JOEL 3
3
Ukumen Dibata nandangi bangsa-bangsa
1Nina TUHAN,
“Tupung e pagi Kuulihken ka kemakmuren Juda ras Jerusalem.
2Kupepulung kerina bangsa-bangsa
jenari Kubaba ia kerina ku Baluren Pengadilen.
I jah Kuadili ia
erkiteken kai si enggo ibahanna man bangsangKu.
Enggo ikerapkenna kalak Israel ku negeri-negeri si deban
jenari ibagi-bagikenna negeringKu, Israel.
3Ibahanna tikam tanduk
nentuken ise ndatken tabanen.
Idayakenna anak dilaki ras diberu jadi budak,
lako nggalari diberu si pencarinna erlua-lua ras nukur lau anggur.
4Kai kin atendu ibahanndu man bangKu o Tirus, Sidon ras daerah-daerah Pilisti? Erbalas kin atendu man bangKu? Adi e kin sura-surandu, minter ka nge Aku erbalas man bandu! #Jes 23:1-18; Esek 26:1–28:26; Amos 1:9-10; Sak 9:1-4; Mat 11:21-22; Luk 10:13-14 #Jes 14:29-31; Jer 47:1-7; Esek 25:15-17; Amos 1:6-8; Sep 2:4-7; Sak 9:5-7 5Enggo ibuatindu pirak ras emasKu, jenari iangkutndu barang-barangKu si meherga bas rumah persembahenndu. 6Enggo iangkutndu kalak Juda ras kalak Jerusalem ndauh i bas negerina nari, dingen idayakenndu ia man kalak Junani. 7Genduari Kubaba ateKu ia ndarat i bas ingan e nari, e me ingan ku ja ia enggo idayakenndu. Kulakoken man bandu bagi enggo ilakokenndu man bana. 8Kupelepas anakndu si dilaki ras si diberu idayaken man kalak Juda. Idayaken kalak Juda ka ia kerina man sada bangsa si ndauh, e me kalak Syeba. Aku TUHAN kap si enggo melasken kata enda.
9Momokenlah enda man bangsa-bangsa kerina:
Ersikaplah guna erperang,
dilo kerina kalak si mbisandu,
suruh berkat kerina tenterandu.
10Tepa gigi lukundu jadi pedang,
sabi-sabindu jadi lembing.
Kalak si la megegeh pe arus ikut erperang. #Jes 2:4; Mi 4:3
11Pedasken mari,
o kam bangsa-bangsa
jenari pulunglah i bas berneh-berneh.”
O TUHAN, suruh tenteraNdu reh nerang ia kerina.
12“Bangsa-bangsa la banci la ersikap,
dingen reh ku Baluren Pengadilen.
I je, Aku TUHAN mereken penghakimen man bangsa-bangsa.
13Jahat kap ia kerina;
sabi ia desken gandum isabi tupung peranin;
erik ia bagi ngerik buah anggur
i bas pengeriken
seh maka ndaraten launa. #Ket 14:14-16 #Ket 14:19-20; 19:15
14Meribu-ribu kalak,
meribu-ribu kalak i bas berneh-berneh Pengadilen.
Ku je me reh wari TUHAN
janah pedas-pedas me Ia reh.
15Matawari ras bulan jadi gelap
bintang-bintang pe lanai ersinalsal.”
TUHAN masu-masu bangsaNa
16 TUHAN ergeruhguh i Deleng Sion nari,
sorana erlenggur i Jerusalem nari;
doni ras langit mundu-undu,
tapi Ia kap sekawal bangsaNa. #Amos 1:2
17“O Israel jenari itandaindu kap pagi maka Aku kap TUHAN Dibatandu.
I datas Deleng Sion, delengKu si badia, i je ringan Aku.
Jerusalem jadi kuta si badia
lanai ndigan pe kalak si deban naluken ia.
18Tupung e tambur me deleng-deleng alu peken anggur,
asuh-asuhen dem i bas tiap-tiap uruk,
lau si erburak-burak maler;
i bas kerina sumbul lau Juda nari,
Ulu lau pultak i bas Rumah Pertoton TUHAN nari
maler ku Baluren Akasia.
19Mesir jadi gurun pasir,
Edom jadi mbalmbal si terulang
erkiteken enggo iserangna negeri Juda,
janah ibunuhina kalak si la ersalah.
20-21Erbalas me Aku man kalak si enggo munuhi;
la ateKu mekuah man kalak jahat.
Tapi Juda ras Jerusalem tetap iingani rasa lalap,
dingen Aku TUHAN ringan i datas Deleng Sion.”
Currently Selected:
JOEL 3: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.