.
2Kalak bujur ndat upah i bas kai si ikatakenna,
kalak si la bujur nembeh atena si mehuli.
3Si njagai pengeranana terkawal me;
si pet ngerana la erpepah encedaken dirina jine.
4Kalak malas melala sura-surana tapi sada pe labo seh,
si erdahin erbintuas sura-surana seh kerina.
5Kalak bujur ciga atena kata guak,
tapi kata-kata kalak jahat njuruken dingen erbahan iakapna mela.
6Kinibujuren ngkawali kalak bujur,
kejahaten mahanca kalak perdosa guling.
7Lit kalak pekulah-kulahna ia bayak, tapi situhuna kadena pe labo lit,
lit kalak si pekulah-kulahna ia musil, tapi bayak kal kepe ia.
8Kalak bayak nggalar lako engkawali kesahna,
tapi kalak musil la lit ise pe si ngancamsa.
9Kalak bujur desken sinalsal si harhar,
kalak jahat bali kap ras lampu si milep-ilep.
10Adi meganjang rukur erbahanca susah nge,
e maka madin nge mindo pengajaren.
11Adi melukah iakap ndatken kebayaken, melukah kang lesap,
tapi ertambah-tambah kap erta si ipepulung alu susah dingen mesera.
12Kune pengarapen enggo bene, pusuh pe getem,
tapi adi seh lah sura-sura, ukur pe meriah.
13Kalak si la nggit ngaloken pedah ikenai kesusahen me ia,
tapi kalak si ngikutken ajar dat upah kap.
14Pengajaren kalak pentar desken sumbul kegeluhen kap,
ia si nampati kam gelah pulah i bas kiniseran nari.
15Kalak si lit ukurna terpuji me,
tapi si la terteki meneken bana me.
16Adi iukuri lebe maka ibelas e pentar kap,
kalak lenge imomokenna kebodohenna.
17Persuruhen si jahat ukurna peturah perubaten,
persuruhen si terteki mereken kedamen.
18Musil ras uru-uru sikerajangen kalak si la megiken ajar,
kalak si nggit iajarken ndatken kehamaten.
19Andiko ulina adi seh sura-sura,
kalak bodoh labo nggit nundalken kejahaten.
20Adi kam erteman ras kalak pentar kam pe ikut jadi pentar,
tapi adi kalak bodoh temanindu, kam pe ikut jadi bodoh.
21Si perdosa gelgel ielis-elis kiniseran,
tapi kalak bujur kiniulin kap upahna.
22Kalak bujur itadingkenna kebayakenna man anak kempuna,
tapi kebayaken kalak jahat kempak kalak bujur perlawesna.
23Juma si itadingken banci mereken asil guna nakan man si musil-musil,
tapi kalak si la bujur ipelepasna jine e terulang.
24Si la ngeligas anakna la kap atena keleng anakna,
adi keleng atendu, ola kam alang-alangen ngukumsa.
25Kalak bujur gelgel bias nakanna,
tapi kalak jahat lalap kekurangen.
Currently Selected:
KUAN-KUANEN 13: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.