Zak 2
2
Kontan to prosin kouma tomem
1Mo bann frer ek ser, kouma bann dimoun ki met zot lafwa dan Zezi Kris, nou Segner glorie, fode pa ki zot azir avek parsialite. 2Asipoze enn dimoun ris avek bel-bel bizou ek zoli linz rant dan lasanble, e enn lot dimoun pov sal-sal osi rantre, 3si zot pran plis kont seki bien abiye la e dir li, “Ala enn plas-doner pou twa,” me zot dir lot la, “Debout dan kwin laba,” oubien “Asiz anba kot mo lipie,” 4la, zot pe fer enn diskriminasion ant zot, e zot zizman finn baze lor move rezonnman. 5Mo bann frer ek ser bieneme, ekout mwa: Bondie finn swazir bann ki pov dapre lemonn pouki zot vinn ris dan lafwa e posed rwayom ki finn promet bann ki kontan li. 6Me zot finn dezonor bann pov. Kisannla ki kraz zot e trenn zot devan tribinal? Pa bann ris? 7Pa bannlamem ki finn insilte e sali sa zoli nom ki finn donn zot la?
8Bien sir, zot fer bien si zot vremem obeir lalwa rwayom dapre Lekritir, “To bizin kontan to prosin kouma tomem.” 9Me si zot montre diskriminasion, zot komet enn pese e lalwa pou kondann zot kouma enn kaser lalwa. 10Parski dimoun ki obzerv lalwa me fel lor enn sinp ti detay, li pou koupab fel tou lalwa. 11Dimoun ki dir, “To pa komet adilter,” dir osi, “To pa fer krim.” Asterla si to pa komet adilter me fer krim, to finn kas lalwa. 12Zot bizin koze ek azir kouma dimoun ki lalwa pou zize, lalwa ki rann lib. 13Bondie pou san pitie letan li ziz dimoun ki pa finn montre pitie; pitie gagn laviktwar lor zizman.
Lafwa san okenn aksion li mor
14Mo bann frer ek ser, ki sa servi zot si kikenn pe dir, “Mo ena lafwa,” si li pa prouv li par bann aksion? Eski sa kalite lafwa la kapav sov twa? 15Sipoze enn frer ou enn ser pena nanye pou met lor li ou nanye pou manze toulezour. 16Ki sa servi si to dir zot: “Orevwar, port zot bien; abiy zot bien e manze vant plin!” - si to pa donn zot seki neseser pou zot viv? 17Li parey avek lafwa: si li pena okenn bonaksion, li enn lafwa mor.
18Kikenn kapav dir; “Enn dimoun ena lafwa e enn lot ena aksion.” Mo pou reponn li: “Montre mwa to lafwa san bann aksion! Abe mwa, mo pou prouv twa mo lafwa par mo bann aksion.” 19Zot krwar ki ena enn sel Bondie; zot fer bien. Mem bann demon osi krwar sa - e zot tranble avek laper. 20Zokris! To anvi kone si lafwa san bann aksion li initil? 21Get Abraam, par so bann aksion ki Bondie finn deklar li zis letan li ti ofer so garson Izaak lor lotel. 22To trouve, so lafwa ek so aksion mars ansam; so aksion prouv so lafwa dan Bondie. 23La, nou trouv realizasion pasaz Lekritir ki dir: “Abraam finn krwar dan Bondie ki finn rekonet li kouma zis,” e zot finn apel li kamarad Bondie. 24To trouve, enn dimoun li zistifie par bann aksion e pa zis par lafwa. 25Li parey dan ka prostitie Raab ki li osi ti zistifie par so aksion letan li ti akey bann mesaze e ti ranvway zot par enn lot sime. 26Parey kouma enn lekor san lespri li mor, nou lafwa osi san bann aksion, li mor.
Currently Selected:
Zak 2: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.