1 TIMOHTI 3
3
Hpung Na Ningbaw Ningla Ni
1Hpung a ningbaw ningla langai mi tai mayu ai wa gaw mai kaja dik htum ai amu langai mi hpe ra sharawng ai wa rai nga ai, nga ai ga gaw teng man ai ga langai mi rai nga ai. 2Hpung a ningbaw ningla langai mi gaw, mara n kap ai wa, madu jan langai sha lu ai wa, sadi sahka re ai wa, tinang hkum hpe hkang lu ai wa, masa hte hkrak rai nna asak hkrung ai wa, shi a nta hta tsasam manam ni hpe hkap hkalum daw jau na sharawng ai wa; sharin shaga chye ai wa, rai ra ai.#1Tm 5:9; 2Tm 2:24; Tit 1:6. 3Chyaru n len ai wa, adup ajin n re ai wa, rai nna sumnung shingdi ai wa, sim sa ai lam hpe ra ai wa rai ra ai. Shi gaw gumhpraw n marin ai wa rai nna; 4tinang a dinghku hpe atsawm sha up hkang lu ai hte tinang a kashu kasha ni e madat mara hkungga la ra ai lam hkam la lu hkra galaw lu ai wa rai ra ai. 5Masha langai mi gaw shi a nta dinghku hpe gara hku up hkang na lam n chye ai rai yang gaw, Karai Kasang a nawku hpung hpe gara hku lanu lahku lu na rai nga a ta? 6Shi gaw Hkristan nnan tai ai wa mung n rai u ga, shi gaw gumrawng gumtawng ai hta myit tsaw myit dap wa nna Nat Satan hpe zawn jeyang daw dan ai n hkrum u ga, dai makam masham hta myit su kunghpan wa ra nga ai. 7Shi gaw sari jahpoi ya ai n hkrum u ga hte Nat a mahkam hta n hkrat bang wa u ga, garai n kam n sham ai masha ni a hkungga lara ai hpe hkam la lu ai masha langai mi rai ang nga ai.
Hpung Hta Shingdep Shingtau Ai Ni
8Hpungtau ni mung myit ding hpring nna arawn alai kaja ai ni rai ra ai. Shanhte gaw ga mashe n rawng ai ni, chyaru n len ai ni, gumhpraw lam hta lawhpa marin ai myit n rawng ai ni rai lu na hte, 9dai shadan dan da sai makam masham a teng man ai lam hpe myit asan sha hte hkap la manoi ai ni rai ra ma ai. 10Shanhte gaw shawng nnan e chyam dinglik yu ai hkrum nna mara n rawng ai sha awng lawt lai lu ma yang gaw, hpungtau amu gun hpai mu ga. 11Shanhte a madu jan ni mung arawn alai kaja ai ni rai nna shatan nhkan ga tsun n lem ai ni n re ai sha, sari sadang hte hpring nna lam shagu hta myit matu ding ai ni rai lu na rai. 12Hpung tau wa gaw madu jan langai sha lu ai wa rai nna tinang a dinghku hte kashu kasha ni hpe atsawm sha up hkang hpajang chye ai wa rai lu na rai nga ai. 13Tinang a amu bungli hpe atsawm sha galaw awng dang ai hpungtau ni gaw tinang a matu arawng kaja lu ai hte shanhte a Hkristu hta kam sham ai lam hpe nden ja ai myit hte hkaw tsun lu ma ai.
Makoi Magap Da Ai Lam Kaba
14Ngai ndai laika ka nga ai ten hta nang hpang de kade n na yang sa du lu na nngai ngu nna myit mada nga nngai. 15Rai ti mung lama wa ngai alawan n lu du sa wa ai rai yang hkrung nga ai Karai Kasang a hpung ngu ai dai teng man ai lam a npawt hkridun rai nga ai Karai Kasang a nta dinghku hta anhte kaning re ai arawn asam sat lawat hkan sa mai ai lam chye lu u ga, ndai laika hpe ka dat nngai. 16Anhte a nawku htung makam masham a sung htum ai lam gaw gade kaba la nga ai hpe kadai mung ningdang shara n nga ai gaw lawu de na hte maren rai nga ai.
Shinggyim masha a hkum hkrang hte dan pru wa ai hte
ding hpring ai wa rai nga ai lam dai Chyoi pra ai Wenyi e shadan dan sai,
lamu kasa ni mung shi hpe mu lu manu ai.
Shi a lam masha amyu yawng hpe htawn tsun dan manu ai.
Mungkan masha ni shi hpe kam sham masai,
shing rai shi gaw sumsing lamu de shalun la ai hkrum nu ai.
Currently Selected:
1 TIMOHTI 3: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.