YAWSHU 6
6
Yerihko Mare Hkrat Mat Ai
1Israela masha ni n shang lu hkra nga, Yerihko mare chyinghka ni la da nna makawp maga let sin nga ma ai. Kadai mung mare de pru pru shang shang n nga nga ma ai. 2Dai Madu gaw Yawshu hpe, “Yerihko mare hpe mung, de a hkawhkam hte n-gun ja ai share shagan ni hpe mung na a lata hta ngai ap ya sade ai. 3Nang hte na a hpyenla ni dai mare hpe lani mi kalang lang hkawm shinggrup nhtawm kru ya tup galaw na rai myit dai. 4Pahtau langai hpra lang ai hkinjawng sanit gaw Ga Shaka Sumpu a shawng e sa wa na rai ma ai. Nang hte na a hpyenla ni gaw sanit ya ngu na shani hta dai mare hpe sanit lang hkawm shinggrup nga yang, hkinjawng ni pahtau dum nga na rai ma ai. 5Dai hpang, shanhte gaw pahtau nsen galu dum dat mu ai shaloi, dai nsen na ai shaloi jang, masha nlang a nsen shaja nna jahtau dat na rai ma ai; shing rai jang mare bunghku ni daw ru mat na ra ai. Dai hpang hpyen luksuk ting gaw tinang a man ang ai hku mare kata de shang wa na rai ma ai,” ngu nna tsun wu ai.
6Yawshu gaw hkinjawng ni hpe shaga la nna shanhte hpe, “Dai Ga Shaka Sumpu hpe hpai nhtawm nanhte hta na marai sanit pahtau lang let, Sumpu a shawng e sa wa masu,” ngu nna tsun wu ai. 7Dai hpang shi gaw mare hpe hkawm shinggrup hpang wa na matu shi a masha ni hpe mung, dai Madu a Ga Shaka Sumpu shawng e lam shawng ai sin langa dap ni sa wa na matu mung hkang dat wu ai.
8-9Yawshu hkang dat ai hte maren, lam shawng sin langa dap gaw pahtau dum ai hkinjawng ni a shawng e sa wa ma ai; dai ni a hpang e Ga Shaka Sumpu hpai ai hkinjawng ni sa wa nhtawm hpang hkan ai sin langa dap bai hkan nang nga ai. Shing rai hkawm nga ai aten tup pahtau dum garu nga sai. 10Rai ti mung Yawshu gaw shi a masha ni hpe, shi bai hkang dat ai aten du hkra n jahtau garu na matu mung, ga hkaw mi mung n shaga shapraw lu na lam hkang dat wu ai. 11Shing rai dai Madu a Ga Shaka Sumpu hpai let mare kalang shinggrup da na lam dai masha hpung ni hpe tsun wu ai. Dai hpang shanhte mung dap de nhtang wa nhtawm shana nga shalai kau ma ai.
12-13Yawshu gaw hpang jahpawt manap jau jau rawt nna, shawng shani e hkang da ai hte maren, hkinjawng ni hte hpyenla ni dai mare hpe lahkawng lang ngu na hkawm shinggrup ma ai gaw: yawng a shawng e lam shawng sin langa dap, dai hpang pahtau sanit dum ai hkinjawng sanit, dai hpang dai Madu a Ga Shaka Sumpu hpai ai hkinjawng ni, hte hpang jahtum hta hpang hkan ai sin langa dap ni rai nga ai. Ndai aten tup hta pahtau dum garu nga sai. 14Lahkawng ya ngu na shani e mung mare hpe kalang grup wang shinggrup kau da nna dap de bai nhtang wa ma ai. Dai zawn kru ya du hkra shanhte galaw ma ai.
