SHINGRAN 2
2
Ehpesu Hpung A Matu Mungga
1“Ehpesu mare hpung a lamu kasa hpang de ning ngu ka dat u:
“Da ndai gaw, Hkra lata hta shagan sanit lang da nna, ja pyengdin sanit a ka-ang e lam hkawm ai wa kaw na mungga rai nga ai. 2Nang galaw sai amu hpe ngai chye nga nngai. Nang gade yak la ai hte galaw sai lam, nang gade hkam sharang sai lam ngai chye nga nngai. Nang gaw n hkru n hkra re ai masha ni hpe ra mi n rai nga shangun lu ndai mung, Kasa n re ai ni kasa rai ga ai nga nna tsun ai kasa hpyi hpun ai ni hpe nang san dinglik yu nna, shanhte masu ai ni re ai lam shadan kau ya lu ndai mung, ngai chye nga nngai. 3Nang hkam sharang lu nga ndai hte nye a mying nsang a matu mara tsin-yam tsindam hkam ai hte nang asum mung n jaw ndai. 4Rai ti mung ya nang ngai hpe shawng de na zawn n tsaw ra mat nit dai majaw, nang hta mara shagun shara ngai mu nngai. 5Dai rai nna nang gade daram di hkrat yu mat wa sai lam hpe myit yu u! Na a yubak mara ni kaw na kayin wa nna shawng de na zawn bai hkan sa galaw u. Na a yubak mara ni kaw na bai n kayin wa yang gaw, ngai nang kaw du nna na a pyengdin hpe de a shara na sit kau ya na de ai. 6Rai ti mung Nikola a sape ni galaw ai arawn alai hpe ngai n dawng nga ai zawn nang mung n dawng n yawt nga ndai majaw, nang hpe shakawn shara akyu langai lu ndai.
7“Wenyi gaw hpung ni hpe kaning nga tsun ai gaw, na tu ai wa na la u ga!
“Awng padang lu ai wa hpe Karai Kasang a Sun e tu ai asak hpun a asi hpe sha lu na ahkang ngai jaw na we ai.#Nin 2:9.
Samurna Hpung A Matu Mungga
8“Samurna hpung a lamu kasa hpe ning ngu ka dat u:
“Ndai gaw, ningshawng wa hte jahtum wa, si sai rai ti mung asak bai hkrung wa ai wa kaw na mungga rai nga ai.#Shr 1:8,17-18. 9Nang hkrum ai zingri zingrat hte matsan mayan hpe ngai chye nga nngai; rai ti mung kaja wa nang sut su nga ndai! Yuda masha rai ga ai nga nhtawm me, Yuda masha n teng ai masha ni nang hpe sari hpoi shangun ai n hkru n kaja ai shatan nhkan ga ni tsun nga ma ai hpe ngai chye nga nngai. Kaja wa nga yang shanhte gaw Satan a hpung masha ni rai nga ma ai. 10Nang hkrum magang ra ai nni nkri hpe hkum hkrit et; Yu u: Nanhte hpe chyam yu na matu nat gaw, nanhte hta na nkau mi hpe htawng hta sharen da na ra ai rai nna, nanhte a ru yak nni nkri hkrum ai lam nhtoi shi ya tup na na ra ai. Si hkra ngai hta maju jung nga u, shaloi ngai nang hpe asak janmau jaw na de ai: dai gaw na a awng padang lu ai shabrai rai nga ai.
11“Wenyi gaw hpung ni hpe kaning nga tsun ai gaw, na tu ai wa gaw na la u ga!
“Lahkawng lang ngu na si ai lam gaw, dang lu ai wa hpe hkra lu na n rai.#Shr 13:9; 20:14; 21:8.
Pergamu Hpung A Matu Mungga
12“Pergamu mare na hpung a lamu kasa hpe ning ngu ka dat u:
“Ndai gaw nshan lahkawng maga dai ai ntawng nhtu lang ai wa kaw na mungga rai nga ai. 13Nang gara shara e nga nga ndai hpe ngai chye nga nngai. Satan a tingnyang dung nga ai shara e nang nga nga ndai. Ngai hta sadi dung ai hte sakse hkam ai Antipa gaw Satan de nga ai shara ngu ai nanhte a ka-ang e Sat kau hkrum ai aten hta pyi, nang gaw ngai hta sadi dung nga nna, ngai hpe kam sham ai na a makam masham hpe n nyet kau ndai. 14Rai ti mung sumla ni hpe nawng ya ai hkungga shahpa ni hpe sha na hte, nse nsa ngu ai hpye ai amu galaw ai hta Israela masha ni hkan sa nna yubak mara galaw hkra Balak hpe hpaji daw ya ai Balam a sharin shaga ai hta hkan nang ai masha nkau mi, na a hpung hta lawm nga ma ai majaw, nang hpe mara shagun shara loi mi, ngai mu nngai.#Bhk 22:5-7; 31:16; Trj 23:4. 15Dai hte maren nanhte hta mung, Nikola a hpang hkan nang ai ni sharin shaga ai hta hkan nang nga ai masha ni lawm nga ma ai. 16Dai re ai majaw ya jang na a yubak mara ni kaw na kayin wa rit! Dai n rai yang, ngai alawan nang kaw du nna, nye a n-gup hta na pru ai ntawng nhtu hte shanhte hpe gasat kau na mawe ai.
