2 Pi 2
2
Fos profet
1Me finn ena osi bann fos profet ki finn leve parmi lepep, parey kouma pou ena fos profeser parmi zot ki, dan kasiet pou donn fos lansegnman. Zot pou introdwir bann fos doktrinn destriktif e zot pou mem rezet Lemet ki finn sov zot. Akoz sa, zot pou al ver zot prop destriksion. 2Anplis, boukou dimoun pou swiv zot move sime, e akoz sa bann profeser la, lezot pou dir move kitsoz lor sime laverite. 3Akoz zot gourmandiz larzan, sa bann dimoun la pou explwat zot par bann koze malonet. Depi lontan, zizman finn fini pase lor zot e zot destriksion pa lwin. 4Bondie pa finn epargne bann move anz, me finn zet zot dan lanfer, finn ansenn zot dan nwar ziska zour zizman; 5e li pa finn epargne sa vie lemonn la, me li finn avoy enn gran deliz lor so bann move abitan, e li finn sov lavi wit dimoun parmi Noe, enn predikater lazistis. 6Apre li finn kondann lavil Sodom ek Gomor e li finn detrir li ar dife. Sa pou servi zot lexanp lor seki arive avek bann ki fer pese. 7Li finn delivre Lot ki ti drwat, e ki ti akable par fason imoral ki bann peser ti pe viv. 8Zour apre zour sa zom drwat la finn viv parmi sa bann peser; li ti tourmante par zot move aksion ki li ti trouve ek tande, 9alor Lesegner kone ki fason pou delivre bann dimoun drwat depi zot difikilte e kouma li gard bann peser anba so pinision ziska zour zizman; 10spesialman bann ki obeir dezir zot prop laser e mepriz lotorite Bondie.
Sa bann fos profeser, zot arogan ek latet dir, zot pena respe pou kreatir lesiel e zot pa per pou insilte zot. 11Mem bann anz ki normalman pli for e pli pwisan, zot pa akiz sa bann kreatir lesiel devan Lesegner. 12Me sa bann dimoun la azir dapre zot linstin kouma bann zanimo sovaz ki ne pou apre may zot e detrir zot; zot insilte ek atak bann ki zot pa konpran, zot pou gagn zot destriksion. 13Zot pou gagn pinision pou dimal ki zot finn fer. Zot pran plezir pou amenn move lavi dan plin lizour. Kan zot partisip dan zot fet, zot prezans degoutan, fer onte e zot pran plezir koz manti. 14Zot lizie zis bon pou komet adilter e zot pa fatige fer pese. Zot antrenn dimoun feb dan piez. Zot leker finn bien antrene pou kontan kas. Malediksion lor zot. 15Zot finn kit vre sime, zot finn perdi dan sime Balam, garson Bosor ki ti kontan larzan ki gagne par move travay, 16me li ti gagn enn leson pou so pese. Enn bourik ti koze ar profet la avek enn lavwa imin e so foli ti arete.
17Sa bann dimoun la, zot kouma bann lasours ki pena dilo, bann niaz dirize par devan siklonn. Enn plas dan marenwar finn fini rezerve pou zot. 18Zot fer bel-bel diskour ki pena sans; zot servi zot dezir obsenn pou piez lezot ki fek fini sap dan piez bann ki amenn move lavi. 19Zot promet laliberte, kan zotmem zot esklav pouritir; parski enn dimoun li esklav seki dominn li. 20Ofet dimoun ki finn kapav sap dan bann move inflians lemonn akoz zot finn konn Zezi Kris, nou Segner ek Sover, apre zot remay dan lak, zot sitiasion pou vinn pir ki avan. 21Li ti pou meyer ki zame zot ti konn sime lazistis, ki apre ki zot finn konn li, zot tourn zot ledo ar bann komannman sakre ki finn transmet zot. 22Seki proverb dir, samem ki finn ariv zot:
“Lisien retourn dan so vomi,”
“Begn koson kouma ou anvi. Kouma larg li, li al roul dan labou.”
Currently Selected:
2 Pi 2: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.