1 PETRU 2
2
Hkrung Nga Ai Nlung Hte Chyoi Pra Ai Amyu
1Dai re ai majaw nanhte gaw n hkru n kaja ai lam amyu myu hte masu hkalem ai lam sawt ai lam, manawn masham ai lam hte roi asawng ai ga ni hpe yeng seng kabai kau mu. 2Ma chyangai zawn wenyi hte seng ai jet ai chyu hpe galoi mung hpang gara nga mu. Shing rai nanhte lu ai hte nanhte galu kaba wa nna hkye hkrang la ai hkrum na marin dai. 3Chyum Laika hta, “Dai madu gaw kade daram wa matsan dum lama ai Madu rai nga ai hpe nanhte nan hkam la yu ai hku nna chye manit dai,” nga nna tsun nga ai.#Shk 34:8; Heb 6:5.
4Dai Madu hpang de sa wa marit, shi gaw masha ni e akyu n rawng ai ngu nna lata kau ai ahkrung nga ai nlung rai nga ai; rai ti mung Karai Kasang e lata la ai hpu ging ai nlung tai wa sai. 5Nanhte gaw asak hkrung nga ai nlung ni zawn Karai Kasang kaw sa nna dai wenyi hte seng ai htingnu gaw gap ai hta nanhte ni nan shang lawm jai lang hkam nga mu. Dai shara hta Madu Yesu a marang e wenyi hte seng nna sharawng awng hkap la ging ai shagu hkungga ni hpe Karai Kasang kaw nawng ya na matu chyoi pra ai hkinjawng ni zawn nanhte daw jau na rai myit dai. 6Hpa majaw nga yang, dai Chyum Laika hta mung,
“Ngai gaw hpu ging ai nlung langai mi hpe lata la nna,
dai hpe Ziun bum e njut jahtum na nlung hku ngai jahkrat da se ai,
rai nna shi hta kam sham ai ni kadai mung kaya kahpa hte myit daw myit hten hkrum na n rai,” nga ai.#Esa 28:16; Rom 9:33.
7Kam sham ai nanhte a matu mara ndai nlung gaw grai hpu ging nga ai; rai ti mung n kam n sham ai ni a matu mara chyawm gaw,
“Wahpang gaw ai ni akyu n rawng ai ngu nna sai kau ai nlung gaw,
njut jahtum na ahkyak dik ai nlung tai wa sai,” nga ai.#Shk 118:22; Mat 21:42; Kas 4:11.
8Bai kaga chyum ga langai mi hta,
“Ndai nlung gaw masha ni hpe ahtu kataw shangun na ra ai;
shanhte hpe daw ru hkrat mat shangun ai lunghkrung mung tai na ra ai, nga nna tsun da nga ai.
Shanhte gaw dai mungga hpe n kam n sham ma ai majaw ahtu kataw mat ma ai. Shing re ai gaw shanhte a matu Karai Kasang a myit ra lajang ai lam rai nga ai.#Esa 8:14; Rom 9:22-23; 1Ht 5:9.
9Rai ti mung nanhte gaw lata la ai amyu, Hkawhkam a hkinjawng ni, chyoi pra ai amyu masha ni hte Karai Kasang shi nan madu nga ai ni rai nga myit dai; shing rai lata la ai lam gaw, nanhte hpe nsin kata kaw nna shi a mauhpa nhtoi de shaga bang wa ai wa a hpung shingkang rawng ai magam amu ni hpe shana shabra shabrawng dat ya na matu rai nga ai.#Trj 10:15; Yhn 17:19; Kas 20:28; Ehp 5:8; Kol 1:13. 10Nanhte gaw shawng de kalang mi Karai Kasang a amyu masha ni n rai myit dai; rai ti mung ya gaw, shi a masha ni rai wa manit dai. Shawng de kalang mi nanhte gaw Karai Kasang a matsam dum lama ai hpe n hkap la lu myit dai; ya chyawm gaw hkap la lu manit dai.#Hos 1:9-10; 2:23; Rom 9:25.
Karai Kasang A Mayam Ni.
