Pethakeshüu 2
2
U Thuo Ketheguo Keba Kemevi Kejü
1A a thuo a rüchü di sie, “Tsie vorlie, a u neikecüko methashütuo, nie thuo nie keneiu chülie,” si. Derei harie, hau rei kemethuo zo. 2Ae sie kenyü üse, “Süu kenya zo” mu u keneiu üse, “Süu se kedipuo chülie ga?” sishü. 3A a nou nu kedipuo mhie di zu pie a chü a mo bu ketheguoliete shikecü pfhü sie, sikecü ki mhasi bu a nou taze tuo; tsiu themianuo bu puo kerhei ki tei khro kedipuo chü ro vituo shicü ngutuo üdi kenya mhatho rei chütuoü sie zo. 4A mhatho kezhakechako chü, a a la kiko chü, tsiu khubelie cielie; 5A tezie tsiu nhasi zie chülie; tsiu süko nu nhasibo puo rhi kekreikreicüko pete pelhoushülie. 6A a la rüzieko hielie, ketsa nu seibo memiekezhüko petseketuo la. 7A a la kituo thepfu rei thenu rei khrülie, a ki nu penuokelie kituo rei nyi; siro Jerusalem nu a mhodzü ketuo pete ki rei ae khunuo kecükezha kro krakuocü nyi. 8A a la rakachü mu suna tsiu kedimia kinyi mu rünako kengulie; ae ü kechü thepfumia rei thenumia rei tsiu uchü umo menguko siro a pelipfümia kekra rei nyi.
9Süla ae Jerusalem nu a mhodzü ketuo pete ki rei zha mu vikuo; süsie a mhasi rei a ze tuo. 10A mhi-e kedipuo puo nei shiü, a süko khawa mo, a a nei a nyü kechü nunu a nou kerei seta mo, kekreilamonyü a noue a mhatho peteko nunu puo neilie. Mu süu a mhatho zhakhrau zo. 11Sidi a a dzie pie chükelie peteko tsiu a mhachükelie mhathoko mehoshü; mu harie, mha pete kemethuo zo, tsiu teikhrie whuo ketuo mhie zo,#2:11 Moro teikhrie pie u ca kechü tuoi Hos 12:1 meholie. siro niakiu khro mhapuo kemevi ba mo.
Mhasi mu Kenei pie Kepenuopfü Nei Kechüu Ketsü
12Süla ae mhasi, kenya, tsiu mecie kemo mehotuoü sie, kekreilamonyü kediu sie vorkezhüu kedipuo chülie vi ga? Thiedzü chükewau zotie. 13Sitse ae kezie-e kezei ki vikuokecü tuoi, mhasi-e mecie kemo ki vikuokecü ngulie.
14Mhakesimia mhi puo tsü nu tuoya;
derei mhalekemomia kezei nu tuoya.
Sirei a sikelie mha puoe peteko gei vorya. 15Sitse a thuo a rüchü di sie, “Mhalekemomia gei kevor-u a gei rei vor zotuo; di siro kiüdi a bu mhasi sete shi?” siya. Tsiu a thuo a rüchü keba hauha rei kemethuota zo. 16Kekreilamonyü mhalekemo-u ki rei mhakesiu rükra sei zocü chüya mo; süusü sikelie, vorketuo teiko nu mha peteko rükra mota zotuokecü la. Mhakesimia kimhie di siataya shi, mhalekemomia mhie di zo! 17Süla a kelhouu ngu mecüta zo, kekreilamonyü tei khro mhathomhachü pete a la nousuo zo; mha pete rei kemethuo zo tsiu teikhrie whuo ketuo mhie zocü la.
18A niaki khro mhachüketuo a mhathoko pete ngumecüta zo, kekreilamonyü a süko khapie zhü a sie kevormia tsüwatuocü la. 19Mu sükoe mhakesimia puo tuo mo mhalekemomiatuo shi supuoe silie ta? Sirei ukoe a mhachüpie kezhü peteko, tsiu niaki khro a mhasi se kechü pete kekhatuo. Hau rei kemethuo zo. 20Süla tei khro mhakechü pete kemerü jü zokecü la a a nou khapie u chameziekecü nu shüwa. 21Kekreilamonyü mia puoe mhasi, kesikele mu thedo kevi se mhachüshü; di süu khapie chü kemomia puo tsüwaya. Hau rei kemethuo tsiu mha kesuo se puo zo. 22Themia niaki khro mhakechü pete nu mu kemezhie di mhakechüko nu kedipuo ngulieya ga? 23Kekreilamonyü teisozha puo pete nu thenou kesuo, tsiu puo mhathoe puo keyhukezhie zo; theva gei rei puo noue rüleilieya mo. Haha rei kemethuo zo.
24Themiae mhacümhakrie tsiu puo mhathomhachü nu puo neikelie ki mha kevi puo rei jü. Hau Kepenuopfü dzie nunu vorkecü a ngushü; 25kekreilamonyü puo sa mo di supuonie mhacümhakrielie morei puo neilie vi ga? 26Kepenuopfüe puo neimia gei mhasi, kesikele, tsiu thenou kenei khashü tsüya derei kephoumamia la we puoe kengulie tsiu pfhepie zhü di se Kepenuopfü mhodzünu themia keviu tsüwaya. Hau rei kemethuo zo tsiu teikhrie whuo ketuo mhie zo.
Currently Selected:
Pethakeshüu 2: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More