JAKUP 5
5
Pertenget nandangi kalak bayak
1Genduari, begikenlah katangku, o kalak bayak! Tangis ras ngandunglah kam erkiteken kiniseran si nandangi reh ngkenai kam! 2Kebayakenndu enggo macik, janah uisndu enggo ipangani ngetnget. #Mat 6:19 3Emas ras pirakndu enggo tembesin, janah tembesina e me pagi ersaksi ngelawan kam. Itutungna me dagingndu bagi api. I bas wari-wari si arah pudi enda enggo ipepulungndu erta-erta. 4La igalarindu upah kalak si rani i jumandu. Begikenlah penderkuhna! Penderkuh kalak si rani i jumandu enggo ibegi Dibata, Tuhan si Mada Kuasa. #Ul 24:14-15 5Mewah dingen senang kal pergeluhndu i doni enda. Ipeburndu bandu guna wari penggelehen. 6Kalak si la ersalah iukumndu dingen ibunuhndu, janah la kam ilawanna.
Saber ras ertoto
7Dage o senina-seninangku, saberlah kam ngayak reh Tuhan. Nehenlah sekalak perjuma kuga ia saber nimai seh jumana mereken ulih si erguna. Saber ia nimai udan si reh nandangi merdang ras udan si reh kenca rumpah page. 8Kam pe arus saber. Tetap min kam erpengarapen, sabap wari kerehen Tuhan seh me.
9O senina-seninangku, ola kam jungut-jungut dingen sisalah-salahen, gelah ola kam iukum Dibata. Hakim e reh me; bengket me IA. 10O seninangku, ingetlah nabi si ngerana nai i bas gelar Tuhan. Usihlah saber atena ras kinigenggengenna i bas ngenanami kiniseran. 11Sikataken malem atena erkiteken megenggeng ia. Enggo ibegindu kerna saber ate Jop, bage pe ietehndu maka dungna isampati Tuhan ia. Sabap Tuhan e perkuah dingen dem keleng ate. #Jop 1:21-22; 2:10; Msm 103:8
12I babo si e kerina o senina-seninangku, ola kam ersumpah tupung erpadan. Ola kam ersumpah alu gelar langit, ntah doni, ntah kai pe si debanna. Katakenlah “Ue” adi ue kin, janah “Lang” adi lang kin atendu, gelah ola kam kena ukumen. #Mat 5:34-37
13Adi lit sekalak i bas kam ngenanami kiniseran, ertotolah ia man Dibata. Adi lit si ermeriah ukur, rendelah ia muji Dibata. 14Adi lit si sakit, idilonalah pertua-pertua i bas perpulungen, gelah itotoken pertua-pertua e ia dingen iminakina i bas gelar Tuhan. #Mrk 6:13 15Pertoton si bage, si ibahan alu tek man Tuhan tentu pepalem kalak si sakit e. Malem me ia ibahan Tuhan i bas penakitna e nari, janah ialemi Tuhan me dosana si enggo ibahanna. 16E maka akukenlah dosandu sekalak-sekalak i lebe-lebe temanndu, janah ertotolah kam pekepar kerna teman, gelah malem kam. Pertoton kalak si bujur ergegeh kal. 17Nabi Elia pe manusia nge bali ras kita. Alu tutus ate ertoto ia gelah ola nusur udan, jenari lego telu setengah tahun dekahna. #1Raj 17:1; 18:1 18Kenca ertoto ka ia mulihken, reh udan i langit nari, jenari taneh mereken asilna. #1Raj 18:42-45
19O senina-seninangku! Adi lit sekalak i tengah-tengahndu nari papak i bas pengajaren si tuhu-tuhu nari, jenari lit ka sekalak si negu ia mulihken, 20ingetlah kata enda: Ise si negu kalak si erdosa gelah itadingkenna si papak e, iselamatkenna kap tendi si erdosa e i bas si mate nari, janah erkiteken ia, melala dosa ialemi Dibata. #Kua 10:12; 1Pet 4:8
Currently Selected:
JAKUP 5: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.