1 Pi 5
5
Pran kont troupo Bondie
1Asterla momem, kouma enn ansien e kikenn ki temwin bann soufrans Kris e ki ena so par dan laglwar ki pou revele, mo fer enn lapel ar bann sef legliz ki la parmi zot: 2pran bien swin troupo Bondie ki anba zot responsabilite; vey lor li, pa par obligasion me par amour; fer zot travay par devouman e non pa par intere. 3Pa fer dominer ar bann ki anba zot, me vinn enn lexanp ki zot troupo pou kapav swiv. 4E kan sef berze paret, zot pou resevwar enn kouronn laglwar ki pou briye pou touzour.
5Zot osi, bann zenn, zot bizin aksepte lotorite bann ansien. Zot tou bizin met lor zot enn tabliye ki apel limilite pou zot servi zot kamarad, parski Lekritir dir: “Bondie li kont bann ki ena lorgey, me li donn so lagras bann ki viv dan imilite.” 6Zot bizin kourb zot devan lame pwisan Bondie, pouki li kapav lev zot lao-lao kan ler arive. 7Met tou zot traka lor li, parski li pran zot swin. 8Pa fer zes; veye kouma bizin! Zot lennmi diab pe fer letour kouma enn lion feros; li pe rod kikenn pou devore. 9Res touzour ferm dan lafwa e reziste li, parski zot kone ki zot bann frer ek ser dan lemonn antie pe pas par mem kalite soufrans. 10Zot ena pou soufer ankor inpe letan. Bondie, ki lasours lagras, ki finn apel zot pou so laglwar eternel dan Zezi Kris, pou limem beni zot, donn zot lafors e ranz zot lexistans lor enn baz solid. 11Pouvwar pou li pou touzour. Amen.
Dernie salitasion
12Mo pe ekrir zot sa ti let la avek led Silas, ki mo konsider kouma enn frer serye, pou ankouraz zot e pou sertifie ki samem vre lagras Bondie; zot bizin tini ferm ladan. 13Legliz dan Babilonn avoy zot so konpliman; Mark osi parey. 14Salye e anbras zot kamarad. Ki lape res ar zot tou ki pe viv dan Zezi Kris.
Currently Selected:
1 Pi 5: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.