Levítico 25
25
Sjabilal ti oy c'usi sc'oplal ta xcuxe xchi'uc sjabilal ti pojele
1Ti Diose xi laj yalbe ti Moisés ti c'alal laj sc'opon talel ta vits Sinaie:
2“Xi xcholet xavalbe ya'i ti israeletic jech c'u cha'al li'e: C'alal mi la'ochic xa batel ta banomil ti calojboxuc ta xcaq'ue, ti banomile tsots sc'oplal ta xcux ta sventa stoyel xi'el ti Diose. 3Xu' xats'unubajic ti ta avosilique vaquib no'ox jabil sjalil. Ja' jech xtoc vaquib no'ox jabil sjalil xu' xatuc'ulanic ta setel staquinal sc'obtac ti a'uvaique, ti ta xatsobbeic ti sate. 4Va'i un, ti ta yucubal jabile, ac'o xa xcux ta j'ech'el ti banomile ta sventa stoyel xi'el ti Diose. Mu xa c'usi xats'un ta avosil, mi ja'uc xa xatuc'ulanic ta setbel staquinal sc'ob ti a'uva ti jabil taje. 5Mi ja'uc xa xatsobic xtoc ti trigo ti ta xvoc' talel stuc ti c'alal sjabilal xa ta xcux ti banomile. Mi ja'uc xa xatsobic ti sat uva ti ta xac' stuc ti c'alal mu'yuc xa tuc'ulanbil ta setbel staquinal sc'obtaque. Yu'un ti banomile tsots sc'oplal ac'o xa xcux ta j'ech'el. 6Ti c'usi ta xch'i talel ti c'u sjalil ta xcux ti banomile, xloc' o lec ave'elic xchi'uc ti amosovtaque, ti ame' mosovtaque, ti j'abteletic avu'une, ti jyanlumetic ti nacalic ta atojolique, 7scotol ti chon bolometique, ti colemal te'tical chonetique. Yu'un scotol ti c'usi ta xch'i talel ta banomile, ja' ta xtun ta sve'elic.#Ex 23.10-11.
8“Tsots sc'oplal ta xchapic batel vucub xemuna yu'un ti jun jabile, ti xcaltique, ja' vucub jabil ti volbil ta chapel vucub veltae, ti ja' ta xc'ot ta chapel ta baluneb yoxvinic (49) jabil ta scotole. 9Va'i un, ti ta slajunebal sc'ac'alil yu'un ti yucubal ue, ti ja' o Sc'ac'alil ti Ch'aybil ta xc'ot ti Mulile, ta xich' oq'uisanel ti xulub chij ta sjunul ti jteclume. 10C'alal ta sta ti slajunebal yoxvinic (50) jabile, ja' sjabilal ti ch'ul lequilale, ti xachi ta xavalique: ‘Ja' sjabilal ti pojel coltaele.’ Yu'un ta xavalbeic sc'oplal xtoc ti ja' spojel scolelic yu'un scotol ti jnaclejetic yu'un ti jteclume. Scotol ti viniquetique ta sutic batel ta stojol ti yuts' yalalique, xchi'uc ta xcha'ich'ic ti sbanomilique. 11Ti slajunebal yoxvinic (50) jabile, ja' me sjabilal avu'unic ti pojel colele. Taje, mu xa c'usi xats'unic. Mi ja'uc xa xatsobic ta xtuch'el ti trigo ti bu voc' talel stuque. Mi ja'uc xa xatuc'ulanic ta setbel staquinal sc'ob ti a'uvaique. Mi ja'uc xa xatsobbeic ti sate. 12Yu'un ja' jun ch'ul jabil, xchi'uc xtoc ti pojel colel avu'unique. Yu'un c'ajomal no'ox ta xatun xalajesic ta sve'el ti c'usi ta xch'i talel stuc yu'un ti banomile.
