YAWSHU 15
15
Yuda Hpe Masat Ya Ai Lamu Ga
1Yuda amyu bawsang hta na lakung lama ni lu la ai lamu ga sali gaw lawu de na hte maren rai nga ai.
Dai lamu ga gaw dingda maga de Edom lamu ga jarit hte htep rai nga ai Zin nam mali dingda jahtum du hkra rai nga ai. 2Ndai dingda maga de na lamu ga jarit gaw Jum Nawng a dingda jahtum ai kaw na, 3dingda maga de shanang hkrat wa ai Akrabim uhkan lam hku hkan nna Zin nam mali de byawn rai nga ai. Dai kaw nna Kadesha Barnea dingda maga kaw nna Hezron hprang, Adara de lung wa nhtawm Karka de kayin wa, 4Azmon de bai sa wa, Egutu mung a lamu ga jarit e lwi ai hka hkan nna Ka-ang Panglai e htuk ai hte ga jarit mung htum mat sai. Dai gaw Yuda mung a dingda maga de na lamu ga jarit rai nga ai.
5Sinpraw maga de na lamu ga jarit gaw dingyang lwi yu wa ai Yawdan hka htumpa na Jum Nawng rai nga ai,
Dingdung maga de na lamu ga jarit gaw, 6Bet Hogla hku lung wa nhtawm Yawdan Kadit hpe praw rai mu mada lu ai dingdung de na bum marung du hkra rai nga ai. Dai kaw na Bohan a Nlung Jung da ai Shara (Bohan gaw Rubin a shadang sha rai nga ai) de du nga ai. 7Tsin-Yam Tsindam Kadit kaw nna lahta de nga ai Debira, dai hpang dingda maga de nga ai kadit ntsa na Adumim uhkan de man yawng ai Gilgala de dingdung maga hku kayin wa nna hkroi, dai gaw Enshemesha hka hpawk de hprang, Enrogela shara e byawn; 8Yebusi masha ni nga ai Yerusalem mare a dingda maga e nga ai kawng ntsa na Hinom Kadit hku hkroi rai nga ai. Dai hpang Hinom Kadit a sinna maga na kawng pungding hku hprut, Rehpim Kadit a dingdung shingjut de hkren, 9dai kaw nna Nephto hka hpawk hku Ehpron bum makau na mare ni de hprang, dai kaw nna Bala (shing n rai Kiriat Yarim) de kayin mat wa nhtawm, 10Bala sinna maga hku shinggrup nna Edom bum ga de hprang, dingdung maga na Yearim Bum (shing n rai Hkesalon) kaw na Bet Shemesha de yu wa nhtawm Timna e hprawt rai nga ai. 11Dai hpang Ekron dingdung maga na kawng hku lai, Shikeron hku hprang, Bala Bum bai lai, Yamne de hprawt rai nhtawm, Sinna maga de na lamu ga jarit sumri gaw Ka-ang Panglai hta wa htum sai. 12Yuda lakung lama ni ndai lamu ga jarit kata hta nga ma ai.
Hkaleb Gaw Hebron Hte Debira Gasat La Ai
(Trg 1:11-15)
13Dai Madu gaw Yawshu hpe hkang da nu ai hte maren, Yuda a lamu ga daw mi hpe Yuda amyu bawsang hta na Yehpuna a kasha Hkaleb hpe jaw wu ai. Shi gaw Anak a kawa Arba madu ai Hebron mare hpe la wu ai. #Trg 1:20. 14Hkaleb gaw Anak a amyu matu ni rai nga ai Sheshai, Ahiman hte Talmai matu mara ni hpe mare kaw nna gawt shapraw kau wu ai. 15Dai hpang Debira (Ndai mare hpe Kiriat Sehpera ngu nna shamying ai) mare e nga ai masha ni hpe shi sa gasat kau wu ai. 16Hkaleb gaw, “Kiriat Sehpera hpe gasat la ai wa hpe nye a shayi sha Aksa hpe ya sha nna, hkungran la shangun na nngai,” ngu nna tsun wu ai. 17Hkaleb a kanau Kena a kasha Otniela mahtang dai mare hpe gasat dang la wu ai rai nna, Hkaleb gaw dai wa hpe shi a shayi sha Aksa ya sha nna hkungran la shangun wu ai. 18Hkungran poi shani e, Otniela mahtang shi a madu jan hpe kawa kaw yi langai hpyi na shadut wu ai. Dai num jan mung shi a lawze kaw na yu wu yang, shi hpa ra ai lam, Hkaleb san wu ai. 19Dai numsha gaw, “Nang ngai hpe jaw ai lamu ga gaw hkun hkraw nga ai shara rai nga ai majaw hka pru ai shara ngai ra nngai,” ngu nna htan wu yang, Hkaleb mung shi hpe lahta hka hpawk, lawu hka hpawk jaw wu ai.
