2 TIMOTIUS 4
4
1Jesus Kristus reh denga pagi jadi Hakim nandangi kalak si nggeluh ras si enggo mate. IpantekiNa pagin KinirajanNa. E maka kupindoken kal man bandu i lebe-lebe Dibata ras Jesus Kristus: 2Pembarkenlah Berita e, subuk tengteng ras la tengteng paksana terusken gelah beritaken. Cidahken salah kalak, persingeti dingen pegegehi ia sanga iajarkenndu ia alu dem kesabaren. 3Reh me pagi paksana lanai ibegiken kalak pengajaren si tuhu-tuhu. Sura-surana saja me idalankenna. Ipepulungna guru-guru guna ngajari ia kerna kai si iakapna ntabeh megikenca. 4La ibegikenna pengajaren si tuhu-tuhu, tapi tutus atena megiken turi-turin si la tuhu. 5Tapi kam, ntah kai gia jadi, ola bene ukurndu. Megenggenglah i bas ngenanami kiniseran. Dahikenlah dahin meritaken Berita Si Meriah e, janah dalankenlah tanggung jabapndu jadi suruh-suruhen Dibata.
6Tapi aku, enggo seh paksana ipersembahken. Enggo seh paksana aku nadingken kegeluhen enda. 7Enggo kupala-palai asa ngasupku i bas perlumban e, enggo seh aku ku garis batas, janah enggo kucikep kiniteken e. 8E maka genduari enggo sikap pemere kemenangen e guna iendesken man bangku, e me rudang-rudang kebenaren si ibereken Tuhan, Hakim si adil, si iberekenNa man bangku i bas Wari e. Janah pemere e labo man bangku saja, tapi pe man kerina kalak si nimai kerehenNa alu erkeleng ate.
Perkara-perkara si debanna
9Usahakenlah maka pedas kam reh ndahi aku. 10Demas enggo nadingken aku janah genduari ia erngena ate man doni si genduari enda. Enggo lawes ia ku Tesalonika. Si Kresens pe enggo lawes ku Galati janah Titus ku Dalmati. #Kol 4:14; Plm 1:24; 2Kor 8:23; Gal 2:3; Tit 1:4 11Lukas nari ngenca ras aku. Legi Markus gelah ras kam ku jenda, sabap banci ia nampati aku i bas dahinku. #Kol 4:14; Plm 1:24; Perb 12:12,25; 13:13; 15:37-39; Kol 4:10 12Tikikus enggo kusuruh ku Epesus. #Perb 20:4; Ep 6:21-22; Kol 4:7-8 13Adi reh kam baba mantelku, tading kubahan i Troas i bas si Karpus. Baba pe kitap-kitapku, terlebih-lebih kitap kulit e. #Perb 20:6
14Aleksander, tukang tembaga e, enggo megati erbahan jahat man bangku. Tuhanlah mbalassa perbahanenna e. #1Tim 1:20; Msm 62:13; Rom 2:6 15Kam pe metengetlah nandangi ia, sabap megegeh kal ia ngelawan kai si iberitaken kita.
16Asum tangtangna aku iadili, ise pe la lit nemani aku; kerina nadingken aku. Mbera-mbera la itak-taki Dibata si enda man bana! 17Tapi Tuhan tetap nemani aku, iberekenNa man bangku gegeh, seh maka tuhu-tuhu i bas paksa e ngasup aku meritaken Berita Si Meriah e man bangsa si erbage-bage. Ipulahi Tuhan aku tempa-tempa i bas babah singa nari. 18Janah ipulahi Tuhan me pagi aku i bas kerina si jahat nari, jenari ibabaNa aku alu selamat ku bas KinirajanNa i Surga.
Man baNalah kemulian seh rasa lalap. Amin.
Kata Pendungi
19Kataken mejuah-juah man Persila ras perbulangenna Akuila, bage pe man Onesiporus sada jabu. #Perb 18:2; 2Tim 1:16-17 20Erastus genduari i Korinti, janah Tropimus kutadingken i Mileti, sabap sakit ia. #Perb 19:22; Rom 16:23; Perb 20:4; 21:29 21Usahaken kal gelah reh kam ope denga musim mbergeh.
Eubulus, Pudens, Linus ras Klaudia ngataken mejuah-juah man bandu, bage pe kerina senina-senina si enggo tek man Jesus Kristus.
22Tuhanlah nemani kam.
Lias ate Dibata ras kam kerina gelah.
Currently Selected:
2 TIMOTIUS 4: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.