ESEKIEL 48
48
Pembagin taneh man suku-suku Israel
1-7Baleng negeri e arah Utara mulai i Lawit Tengah nari ku kenjulu terus ku Kuta Hetlon, terus ku dalan bengket ku Hamat, jenari ku Kuta Hasar-Enam, seh ku perbalengen Damaskus ras Hamat. Tep-tep suku arus ngaloken sada bagin taneh mulai i perbalengen si arah kenjulu nari terus ku Lawit Tengah, rikutken uruten si tersena arah teruh enda, i Utara nari ku Selatan:
Dan
Aser
Naptali
Manase
Eperaim
Ruben
Juda
Bagin si iserapken i tengah-tengah negeri e
8Bagin taneh si tersena arah teruh enda arus iserapken gelah ipake guna keperlun tertentu. Belangna i Utara nari ku Selatan sepuluh dua setengah kilometer, janah gedangna i kenjulu nari ku kenjahe bali ras bagin si ibereken man suku-suku e. I bas bagin enda me ingan Rumah Pertoton e.
9I tengah-tengah taneh e, sada bagin si gedangna sepuluh dua setengah kilometer, belangna sepuluh kilometer, iserapken man TUHAN. 10I tengah-tengah taneh e me ipajekken Rumah Pertoton man TUHAN. Imam-imam arus dat bagin i bas taneh si badia e. Belangna baginna i kenjulu nari ku kenjahe sepuluh dua setengah kilometer janah i Utara nari ku Selatan lima kilo meter. 11Bagin taneh si badia enda jadi sikerajangen imam-imam kesusuren Sadok. Kalak enda tetap patuh ndalinken dahinna, janah la iikutkenna bangsa Israel si debanna ngelakoken si salah, bagi kalak si deban i bas suku Lewi. 12Erkiteken si e, lit baginna tersendiri deherken sikerajangen kalak Lewi, janah bagin si e me si badiana kal. 13Kalak Lewi pe lit ka nge baginna tersendiri, e me arah Selatan bagin imam-imam e, si e pe sepuluh dua setengah kilometer ka nge gedangna i kenjulu nari ku kenjahe, janah lima kilometer i Utara nari ku Selatan. 14Bagin si iserapken man TUHAN e me bagin taneh si mehulina kal i bas taneh, janah si e la banci sitik pe idayaken tah itukarken tah pe ibereken man kalak si deban. Taneh e badia kap, janah e sikerajangen TUHAN.
15Iba-iba taneh si enggo iserapken enda ndai, gedangna sepuluh dua setengah kilometer, belangna dua setengah kilometer, si e la badia janah banci ipake jelma si nterem. Banci ia ringan i je, janah banci pe ipakena taneh e. Kuta arus ipajekken i tengah-tengah taneh e 16janah arus persegi; gedangna ras belangna dua seperempat kilometer. 17Sekelewet kuta e lit taneh kosong, belangna seratus dua puluh lima meter. 18Iba-iba taneh kenca kuta e ipajekken, e me i Selatan bagin si badia ndai, si belangna lima ras dua setengah kilometer terjulun kuta e, bage pe lima ras dua setengah kilometer jahen kuta e, banci ipake penduduk si ringan i bas kuta jadi perjuman. 19Ise si ringan i bas kuta e, subuk i bas suku si apai nari pe ia, banci mperjumai taneh e.
20Dage taneh si lit i tengah-tengah, bagin si niserapken ndai, e me kap tanehKu si badia, termasuk taneh si nipake guna taneh kuta; gedangna ras belangna sepuluh dua setengah kilometer.
21-22Taneh si iba denga arah kenjulu ras kenjahe daerah ingan Rumah Pertoton, taneh imam-imam ras taneh kalak Lewi, si e jadi sikerajangen raja si erkuasa. Bagin si arah kenjulu terus ku perbalengen si arah kenjulu, janah bagin si arah kenjahe terus ku Lawit Tengah. Balengna si arah Utara e me taneh bagin suku Juda, janah arah selatan bagin Benyamin.
Taneh man suku-suku si deban
23-27Taneh si lit i Selatan bagin si iserapken ndai, ibereken man suku-suku si debanna. Taneh e mulai i perbalengen si arah kenjulu nari terus ku Lawit Tengah, janah ibagi rikutken uruten si tersena arah teruh enda, i Utara nari ku Selatan.
Benyamin
Simeon
Isakar
Sebulon
Gat
28Arah Selatan bagin si ibereken man suku Gat, mulai i Tamar nari, perbalengen e terus sider ku Selatan kempak sumbul Kades-Mariba, janah i jenari sider ka ku Utara ngikut-ngikut perbalengen ras Mesir seh ku Lawit Tengah.
29Nina TUHAN si Erdolat, “Bagenda me pe mbagi-bagiken taneh e man kerina suku-suku Israel.”
Pintu kerabangen Jerusalem
30-34Lit sepuluh dua dalan bengket ku Kuta Jerusalem. Empatna tembokna seri gedangna, e me dua seperempat kilometer sada. Tep-tep dampar lit telu gerbangna, janah sada sadai ibahan gelarna rikutken sada gelar i bas suku-suku e. Gerbang-gerbang tembok si arah Utara gelarna Ruben, Juda ras Lewi; si i bas tembok si arah kenjulu gelarna Jusup, Benyamin, ras Dan; si i bas tembok si arah Selatan gelarna Simeon, Isakar ras Sebulon, si i bas tembok si arah barat gelarna Gat, Aser ras Naptali. #Ket 21:12-13 35Gedang tembok e kerina lit siwah kilometer. Mulai genduari nari gelar kuta e, e me “TUHAN Ringan i jenda.”
Currently Selected:
ESEKIEL 48: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.