Hebreos 2
2
Tsotsuc sc'oplal c'otuc ta o'ntonal ti pojel colele
1Ti c'u s'elan laj xa jts'etan jni' jchiquintic ta ya'yiel ti c'u s'elan laj ca'itique, tsotsuc sc'oplal bejbunuc ta co'ntontic yo' jech mu xquictatic comel ti lequil be jtamojtique. 2Ti ta vo'nee, c'alal laj yac'botic smantaltac ti Diose, ja' laj sjelubtasic talel ti ánjeletique, ti c'ot ta tsots mantale. Yu'un ti buch'utic laj sbajique, ti ja' no'ox laj sa' ti smulique, loc' ta sa'el yu'unic ti jbel sc'oplal laj stojique. 3¿C'usi xa ono'ox ta xcutic yo' ta jpoj jbatic un cha'e mi mu jtuc'ulantic lec ti muc'ul coltaele? Yu'un ja' laj yal ba'yel stuc ti Cajvaltic sc'oplal ti pojel colele. Lic yalbotic ec ti buch'utic laj ya'iic ba'yel ti sc'oplale. 4Ja' jech xtoc ti Diose laj svinajes ti ja' sc'oplal stuc ta sventa ti oy c'usitic jchop o ta q'uelele, ti labal ta q'uelele, ti c'usitic ti ch'ayal ta xc'ot o'ntonal yu'un ta sventa ti Ch'ul Espíritu ti yalel toyol laj yac'botic jbijiltic jech c'u cha'al oy ta yo'nton ti Diose.
Ti Jesucristoe co'ol s'elan c'ot jech c'u cha'al ti xchi'iltaque
5Ti Diose ma'uc laj yac'be sventain ánjeletic ti banomil ti ta to xtale, ti ta xcalbecutic sc'oplale. 6Yu'un oy bu ts'ibabil ta ch'ul c'op ti oy buch'u xi laj yale:
“Dios, ¿c'usi xa ono'ox bal o ta xava'i ti vinic ti mu xch'ay ta avo'ntone?
¿C'usi xa ono'ox bal o ta xava'i ti lum ach'el ti tsots sc'oplal ta xava'ie?
7Yu'un oy bu c'ot ta pasel ti jutuc xa no'ox x'ech' cajal c'ot sc'oplal ti ánjeletique,
ti jech sjalil peq'uel c'ot sc'oplal avu'un ti vinique.
Laj ono'ox avac' ta ich'el ta muc' un.
Laj avac'be slequilal.
Laj avac'be yabtel ta sbainel scotol ti c'usi apasoje.
8Laj xa avac'be ta yoc ta sc'ob scotol.”
Ti jech ac'bat scotol ta yoc ta sc'obe, mu'yuc c'usi laj yicta comel ti Dios ti mu'yuc ventainbil com yu'une. Le' une, mu'yuc to ta sventain ti ac'bil xa ta yoc ta sc'ob scotol ti c'usitic oye manchuc mi ac'bil xa ta yoc ta sc'ob.#Sal 8.4-6. 9Ja'uc le' une, ta xca'ibetic sc'oplal ti Jesuse, ti jech sjalil peq'uel sc'oplal ti stuque, ti x'ech' to cajal com sc'oplal ti ánjeletique. Jech loc' ta nopel yu'un Dios ta sventa ti syail xc'uxul yo'ntone ti ac'o ya'i ta sbec'tal stuc ti lajel tubel ta sventa scotol ti jnaclejetic ta banomile. Avi tana une, ich'bil xa ta muc', ac'bil xa slequilal yutsilal ta sventa ti laj yich' svocol c'alal cham laje.#Flp 2.6-11; Heb 12.2.
10Ta sventa yabtel ti Diose, ayan scotol ti c'usitic oye, xchi'uc ja' ta sventa ti oy scotole. Yu'un oy ta yo'nton ti Diose ti scotoluc ti xnich'nabe ac'o ich'batuc ti slequilal yutsilal ti oy ta stojole. Jech o xal un, ta sventa ti laj yich' svocol ti lequil Jcoltavanej yu'unique, c'ot ta sventa stojobtasel scotol. 11Yu'un ti buch'utic mesbil tusbilique, xchi'uc ti Jmesvanej Jtusvanej yu'unique, jun ti Totil yu'unique. Jech o xal Xnich'on ti Diose mu xq'uexav ti c'alal ta sbisotic ta xchi'il ta voq'uele. 12Yu'un xi ta xal ti ts'ibabil ta ch'ul c'ope:
“Ta xcalbe ya'iic ac'oplal ti jchi'iltac ta voq'uele.
Ta jq'uejintabot q'uejimoletic ti bu ta stsob sbaique.”#Sal 22.22.
13Oy bu xi ta xal xtoque:
“Yu'un jpatoj co'nton ta stojol ti Diose.”#Is 8.17.
Xi no'ox ta xal xtoque:
“Li' oyun xchi'uc ti nich'nabiletic ti laj yac'bun ti Diose.”#Is 8.18.
14Jech c'u cha'al ti alab nich'nabiletic ti ta xvoq'uic ta jchop nae, ti jun ti sbec'tal xch'ich'elique, jech ec ti Jesuse laj yich' xch'ich'el sbec'tal stacopal yo' jech ta slilinbe yip yabtel ti buch'u jbel sc'oplal ta xismilotique, ti ja' sc'oplal ti pucuje. 15Ti jech taj une, tal spoj scolta ti buch'utic u'ninbil ta xi'el ta xa'iic ta scoj ti lajel tubel ti c'u sjalil li' cuxulique. 16Ta jbel sc'oplal ma'uc tal scolta ti ánjeletique, yu'un ja' tal scolta ti buch'utic ja' snitilultac ti Abrahame. 17Yo' jech xc'ot ta pasel, tsots sc'oplal co'ol s'elan c'ot jech c'u cha'al ti xchi'iltac ta voq'uele, yo' jech c'ot ta banquilal pale ti oy syail xc'uxul yo'nton ti oy ta tunel ta stojol ti Diose, yo' jech ta xch'aybe smul scolo' ti jnaclejetic ta banomil ta sventa ti laj yac' sba ta milele. 18Ti jech laj ya'i ti lajeltsaele, ti vocole, avi tana un, ti Jesuse ta scolta ti buch'u ta xa'i ti oy lajeltsaele, ti vocole.
Currently Selected:
Hebreos 2: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000