Yuda A Mare Ni
20Ndai ni gaw Yuda amyu bawsang hta na lakung lama ni madu la ai sali ga rai nga ai. 21Edom lamu ga jarit hte htep, dingda jahtum na shanhte madu la lu ai mare ni gaw Kabzela, Edera, Yagura, 22Kina, Dimona, Adada, 23Kedesha, Hazora, Itnan, 24Zihpa, Telem, Bealot, 25Hazora Hadata, Keriat Hezron (shing n rai Hazora) 26Amam, Shema, Molada, 27Haza Gada, Heshmon, Betpelet, 28Haza Shuala, Berasheba, Biziotia, 29Bala, Iim, Ezem, 30Elatola, Hkesila, Horma, 31Ziklag, Madmana, Sansana, 32Lebaot, Shilahim, Ain hte Rimon ni rai nga ai. Dai mare ni mahkra gaw shanhte a kahtawng ni hte hpawn hkun jahku rai nga ai.
33Bum lagaw hkan e de ai mare ni gaw, Eshtaola, Zoara, Ashna, 34Zanoa, Enganim, Tapua, Enam, 35Yarmut, Adulam, Sohko, Azeka, 36Sharim, Adihtim, Gedera, Gederohtim ni rai nga ai. Kahtawng ni hte hpawn mare yawng shi mali rai nga ai.
37Bai Zenan, Hadasha, Migdalagad, 38Dilean, Mizpa, Yokhtela, 39Lahkisha, Bodket, Eglon, 40Hkabon, Lamam, Hkitlisha, 41Gederot, Betdagon, Nama, Makeda ni rai nga ai. Kahtawng ni hte hpawn mare nlang shi kru rai nga ai.
42Bai Libna, Ehtera, Ashan, 43Iphta, Ashna, Nezib, 44Kila, Akzib, Maresha ni rai nga ai. Kahtawng hte hpawn mare jahku rai nga ai.
45Ekron hte dai hte seng ai kahtawng ni, 46Ekron kaw nna Ka-ang Panglai du hkra, Ashdod hte htep na kahtawng ni rai nga ai.
47Bai Ashdod, Gaza hte de ai kahtawng mare ni, Egutu mung a lamu ga jarit e lwi ai hka, Ka-ang Panglai hkin-gau du hkra rai nga ai.
48Bum ga de nga ai mare ni gaw Shamira, Yatira, Sohko, 49Dana, Kiriat Sehpera (shing n rai Debira), 50Anab, Eshtemoa, Anim, 51Goshen, Holon, Gilo ni rai nga ai. Kahtawng ni hte hpawn mare shi langai rai nga ai.
52Araba, Duma, Eshan, 53Yanim, Bet Tapua, Ahpeka, 54Humta, Hebron, Ziora ni rai nga ai. Kahtawng ni hte hpawn mare jahku rai nga ai.
55Maon, Hkarmela, Zihpa, Yuta, 56Yezrela, Yokdam, Zanoa, 57Ka-in, Gibea, Timna ni rai nga ai. Kahtawng ni hte hpawn mare shi rai nga ai.
58Bai Hahula, Betzura, Gedora, 59Marat, Betanat, Elatekon ni rai nga ai. Kahtawng ni hte hpawn mare kru rai nga ai.
60Kiriat Bala (shing n rai Kiriat Yarim) hte Raba rai nga ai. Kahtawng ni hte hpawn mare lahkawng rai nga ai.
61Nam mali hkan e nga ai mare ni gaw Bet Araba, Midin, Sehkahka, 62Nibshan, Jum mare hte Engedi ni rai nga ai. Kahtawng ni hte hpawn mare kru rai nga ai.
63Rai ti mung, Yuda lakung lama ni mahtang Yerusalem mare e nga ai Yebusi masha ni hpe n lu gawt shapraw kau lu ma ai rai nna, dai mare e Yuda lakung lama ni hte rau naw nga nga ma ai. #Trg 1:21; 2Sa 5:6; 1Hl 11:4.
Currently Selected:
YAWSHU 15: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.