13“Ti sjabilal ti pojel colel taje, acotolic ja' o ta xacha'ich'ic yan velta ti avosilique. 14Mi oy buch'u ta xchon, mi ta sman jsepuc osil ta stojol ti yane, ma'uc me snop ti sna' xa c'usi xut sba xchi'uque. 15Va'i un, ti buch'u ta smane, tsots sc'oplal ac'o stoj jech c'u cha'al stojol ta sc'an ti c'alal mu to xc'ot sc'ac'al ti sjabilal ti pojel colele. Yu'un ti buch'u ta xchone, xu' xi ta sc'anbe ti stojol ta scoj ti mu to ta sts'aqui sc'ac'alil ti c'u sjalil ta xich' ts'unel ti ts'unubale: 16C'alal mi ep to jabil sc'an stsuts ti ta xich' ts'unel ti ts'unubale, ja' jech ep ta xich' tojel. Yan ti mi jutuc xa sc'an stsuts ti jabile, tsulul xa ti stojole. Yu'un ti c'usi ta xich' chonele, ja' ti jaypoj ts'unubal ta xloq'ue.
17“Mi junuc xu' ta xa'ilbajinvan xchi'uc ti va'i s'elan taje. Aq'uic ta q'uelel ti biq'uit avac'oj abaic ta stojol ti Dios avu'unique. Yu'un vu'un ti Ajvalil Diosun avu'unique. 18C'otuc ta pasel avu'unic ti oy c'usi jbel tsots albil sc'oplale. Chanic ta spasel ti c'usi caloje. C'otuc ta pasel avu'unic yo' jech jun avo'ntonic ta xach'i xac'opojic ti ta lum taje. 19Jech ti banomile lec ta xac'be sat ti ts'unubile. Jun avo'ntonic xtoc ta xacuxiic yu'un, ja' to ti c'uxi ta x'ech' lec avo'ntonic ti ta xalo'beic ti sate.
20“Xu' nan ti xi ta xlic ajac'be abaique: ‘¿C'usi ta jve'tic ti c'alal ta xc'ot sc'ac'alil ti vucub jabile, ti mu ja'uc xu' ta xijts'unubaje, ti mu'yuc ta jtsobtic ti sat ts'unubale?’ 21Ac'o mi jech un, vu'un ta jts'uiltas ti slajeb svaquibal jabile yo' jech ta xloc' lec ave'elic ta sventa ti oxib jabil sjalile. 22Va'i un, ja' ta xave'ilanic liquel ti sat ts'unubil ti q'uejbil xa avu'unique. Yu'un oy to ti c'alal ta xlic ats'un ta ach' ti c'alal ta sta ti xvaxaquibal jabile. Va'i un, ja' ta xave'ic batel ti c'alal ta xc'ot sc'ac'alil ti sbalunebal jabil ti sat ts'unubil ti q'uejele, ti c'alal ta xloc' talel ti yan ach' sat ts'unubile.
23“Yu'un xi s'elan sc'oplal ti banomil ti mu stac' chonel ta j'ech'ele: yu'un ti banomile, ja' cu'un. Ja'uc ti vo'oxuque, naca j'ech'el-beoxuc ta xa'ech'ic ta stojol ti co'ol s'elan jun cajch'om-naoxuque. 24Ja' yu'un un, buyuc no'ox ti banomil ti abisoj abaic ta yajvale, sc'an ta xavac' aveic ti xu' ta xcha'man ti yajval ta ba'yel to oxe.
25“Mi oy jun avinquilel ti com ta me'un ta j'ech'ele, mi ta xchonbot ti sbanomile, jech ti yuts' yalal ti mu yanuc xil sbaic xchi'uque, xu' ta sman sutel yo' jech ta xcha'ich' sutel ti laj xchon ti yuts' yalale.#Rt 2.20; 4.1-10.
