PERBAHANEN RASUL-RASUL 2
2
Rehna Kesah Si Badia
1Asum wari raya Pentakosta, pulung kerina kalak si tek man Tuhan Jesus i bas sada ingan. #Im 23:15-21; Ul 16:9-11 2Paksa si e rempet lit sora terbegi reh i langit nari bagi sora angin rembus erdeso. Sora ndai ndemi rumah inganna pulung e. 3Kenca bage lit idah kalak ndai tempa-tempa bagi dilah api merap kujah-kuje encinepi ia sada-sadai. 4Kerina si pulung e dem alu Kesah Si Badia janah ngerana ia i bas cakap si deban, bagi ibere Kesah e ia ngerana.
5I Jerusalem nterem ringan kalak Jahudi si tutus nembah man Dibata, si enggo reh i belang-belang doni enda nari. 6Asum ibegina sora e, rehen ia. Mamang kal atena sabap i bas cakapna jine rasul-rasul e ngerana. 7Mamang kal atena, e maka nina, “Ma kin kerina si ngerana enda kalak Galilea? 8Engkai ndia maka sibegi ia ngerana i bas cakapta sekalak-sekalak? 9Kita i Partia, Media ras Elam nari, i Mesopotami, Judea ras Kapadokia nari; i Pontus ras i Asia nari, 10i Perigia ras i Pampilia nari, i Mesir ras taneh Libia deher Kirene nari. Piga-piga kalak i bas kita i Rum nari. 11Kalak Jahudi ras kalak si deban si enggo i Jahudiken; janah piga-piga kalak i bas kita i Kreta nari ras i Arab nari – amin bage gia kerina kita megi ia ngerana i bas cakapta sekalak-sekalak kerna perbahanen si mbelin si enggo ilakoken Dibata.” 12Kerina ia jengang dingen mamang atena janah nungkun ia sapih-sapih ia nina, “Kai ertina kerina enda?”
13Tapi lit ka si nawaisa nina, “Mabuk kap ia e.”
Petrus ngerana man kalak si nterem
14E maka tedis Petrus ras rasul-rasul si sepuluh sada kalak e, janah alu megang sorana nina, “O kam kalak Jahudi, bage pe kam kerina si ringan i Jerusalem, begiken! Kuturiken man bandu kai kin ertina kejadin enda. 15Kalak enda labo mabuk bagi pengakapndu, sabap genduari pe jam siwah denga erpagi-pagi. 16Kejadin enda me si ikataken nabi Joel nina,
17‘Enda me pagi si kubahan i bas wari-wari pendungi nina Dibata,
Kucurcurken pagi KesahKu man kerina manusia.
Anakndu si dilaki ras si diberu ernubuat;
anak perana si lit i tengah-tengahndu ngidah pengenehenen janah;
kalak si enggo metua si lit i tengah-tengahndu ngaloken nipi. #Joel 2:28-32
18Man serayan-serayanKu si dilaki ras si diberu
Kucurcurken pagi KesahKu i bas wari e,
janah ia pe ernubuat.
19Kubahan pagi tanda-tanda sengget i langit ras i doni.
E me dareh, api ras cimber si erdipul;
20matawari jadi gelap,
janah bulan megara bagi dareh,
ope denga seh wari kerehen Tuhan, wari si mbelin dingen mulia.
21Janah ise pe si ernalem man kuasa Tuhan terkelin me!’
22Begiken kata enda o kalak Israel! Jesus kalak Nasaret e, tuhu-tuhu si isuruh Dibata sabap i bas IA enggo icidahken Dibata kuasaNa, alu ncidahken kejadin-kejadin si mejin i tengah-tengahndu. 23Sue ras sura-sura Dibata, iendeskenNa Jesus man bandu. Ibunuhndu IA alu nuruh bangsa si deban makukenca ku kayu persilang. #Mat 27:35; Mrk 15:24; Luk 23:33; Joh 19:18 24Tapi IA enggo ipekeke Dibata i bas si mate nari; ipulahiNa IA i bas kuasa kematen nari, sabap la mungkin IA tetap i bas kuasa kematen e. #Mat 28:5-6; Mrk 16:6; Luk 24:5 25Bagi enggo ikataken Daud kerna Jesus,
‘Katawari pe kuidah Tuhan i lebe-lebengku;
IA ras aku, e maka tetap ukurku. #Msm 16:8-11
26Perbahan si e meriah ukurku
janah babahku ersurak dem keriahen;
Tambah si e, aminna gia aku manusia si ermasap-masap
tetap nge aku i bas pengarapen,
27sabap labo itadingkenNdu aku i bas ingan kalak si mate;
labo ipelepasndu daging suruh-suruhenNdu si tutus melengas i bas kuburen.