17“Wenyi gaw hpung ni hpe kaning nga tsun ai gaw, na tu ai wa gaw na la u ga!
“Awng padang lu ai ni hpe, makoi da ai manna muk nkau mi hpe mung, shanhte langai hkrai hpe ahpraw n san ai lungdin hpe mung, ngai jaw na nngai. Dai lungdin hta ka da ai mying ningnan hpe chyawm gaw, lungdin lu la ai wa hta kaga kadai mung n chye ya lu ai.#Pru 16:14-15; 16:33-34; Yhn 6:48-50.
Htuatira Mare Na Hpung A Matu Mungga
18“Htuatira mare na hpung a lamu kasa hpe ning ngu ka dat u:
“Ndai gaw, wan shinglet zawn tu ala ai myi hte, arut shatsawm tawn ai magri htoi zawn san ai lagaw tu ai Karai Kasang a kasha kaw na mungga rai nga ai. 19Nang hpa galaw ai hpe ngai chye nga nngai. Na a tsaw ra ai hte makam masham hta sadi dung ai lam hpe mung, amu gun hpai ai hte myit galu kaba hkam sharang ai lam hpe mung, ngai chye nga nngai. Dai hta n ga, hpang jahtum daw hta nang galaw nga ai amu ni gaw, shawng daw na hta grau lai hkra kaja nga ai hpe mung, ngai chye nga nngai. 20Rai ti mung ngai nang hpe mara shagun na lam langai mi mu nngai. Hpa majaw nga yang, nang gaw, tinang dai ‘Karai Kasang kaw na du sa ai kasa rai nngai,’ nga nna tsun ai num Yezebela hpe shi ra ai hku di shangun ai hte hkap la tawn ndai. Shi gaw nye a shangun ma ni hpe hpye ai amu galaw na hte sumla ni hpe nawng ya ai lusha ni hpe sha na lam sharin ya nna, shanhte hpe shut hpyit lam dam shangun mu ai.#Shr 14; 1Hk 16:31. 21Ngai shi hpe yubak mara ni kaw na myit malai lu na aten jaw da rai ti mung, shi a hpye ai amu lam hta na myit malai n lu hkraw nga ai. 22Dai rai nna ngai shi hpe yup ra ntsa e kabai tawn na we ai rai nna, dai kaw shi hte rau num shaw la shaw ai amu galaw ai ni hte hpawn tsin-yam tsindam kaba hkrum sha na mara ai. Shanhte gaw dai numsha hte galaw ai n hkru n shawp amu hta na myit malai n lu ai rai yang, ngai ya jang shanhte hpe hkrithpa jam jau hkrum shangun na mawe ai. 23Shi a hpang hkan nang ai ni hpe mung ngai sat kau na mawe ai. Dai shaloi ngai gaw, masha shagu a myit mang ai lam ni hte maw mawn ai lam ni hpe yawng chye ya ai Madu ngai rai nga nngai gaw, hpung ni chye lu na mara ai. Nanhte hta na langai hte langai hpe, tinang galaw sai amu hte maren ngai htang jaw na made ai.#Shk 7:9; 62:12; Yer 11:20; Rom 8:27; 2Ko 5:10.
24“Rai ti mung, Htuatira mare hta naw ngam nga ai hpung masha nkau mi gaw, dai n hkru n shawp ai sharin shaga ai lam hta n hkan nang ai hta n ga, masha ni tsun dam ai, ‘Satan a sung htum ai makoi magap da ai lam ni,’ ngu ai hpe mung n sharin hkam la ma ai rai nna, ngai nanhte hpe tsun made ai gaw, nanhte hta lit kaga ngai n shajat na ni ai. 25Rai ti mung nanhte lu ai made hpe, ngai du ai du hkra ngang ngang kang kang manat da mu. 26Awng padang lu nna jahtum du hkra ngai ra sharawng ai arawn alai lam hkan nang ai ni hpe, nye Wa kaw na ngai lu ai ahkang aya hpe nan jaw ya na mawe ai. #Shr 20:4; Mat 19:28; Yhn 6:29; 1Ko 6:3; 1Yh 3:23. 27Dai ahkang aya gaw: masha mungdan ni a ntsa e hpri sumdoi hte up hkang nna, di bu sama a di bu ni hpe zawn ayun ayaw rai hkra adup grawp kau na ahkang aya rai nga ai. 28Dai nhtoi gintawng hpe mung ngai shanhte hpe jaw na mawe ai.
29“Wenyi gaw hpung ni hpe kaning nga tsun ai gaw, na tu ai wa gaw na la u ga!
Currently Selected:
SHINGRAN 2: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.