26“Mi oy bu ta xc'ot ta pasel ti mu'yuc yuts' yalal ta x'ich'bat sutel ti yosile, ti xu' ta xich' sutel ti stuque, ja' tsots sc'oplal mi laj sta ta tsobel ti c'u yepal ta xtune. 27Va'i unbi, ta xich' t'unel ti c'u xa sjalil laj xchone. Ta sutes ti buch'u laj sman ti banomile. Ta sutesbat xtoc ti staq'uin ti ja' stojol svocole, xchi'uc ta xcha'ich' sutel ti sbanomil ti laj xchon to oxe. 28Yan ti mi mu'yuc laj sta ti c'u yepal ta sc'an yo' jech ta xich' sutel ti yosile, yich'oj ta xcom ti jman-osile, ja' to ti mi sta sjabilal ti pojel colele. Ja' to jech ta xc'ot sc'ac'alil ta xcux ta xcol ti osile. Jech ti buch'u laj xchone, xu' ta xcha'ich' sutel.
29“Mi oy buch'u ta xchon jbej na ta jteclum ti joybil xa ta moque, xu' to ta xcha'man ti mi ts'aqui ti c'usi ora ta xc'ot ti jun jabile xchi'uc ti c'usi ora ta xc'ot sc'ac'alil ti laj xchone. 30Yan ti mi oy bu ta xc'ot ta pasel ti mu'yuc xa tal c'anbatuc yu'un ti buch'u nacal to oxe, ja' jech xtoc ti loc' xa ti jun jabile, com o xa ta yu'un xchi'uc yalab xnich'nab ti buch'u laj smane. Mu'yuc xa ta sut ti c'alal sta sjabilal ti pojel colele. 31Yan ti naetic ti oy ta jteclum ti bu mu'yuc joybil ta moque, yu'un co'ol sc'oplal xchi'uc ti osiletic ti oy ta jamalaltic ti xi s'elan ti sc'oplale: xu' ta xich' ich'el sutel, xchi'uc ta xich' manel sutel ti c'alal ta xc'ot sjabilal ti pojel colele.
32“Ti levitaetique, oy sc'oplal ti xu' ta xcha'manic sutel ti naetic ti oy ta yutil slumalique. 33Ti mi ja' jun levita ti laj xcha'ich' sutele, va'i un, ti c'alal ta sta sjabilal ti pojel colele, tsots sc'oplal ta xicta comel ti nae, ac'o batuc ta jteclum ti bu oy ti yosile. Yu'un ti levitaetique, c'ajomal no'ox ja' yosilic ti oy ta stojol ti israeletic ti snaic ti oy ta jteclume. 34Ti banomiletic ti ja' yavil sve'eb sts'unubic ti levitaetic ti oy ta yutil sbanomilique, mu stac' chonel. Yu'un ja' yu'unic o ta j'ech'el.
35“Mi oy jun avinquilel ti me'un com ta j'ech'el ti tal snaban sba ta atojole, tsots sc'oplal ta xacolta jech c'u cha'al junuc jyanlum ti ja' jun j'ech'el-be no'oxe. Ta xachi'in ta naclej.#Dt 15.7-8. 36Mu'yuc c'usi xapojbe. Mi ja'uc xavac'be stoj sjol ti c'usi ta xch'amune. Ja' me ac'o ta q'uelel ti axi'taoj ti Diose. Chi'ino ta naclej ti avinquilele. 37Mu xac'anbe sjol ti ataq'uin ti ta xavac'be xch'amune,#Ex 22.25; Dt 23.19-20. Mi ja'uc xatoyesbe stojol ti sve'el ti ta xavac'bee. 38Yu'un vu'un ti Ajvalil Diosun avu'unique, ti laj jloq'uesoxuc talel ta Egiptoe yo' jech ta xcac'boxuc ti Canaán banomile, yo' jech ta xic'ot ta Dios avu'unic.
39“Mi oy jun avinquilel ti com ta me'un ta j'ech'el ti nabal ta atojole, ti lic xchon sba ta atojole, mu me xavac' abtejuc jech c'u cha'al junuc mosovil. 40C'otuc no'ox avu'un jech c'u cha'al junuc avaj'abtel, mi mo'oje, jech c'u cha'al junuc jch'om-na c'otuc avu'un. Ac'o abtejuc ta atojol ja' to ti mi c'ot sjabilal ti pojel colele. 41Ts'acal to un, xu' xa ta xictaic comel ti anae xchi'uc ti xnich'nabe yo' jech ta sutic batel ta stojol ti snitilultaque, xchi'uc ta yosilal ti yuts' yalaltaque. 42Yu'un ti stuquic taje, ja' cajtuneltac. Yu'un laj jloq'uesic talel ta Egipto. Yu'un tsots sc'oplal mi ja'uc ta xich' chonel jech c'u cha'al junuc mosovile. 43Mu xavilbajin ta j'ech'el ta yac'bel yich' svocol. Mo'oj, ac'o vinajuc ti axi'taoj ti Diose.