11Ngai tsaw ra ai ni e, nanhte gaw ndai mungkan hta bu hkawm ai tsasam manam ni hte shingbyi nga ai ni zawn rai nga myit dai rai nna, myit masin hte gasat hkat nga ai hkum shan a kayut ai lam ni hpe galoi mung asum n jaw na matu ngai nanhte hpe hpyi nem dat made ai. 12Tara maigan de na ni nanhte hpe n hkru n kaja ai lam galaw ai ni re ngu nna shadu myit yang, nanhte a kaja ai amu mu lu nna dai Madu bai du sa ai Nhtoi hta Karai Kasang hpe shakawn shagrau mu ga, nanhte gaw shanhte a man e nanhte a arawn alai lam hta tsawm htap kup tsup nga myit ga law. 13Dai Madu a myi man hpe tau nna shinggyim masha hta na ahkang aya lu ai ni a npu e taw nga mu; tsaw dik ai ahkang aya lu ai hkawseng wa a npu e rai ti mung; 14N hkru ai amu galaw ai ni hpe shagrau sha a aw law na matu, shi san da ai mung gyi ni a npu e ataw nga mu. 15Hpa majaw nga yang, nanhte galaw ai mai kaja ai amu ni a marang e machye machyang n rawng ai angawk angak nga nna shaga ai masha ni a ga hpe nanhte shazim kau mu ga, Karai Kasang ra sharawng nga ai. 16Nanhte gaw shanglawt lu ai masha re ai hku nga mu; rai ti mung n hkru n kaja ai lam hpe magap shinggang kau na matu nanhte a shang lawt ahkang hpe hkum jai lang myit, Nanhte gaw Karai Kasang a mayam ni zawn rai nna nga mu. 17Masha shagu hpe hkungga lara di mu; nanhte a kam sham ai hpu nau ni hpe tsaw ra nga mu. Karai Kasang hpe hkrit kamyin nga mu; hkawseng wa hpe mung hkungga lara di mu.
Hkristu A Nni Nkri Hkrum Ai Kasi Ningli
18Shangun ma ni e, nanhte a madu ni a npu e taw nga lu na rai myit dai; matsan dum lama ai hte myit tau ya chye ai ni hpe sha n rai, kajet kaje re ai ni hpe mung hkungga lara ai lam tup hkrak madun dan lu na rai myit dai. 19Nanhte gaw Karai Kasang a myit ra ai lam hpe chye ya nga myit dai rai nna, nanhte n hkam ging ai nni nkri hkam sharang myit yang gaw, Karai Kasang de a matu nanhte hpe shaman ya na marin dai. 20Nanhte gaw tinang galaw shut ai mara a majaw hkam la ging ai arai hpe hkam la ai rai yang, hpa baw shakawn shara mi nga na rai ta? rai ti mung teng man ai hpe galaw nga ninglen nni nkri hkrum sha ai hte machyi sharang nga myit yang gaw, Karai Kasang nanhte hpe de a matu shaman chyeju jaw na ra ai. 21Dai hte maren nanhte galaw hkan sa na matu she, Karai Kasang gaw nanhte hpe shaga la manit dai; hpa majaw nga yang Hkristu shi hkum nan mung nanhte a matu nni nkri hkrum wu ai hte nanhte shi a hkang hta hkan nang lu myit ga, nanhte a matu ningli tawn da nu ai. 22Shi gaw yubak mara galaw yu ai n rai, shi a nten kaw na hkalem ai ga hkaw mi kadai na yu ai n rai.#Esa 53:9; Yhn 8:46; 2Ko 5:21; Heb 4:15. 23Shi roi asawng hkrum ai shaloi, shi bai roi asawng htang ai n rai; shi nni nkri hkam ai shaloi shi jahkrit sharim ai lam n galaw ai sha teng man ai tara agyi Karai Kasang a lata hta shi a myit mada ai lam ni ap da nu ai. #Mat 27:39; Yhn 8:48-49; Heb 12:3. 24Anhte gaw yubak mara hpe kau da nna ding hpring ai hta e hkrung nga lu u ga, shi gaw shi hkum hta nanhte dai hpun ntsa e anhte a yubak mara ni hpe gun la kau nu ai. Shi a nma ni a gawp e nanhte shamai shatsai ai hkrum manit dai. #Esa 53:4-5; Rom 6:2,11; 7:6. 25Nanhte gaw lam dam mat ai sagu ni zawn rai nga myit dai; ya chyawm gaw sagu rem wa hte nanhte a myit masin ni hpe up madu da ya ai wa a hpang e hkan nang na matu shi hpang de bai woi du wa manit dai.
Currently Selected:
1 PETRU 2: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.