15Sanit ya ngu na shani e chyawm gaw nhtoi nnan htoi wa yang, shanhte rawt nna shawng na zawn dai mare hpe hkawm shinggrup nhtawm sanit lang bat ma ai; dai shani e chyu sha shanhte sanit lang bat shinggrup ma ai. 16Sanit lang bat grup ai lang hta hkinjawng ni pahtau dum garu dat hkyen yang, Yawshu gaw shi a masha ni hpe jahtau garu dat na hkang dat wu ai. Shi gaw, “Dai Madu nanhte hpe ndai mare jaw ya manit dai!,” ngu nna tsun wu ai. 17Dai Madu hpe hkungga nawng jau ya ai hku nna dai mare hte dai hta rawng marawng ni hpe tsep kawp jahten kau lu na rai myit dai. Shawa num Rahab hte shi a nta na nga manga ni chyu sha lawt lu na rai ma ai; hpa majaw nga yang, Rahab chyawm gaw anhte a kin-yu ni hpe makoi da ya mi ai. 18Rai ti mung dai jahten kau na arai hpa hpe mung nanhte la lu na myit dai n rai; nanhte gaw shing re ai amu galaw hkrup myit dai rai yang Israela dap hpe ru yak tsin-yam tsindam hte hten byak ai lam jahkrum na rai myit dai. 19Aja gumhpraw, magri mang hte hpri rai ni hte galaw ai arai hpa rai tim, dai Madu a matu san da ya na rai myit dai. Dai gaw dai Madu a sut dek hta bang da na rai nga ai,” ngu nna tsun wu ai.
20Shing rai hkinjawng ni pahtau dum dat mu ai hpe shawa masha ni na ma yang, shanhte ja ja jahtau garu dat mu ai hte mare bunghku ni daw ru mat wa nga ai; dai hpang hpyen luksuk ni yawng mung dai mare de da nga ai kawng ang ang de lung wa nhtawm dai hpe madu la ma ai.#Heb 11:30. 21Dai mare kata na numsha lasha kaji kaba, sagu dumsu hte lawze nga manga mahkra hpe shanhte a nhtu hte sat kau ma ai.
22Shaloi Yawshu gaw kin-yu sa yu ai yan hpe, “Shawa num a nta sa nna shi hpe nan ga sadi jaw da manit dai hte maren shi hte shi a dinghku masha ni hpe woi wa marit,” ngu nna tsun wu ai. 23Dai rai nna shan mung sa nhtawm Rahab hte shi a kanu yan kawa, kahpu kanau ni hte shi a dinghku na nga manga hte hpe mung woi wa ma ai. Shan gaw dinghku masha hte mayam num mayam la ni yawng mayawng hpe woi la nhtawm Israela dap makau shim lum ai shara hta tawn da ma ai. 24Dai hpang, aja, gumhpraw, magri mang hte hpri ni hte galaw ai arai ni hpe dai Madu a sut dek hta bang da ai hta jan nna dai mare hte dai hta rawng marawng yawng hpe wan n-wu tai mat hkra nat kau ma ai. 25Rai ti mung, Yerihko mare de shi shangun dat ai kin-yu lahkawng hpe shi makoi da ya wu ai majaw shawa num Rahab hte shi a nta masha, makyin jinghku ni a asak hpe Yawshu shalawt ya wu ai. (Shi a amyu matu ni dai ni du hkra Israela mung e nga nga ma ai.)#Heb 11:31.
26Dai aten hta sadi jaw ai dagam ga Yawshu tsun shapraw dat wu ai: “Yerihko mare hpe bai gaw gap na matu shakut ai wa kadai mung dai Madu a man e dagam dala hkrum nga u ga.
Npawt nhpang gaw ai wa kadai mung shi a shadang sha alat mat mat na ra ai;
Mare chyinghka gaw ai wa kadai mung shi a kasha hpungdim mat mat na ra ai.” #1Hk 16:34.
27Dai rai nna Madu gaw Yawshu hte rau nga nga ai rai nna shi a mying gumhkawng ai gaw mung ting hta chyam bra nga ai.
Currently Selected:
YAWSHU 6: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.