44“Mi ta xac'an ti oy amosovtaque, mi viniquetic, mi antsetic, mano talel ta yan muc'tiquil jteclumetic ti oy ta jujujote. 45Ti mi xac'an xtoque, xu' xaman ti jyanlumetic ti achi'inojic ta nacleje. Ti xnich'nabic ti xlaj voc'uc ta ateclumalic taje, ja' xu' xamanic yo' jech ta xc'ot ta avu'unic. 46Ma'uc no'ox taje, yo' jech xu' ta xcom ta jbainej rextoil avu'unic ti anich'nabic mi lacham lalajique, yu'un xu' ono'ox ta xtun avu'unic. Ja' no'ox un, mi junuc avu'unic ti israeloxuque ti cajal ta xa'i sba ta yilbajinel ti svinquilel sbaique.#Ex 21.2-6; Dt 15.12-18.
47“Mi ta spas ta jc'ulej jun jyanlum ti nacal ta alumalique, mi junuc ti avinquilelique, ti ja' junuc slac'na ti jyanlume, ti com ta me'un ta j'ech'ele, ti ta xchon sba ta stojol ti jyanlume, mi ta stojol yan jyanlum xtoque, 48oy sc'oplal ti xu' to ta xich' manel loq'uel scoltael ti c'alal xchonoj xa sbae. Xu' to ta xmanat loq'uel yu'un junuc xchi'il ta voq'uel. 49Ma'uc no'ox taje, yu'un xu' to ta xmanat loq'uel yu'un junuc sjuntot, mi yu'un junuc xnich'on sjuntot, mi ja' junuc yuts' yalaltac ti mu yanicuc xchi'uque. Mi mo'oje, xu' ta scolta sba loq'uel stuc ti mi oy c'usi xut sbae. 50Va'i un, xi s'elan ta xich' t'unel lec sc'ac'alil ti buch'u laj sman xchi'uc ti sjabilal ti laj xchon sba talele, ti c'u to sjalil sc'an xc'ot sjabilal ti pojel colele: Ti stojol ta xich' manel loq'uele, ja' ti c'u xa yepal ti sjabilale, xchi'uc ti c'u xa sjalil abteje. Ja' ta xich' co'oltasel jech c'u cha'al ta xich' tojel ti j'abteletique. 51Yan ti mi jal to jabil sc'an xc'ot sc'ac'alil ti pojel colele, ti mi lec ta xa'ie, ja' ta sutes scotol ti taq'uin ti laj yich' ti c'alal laj xchon sbae. 52Yan ti mi jutuc xa sc'an xc'ot sc'ac'alil sjabilal ti pojel colele, ja' no'ox ta stoj comel scolel ti c'u to yepal sc'an xtoj yu'un ti c'u sjalil sc'an stsuts ti jabile. 53Ja' jech ta xich' chapbel sc'oplal jech c'u cha'al junuc j'abtel ti ta x'abtej jun jabil sc'oplale. Mu xavac' ave ti aq'ueloj ta xich' ilbajinele.
54“Yan ti mi mu'yuc xmanat loq'uel ti jech ora taje, ja' to ta xcol xchi'uc xnich'nab ti mi c'ot sjabilal ti pojel colele. 55Yu'un ti israeletique, ja' cajtuneltac. Yu'un ti jech c'otic ta bats'i cajtuneltaque, yu'un vu'un laj jloq'ues talel ta Egipto. Vu'un ti Ajvalil Diosun yu'unique.
Currently Selected:
Levítico 25: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000