28Enggo icidahkenNdu man bangku dalan ku kegeluhen,
janah perbahan Kam ras aku tuhu-tuhu meriah kal kuakap.’
29Senina-senina, terus terang kukataken man bandu kerna nininta Raja Daud. Ia enggo mate dingen ikuburken. Kuburenna e si idah denga genduari. 30IA sekalak nabi, janah ietehna padan Dibata man bana. Dibata erpadan ngangkat sekalak kesusuren Daud jadi raja bali ras ia. #Msm 132:11; 2Sam 7:12-13 31Janah perbahan enggo ieteh Daud kai si nandangi ibahan Dibata, e maka ernubuat ia kerna kekeken Raja si ipadanken Dibata e, asum nina,
‘IA labo itadingken i bas ingan kalak mate;
dagingNa labo melengas i bas kuburen.’
32Jesus me si enggo ipekeke Dibata i bas si mate nari e, janah kami saksina kerna si e. 33IA enggo iangkat ku kemuhen Dibata. IA enggo ngaloken Kesah Si Badia i bas Dibata nari bagi enggo ipadanken BapaNa e. Janah kai si idah dingen si ibegindu genduari, e me Kesah Si Badia si ialokenNa i bas BapaNa nari e si iberekenNa man kami. 34Sabap labo Daud si nangkih ku Surga; ia pe ngataken:
‘Nina TUHAN man Tuhanku, #Msm 110:1
35Kundulken arah kemuhenKu
seh Kutamaken musuh-musuhNdu i teruh tapak-tapak naheNdu.’
36Dage, kerina min kalak Israel metehsa maka Jesus si ipakuken ku kayu persilang e, IA itetapken Dibata jadi Tuhan dingen Raja si engkelini bangsaNa.”
37Kenca ibegi kalak si nterem kai si ikataken Petrus, ceda atena. E maka isungkunna Petrus ras rasul-rasul si deban nina, “O senina-senina kai dage si arus ibahan kami?”
38Erjabap Petrus man bana, “Jeralah janah alokenlah peridin i bas gelar Jesus Kristus, gelah dosa-dosandu ialemi Dibata, janah ialokenndu pe pemereNa e me Kesah Si Badia. 39Sabap enggo ipadanken Dibata man bandu ras anak-anakndu, bage pe man kerina kalak si ndauh i bas Dibata nari, e me kerina kalak si idilo Tuhan Dibatanta ku IA.”
40Melala denga kata si deban ituriken Petrus i bas ia ngajari kalak si nterem e nina, “Pulahilah bandu i bas ukumen si reh ku bangsa si jahat enda!” 41Nterem kalak si megi kata Petrus e tek dingen mindo gelah iperidiken. I bas wari e lit kira-kira telu ribu kalak tambah ku bas perpulungen e. 42Perpulungen e tutus megiken pengajaren i bas rasul-rasul nari. Nggeluh ia sikeleng-kelengen bagi si ersenina. Ras-ras ia ncepik-ncepik roti dingen ras-ras pe ia ertoto man Dibata.
Kalak si tek man Jesus nggeluh sikeleng-kelengen
43Melala tanda-tanda sengget ras kejadin-kejadin si mejin ibahan rasul-rasul. Perbahan si e kerina kalak e erkemalangen man Dibata. 44Kerina kalak si enggo tek man Jesus e tetap pulung ras-ras janah kai si lit i bas ia ipakena ras-ras. #Perb 4:32-35 45Idayakenna taneh ras erta-ertana janah duitna ibagi-bagikenna sue ras keperlun sekalak-sekalak. 46Alu ersada ukur tep-tep wari ia pulung i bas Rumah Pertoton. Ras-ras ia kerina man i bas rumahna alu meriah dingen ukur meteruk. 47Ipujina Dibata, janah kerina kalak erngena ate man perpulungen e. Tep-tep wari itambahi Tuhan ku perpulungen e kalak si iselamatkenNa.
Currently Selected:
PERBAHANEN RASUL-RASUL 2: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.