TARA AGYI 4
4
Debora Hte Barak
1Ehud si mat ai hpang, Israela amyu masha ni gaw dai Madu hpe yubak bai galaw ma ai. 2Dai rai nna dai Madu gaw shanhte hpe Hazora e hkaw dung ai Hkanani Hkawhkam Yabin a lata de ap kau wu ai. Shi a luksuk hpyen du gaw maigan amyu ni a Haroshet mare hta nga ai Sisera rai nga ai. 3Yabin gaw hpri leng jahku tsa lu ai rai nna, Israela amyu masha ni hpe hkun ning tup gumshem nna kashun kashe du daw sai hkaw hte up hkang wu ai. Shaloi Israela amyu masha ni mung karum la na matu dai Madu hpe hpyi jahtau ma ai.
4Ya chyawm gaw Lapidot a madu jan Debora gaw myihtoi num langai rai nga ai hte dai aten e Israela amyu masha ni a matu tara agyi amu galaw ya nga ai. 5Shi gaw Ehprim bum ga Rama hte Behtela lapran na namhtan hpun nhpang e dung chye chye rai nga ai. Israela amyu masha ni mung shi a daw dan hparan ai amu ni hpe hkam la na nga, dai de sa wa wa rai ma ai. 6Lani mi na aten hta, Debora gaw Naphtali a sali ga Kedesha mare na Abinoam a kasha Barak hpe shaga shangun dat nhtawm shi hpe, “Dai Madu Israela a Karai Kasang gaw ndai hkang da ai ga nang hpe jaw nit dai: ‘Naphtali hte Zebulun amyu bawsang hta na masha mun mi woi nhtawm shanhte hpe Tabora Bum de woi lung wa su. 7Kishon hka makau e nanhte hpe gasat na matu, ngai gaw Yabin a hpyen luksuk na hpyen du Sisera hpe woi sa wa na nngai. Shi gaw hpyen leng ni hte hpyenla ni lu nga ti mung, ngai gaw shi hpe dang kau lu na awng padang nanhte hpe jaw na we ai,’” ngu nna tsun wu ai.
8Shaloi Barak gaw, “Nang ngai hte rau sa na rai yang chyawm gaw ngai sa na nngai; rai ti mung nang ngai hte rau n sa ai rai yang, ngai mung n pru sa na nngai,” ngu nna htan wu ai.
9Shi mung, “Rai sa, ngai nang hte rau sa wa na nngai; rai ti mung dai Madu gaw numsha a lata hta mahtang Sisera hpe ap ya na rai wu ai majaw dai awng padang a matu nang arawng lu na ndai n rai,” ngu nna htan wu ai. Dai rai nna Debora rawt nna Barak hte rau Kedesha de sa wa ma ai. 10Barak gaw Zebulun hte Naphtali amyu bawsang ni hpe Kedesha de shaga la nna masha mun mi mung shi kaw hkan nang ma ai. Debora mung shi hte rau sa wa nga ai.
11Dai aten hta Mawshe a kahkau Hoba a amyu matu hta na Keni masha Hebera gaw Keni masha gale hte hka nna Kedesha makau na Zananim shara na wamyi hpun nhpang e sum gap nna nga nga sai.
12Barak mahtang Tabora Bum de lung wa sai hpe Sisera chye ai shaloi, 13shi a hpri leng jahku tsa hte masha yawng hpe shaga shapraw la nhtawm maigan amyu ni a Haroshet shara kaw nna Kishon hka du hkra hpawng da shangun wu ai.
14Dai hpang Debora gaw Barak hpe, “Sa su! Dai Madu gaw nang hpe woi awn na ra ai! Dai ni na nhtoi hta Sisera hpe gasat dang kau na awng padang shi nang hpe jaw da nit dai,” ngu nna tsun wu ai. Dai rai nna Barak gaw shi a masha mun mi hte rau Tabora Bum kaw nna yu wa wu ai. 15Barak gaw shi a hpyen luksuk ni hte htim gasat wu yang, dai Madu mung Sisera hte shi a hpyen leng ni hte masha ni yawng hpe kashuk kashak, shengmawng shenghkang hte shamak kau ya wu ai majaw Sisera mahtang shi a leng kaw nna yu nhtawm lagaw hte hprawng mat wa wu ai. 16Barak chyawm gaw dai leng ni hte hpyen masha ni hpe, maigan amyu ni a Haroshet shara de du hkra hkan shachyut ma ai rai nna, Sisera a hpyen masha ni nlang langai mi hpe mung n ngam hkra sat kau ai hkrum ma ai.
17Sisera gaw Keni masha Hebera a madu jan Yaela a sum de hprawng shang mat wa wu ai; hpa majaw nga yang, Hazora Hkawhkam Yabin gaw Hebera dinghku masha ni hte ngwi pyaw sim sa lam tawn da nga ai. 18Yaela gaw Sisera hpe hkap tau la na nga pru sa nhtawm shi hpe, “Madu e, shang wa rit, nye a sum kata de shang wa rit, hkum hkrit nga et,” ngu nna tsun wu ai. Dai rai nna shi shang wa nhtawm sumpan grang shingdu e shi hpe makoi da wu ai. 19Sisera gaw shi hpe, “Ngai hpang gara la nngai; chyeju hte lu hka ntsin jaw e,” ngu nna tsun wu ai. Dai rai nna shi mung shanhpyi tau na nga chyu hpaw nna jaw lu wu ai; dai hpang bai makoi da wu ai. 20Shing rai Sisera gaw shi hpe, “Dai sum chyinghka lam e tsap nga u, marai langai ngai ndai yang e masha langai n nga a ni?, nga nna nang hpe san yang, n nga ai ngu u,” ngu nna tsun wu ai.
21Sisera mahtang grai ba nna yup pyaw mat wa wu ai shaloi, Yaela gaw sumdu langai hte sum mailak langai mi la nhtawm dai mailak hpe ga de hkrang mat hkra shi a sha galawp kaw n shai hkra kayat jung ya wu ai. 22Barak gaw Sisera hpe hkan tam hkawm wu yang, Yaela gaw shi hpe sa hkrum nhtawm, “Nang de sa wa rit! Nang hkan tam nga ai wa hpe ngai madun dan na we ai,” ngu nna tsun wu ai. Dai rai nna shi hte rau shang wa wu yang, sum mailak hte baw hkren hkra htinggrang ya nna ga e si taw nga ai Sisera hpe sa mu wu ai.
23Dai shani e, Karai Kasang gaw Hkanani Hkawhkam Yabin hpe dang kau ai awng padang Israela amyu masha ni hpe jaw ya wu ai. 24Shanhte gaw shi hpe shamyit kau lu ai aten du hkra shi hpe grau grau jat nna gasat ma ai.
Currently Selected:
TARA AGYI 4: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.