Toukepra 2
2
Mosa Penuokelie
1Siro Levi kinumia puo pra di Levi nuomiapfü puo lielie. 2Thenupfüe nuonipfülie di thepfunuomia puo penuolie; mu hapfüe unuoyo zivikecü ngulie tse khrü se puo keviese bata. 3Sidi puo kevie salie kenjüta tse, puo la tekhrierha puo pfhülie, di alakatar mu seitsa pie süu nyhülie; sidi unuoyo pie sünu shülie di süu pie kerü khie tekhrie donu shüwa. 4Mu puo pie kedipuo chüwatuo shikecü sishütuo üdi puo üpfü bu kepecie nu tha.
5Süki Faro nuopfüe dzü rülutuoü kerü nu tsur, mu puo zetuopfüko kerü khie rühou tuo; ru puoe tekhrieko donu merhau zhükecü ngulie di süu chüpie phirnu di puo zetuopfü ketseshü; 6sidi puoe süu hieshü ru unuoyo ngulie; mu harie; unuoyo sü krazhü. Sitse puoe unuoyo ngu puo noumezhielie di sie, “Hayo sü Ibrimia nuo puote.” 7Sitse puo üpfü Faro nuopfü ki, “A bu vo unuoyo thekepie n tsüketuo la Ibrimiapfü donu nuozemiapfü puo kie ze vortieya me?” 8Sitse Faro nuopfüe puo ki, “Vocie,” si. Süla thenupfü vo unuoyo zuo kieshü. 9Sitse Faro nuopfüe puo ki, “Nuo hayo ze volie, di puo thekepie a tsücie, siro a n zha chüshü n tsütuo,” si. Süla thenupfü unuoyo zelie di puo thekelie. 10Mu unuoyo memielie, sitse puoe unuoyo ze Faro nuopfü ki vorshü tse puoe pie puo nuo chüta; siro puoe puo zapie Mosa chü, mu puoe sie, “Kekreilamonyü a dzü nunu puo shü parkelie la.”
Mosa Ta Midian nu Kevo
11Mosae phichülie tse, khunhie puo puo themiako ki kho di uko pie kemesiko mehoshü; mu puoe Ijiptmia puoe puo themia Ibrimia puo vüketha ngu. 12Puoe lutsahatsa mehoshü, mu miapuorei ngu mo ru puoe Ijipt-u dukhriwa; di huocanyo nu puo keviewa. 13Süsienhie puoe re pra ru; harie, Ibrimia kenie keze keshü tha; ru puoe kekrükecüu ki, “No kiüdi n ze Ibriu vüya ga?” 14Sitse puoe sie, “Supuonie n bu hie mho kedi mu capimia chüshü ga? No Ijipt-u dukhrikewa tuoi a dukhriwa nyüya me?” Sitse Mosae michie di, “Mha hau mia si tou bate,” icü lelieta. 15Siro Faroe süu sishü tse, Mosa dukhrikewa leta.
Derei Mosae Faro kinu tata di Midian kijü nu bata; mu puoe dzükhou puo khieki balie. 16Siro Midian nu zievo-u puo nuo thenumia thenie ba; mu uko vor di dzüü, siro uko puou kuoko bu krieketuo la dzü pie dzükriebouko nu rei shüshü. 17Sitse Tekuokepfheko vor di uko whuowa; derei Mosae siethalie di uko khruohishü, di dzü pie uko kuoko tsüshü. 18Ukoe uko puo Reuel ki vor tse, puoe sie, “Kimhie di thie nieko vor zi haita ga?” 19Sitse uko sie, “Ijiptmia puo tekuokepfheko dzie nunu hieko shüphrashülie, mu hieko la dzü rei üshü di hieko kuoko dieshü.” 20Sitse puoe puo nuopfüko ki, “Siro puo kirapuo ba ga? Nieko kiüdi themiau khawa ga? Puo kieshülie, puo bu niekhrüda cülieketuo la,” sita. 21Mu Mosa rei themiau ze baketuo puo neilie, mu puoe puo nuopfü Zipora pie Mosa tsüshü. 22Puoe thepfunuomia puo penuoshü, puo za thopie Gershom chülie, kekreilamonyü puoe sie, “Ae mia kijü nu rüsomia chü di lhou,” ikecü la.
23Zha kekra sie Ijipt kediu siata. Siro Israelmiakoe miadie chü di meheimelozhü zo, sidi kekhruohi cha, sitse uko kedie kechü la rükhruokeshüko Ukepenuopfü tsolie. 24Siro Ukepenuopfüe uko meheimelokeshüko sishü tse, Ukepenuopfüe Abraham, Isak mu Jakob ze dietseidiekho pie ketuou rükralie. 25Siro Ukepenuopfüe Israelko mehoshü, sidi Ukepenuopfü uko rüli leshü.
Currently Selected:
Toukepra 2: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More