MIHA 1
1
1Tupung paksa Jotam, Ahas, ras Hiskia jadi raja-raja Juda, reh kata TUHAN man Miha; anak kuta Moreset. Man bana arah pengenehenen ipetangkas TUHAN kerina perkara-perkara kerna Samaria ras Jerusalem. #2Raj 15:32-38; 16:1-20; 18:1–20:21; 2Kro 27:1-7; 28:1-27; 29:1–32:33
Nabi erceda ate erkiteken Samaria ras Jerusalem
2Begikenlah, o kerina bangsa-bangsa,
dengkehkenlah, o doni ras kerina isina.
TUHAN si Erdolat jadi saksi ngelawan kam kerina.
Begiken! Ia ngerana i bas rumahNa si badia nari i Surga.
3Nehenlah, reh me TUHAN i bas inganNa nari;
nusur Ia, jenari erdalan i babo deleng-deleng i doni.
4Deleng-deleng melebur iperjatNa,
bali ras lilin idiang api si gara.
Maler ku baluren-baluren,
bali ras lau maler arah rebe-reben.
5Kerina si enda jadi erkiteken bangsa Israel enggo erdosa dingen ilawanNa Dibata. Ise mabaisa maka Israel ngelawan Dibata? Ma Samaria kin? Ise mabaisa maka Juda erdosa? Ma Jerusalem kin? 6Erkiteken si e nina TUHAN, “Kuruntuhken me Samaria jadi gun-gunen batu i tengah mbalmbal, jadi sada ingan nuanken anggur. Batu kuta e Kugulangken ku bas baluren, dingen palas kuta e Kubongkar kerina. 7Kerina sembah-sembahenna si meherga Kuripukken, kasa kai barang-barang si ibereken man diberu perlua-lua i bas rumah pertoton ikernepken alu api, janah kerina gana-ganana ibahan jadi gun-gunen batu si terulang. Sabap Samaria ndatken barang-barang enda ndai kerina i bas upah perlua-lua nari, e maka iangkut musuh-musuhna me si e kerina jadi upah perlua-lua ka.”
8Kenca bage nina Miha, “Erkite-kiteken si e ceda ateku iherku ngandung. Guna encidahken ateku ceda, erdalan aku alu nahe ras daging manjang-anjang. Erbaung aku desken serigala, dingen nderkuh bagi perik unta. 9Luka Samaria lanai terpepalem, janah Juda pe bage ka; kecedan enggo seh i bas pintu gerbang Jerusalem, ingan bangsangku.”
Musuh ndeheri Jerusalem
10Ola turiken man musuh-musuh kami i Gat kerna ketalun kami; ola pelepas idahna kam tangis. O anak kuta Bet-Leapra, guling-gulinglah bandu i abu taneh! 11O anak kuta Sapir, laweskenlah ku pembuangen manjang-anjang, tuhu mela kal akapndu. Kalak si ringan i Saanan, la pang ndarat i bas kuta e nari. Adi ibegindu anak kuta Bet-Esel ngandung, ietehndu me maka i je la lit ingan cebuni. 12Anak kuta Marot nima-nima penampat alu ate aru, erkiteken TUHAN enggo maba cilaka ku pintu gerbang Jerusalem. 13O kam si ringan i Lahis, pasanglah kuda ku gereta perang. Iusih-usihndu dosa-dosa Israel, janah erkiteken si e erdosa ibahanndu Jerusalem. 14Genduari, o kalak Juda, bahanlah persirang-sirangen ras kuta Moreset Gat. Raja-raja Israel labo dat penampat i bas kuta Aksip nari.
15O anak kuta Maresa, iendesken TUHAN me kam kempak musuhndu, si reh engkuasai kutandu. Peminpin-peminpin Israel si mulia, lawes me cebuni i bas gua Adullam. 16O kalak Juda, cukurlah bukndu seh takal tabu, perban ceda atendu kerna anak-anak si ikelengindu. Melinang bahan takalndu bali ras takal perik nasar, sabap ibuat me anak-anakndu i bas kam nari ku pembuangen.
Currently Selected:
MIHA 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.