PERBAHANEN RASUL-RASUL 1
1
Kerehen Kesah Si Badia ipadanken Dibata
1Teopilus si ihamati.
I bas kitapku si pemena enggo kusuratken kerna kerina si ibahan Jesus ras si iajarkenNa, tangtangna nari, #Luk 1:1-4 2seh ku warina IA iangkat ku Surga. Ope denga IA iangkat ku Surga, i bas kuasa Kesah Si Badia iberekenNa pedah-pedah man kalak si enggo ipilihNa jadi rasul-rasulNa. 3Empat puluh wari dekahna kenca kematenNa, icidah-cidahkenNa baNa man rasul-rasul e alu erbage-bage cara guna mbuktiken maka IA nggeluh. Tangkas idah rasul-rasul e Jesus, janah ngerana IA ras rasul-rasul e kerina kerna Kinirajan Dibata. 4Sekali asum Jesus pulung ras rasul-rasul e iberekenNa perentah man rasul-rasul e nina, “Ola tadingken kuta Jerusalem tapi timailah pemere si enggo ipadanken BapangKu, sue ras si enggo Kukataken man bandu. #Luk 24:49 5Johanes mperidiken alu lau, tapi piga-piga wari nari kam iperidiken alu Kesah Si Badia.” #Mat 3:11; Mrk 1:8; Luk 3:16; Joh 1:33
Jesus iangkat ku Surga
6Asum rasul-rasul pulung ka ras Jesus, isungkunna Jesus nina, “O Tuhan, genduari kin atendu manteki kerajan Israel mulihi?”
7Erjabap Jesus man rasul-rasul nina, “Kerna si e BapangKu metehsa; la perlu ietehndu ntah ndigan jadi. 8Tapi ialokenndu pagi gegeh asum Kesah Si Badia seh man bandu. Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda.” #Mat 28:19; Mrk 16:15; Luk 24:47-48 9Kenca ikatakenNa si e iangkat IA ku Surga i lebe-lebe rasul e nari, jenari lit embun ngeligeni IA erbahanca lanai IA idah rasul-rasul e. #Mrk 16:19; Luk 24:50-51
10Asum rasul-rasul e natap denga ku langit, kempak Jesus si enggo lawes e, rempet tedis dua kalak dilaki i deherna, uisna mbentar. 11Nina man rasul-rasul e, “O kalak Galilea, ngkai maka kam tedis natap ku langit? Bagi enggo idahndu Jesus iangkat ku Surga, bage ka IA pagin reh mulihken.”
Matias ipilih nggantiken Judas Iskariot
12Kenca bage mulih rasul-rasul e i Uruk Seton nari ku Jerusalem. Uruk e dauhna kira-kira sada setengah kilometer i Jerusalem nari. 13Kenca seh i Jerusalem, lawes ia ku loteng rumah inganna numpang. Kalak enda e me: Petrus ras Johanes, Jakup ras Andreas, Pilipus ras Tomas, Bartolomeus ras Matius, Jakup anak Alpeus, Simon Pejuang ras Judas anak Jakup. #Mat 10:2-4; Mrk 3:16-19; Luk 6:14-16 14Tutus atena kerina ras-ras ertoto, ikut pe diberu, bage pe Maria nande Jesus ras senina-senina Jesus.
15I bas sada wari pulung ka ia kerina, teremna lit seratus dua puluh kalak. Asum e tedis Petrus jenari ngerana ia nina, 16“Turang ras senina, arus me jadi kai si isuratken i bas Pustaka Si Badia sue ras si ikataken Kesah Si Badia arah Daud kerna Judas si maba kalak nangkap Jesus. 17Judas sekalak anggota terpukta, erkiteken ia pe enggo ipilih Jesus guna muat bagin i bas dahin enda.”
(18Alu duit si idat Judas arah perbahanenna si jahat itukurna sada lambar taneh. I je me ia ndabuh seh mate. Beltekna mburtas ndaraten tukana. #Mat 27:3-8 19Kerina anak kuta Jerusalem meteh kerna si e. E maka i bas cakapna taneh e igelarina “Akeldama” ertina Taneh Dareh.)
20“Sabap lit tersurat i bas Kitap Masmur,
‘Terulang min rumahna,
olanai min lit si ngianisa’.
Lit ka pe tersurat,
‘Igantiken kalak si deban min jabatenna.’ #Msm 69:26; 109:8
21Erkiteken si e maka arus itambahi sekalak nari teman kami jadi saksi maka Tuhan Jesus enggo keke i bas si mate nari. Si ipilih e arus pe si rusur ngikut Jesus asum IA erdalan-dalan ras kita. 22E me mulai i bas paksa Johanes ndilo kalak gelah iperidiken seh ku paksa Jesus iangkat i tengah-tengahta nari ku Surga.” #Mat 3:16; Mrk 1:9; 16:19; Luk 3:21; 24:51
23E maka iusulken kalak e dua kalak dilaki, e me Jusup si igelari Barsabas (igelari pe ia Justus) ras si Matias. 24Jenari ertoto perpulungen e nina, “O Tuhan itehNdu kap seh ku pusuh peraten manusia kerina. Perbahan si e Tuhan, tuduhken min man kami si apai ipilih Kam i bas si dua kalak enda, 25lako ngaloken jabaten rasul, guna ndahiken dahin si enggo itadingken Judas, Judas si enggo lawes ku inganna si patut.” 26Jenari itikam tandukkenna me guna milih sekalak i bas si dua e. Gelar si terpilih e me Matias. Alu bage Matias me bengket ku bas terpuk rasul si sepuluh sada kalak.
Currently Selected:
PERBAHANEN RASUL-RASUL 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.