Eclesiastés 3
3
Naca oy yorail scotol ti c'usi ta xc'ot ta pasele
1Ti c'usitic ta xc'ot ta pasel li' ta banomile, naca oy yorail scotol ti xi yelan ta xc'ot ta pasel ti jujuliquele:
2Oy yorail ti voq'uel ayanele; oy yorail ti chamel lajele.
Oy yorail ta xich' ts'unel, oy yorail ta xich' tsobel ti c'usi ts'unbile.
3Oy yorail ti milbaile; oy yorail ti poxtaele.
Oy yorail ti c'usi ta xich' lilinele; oy yorail ti c'usi ta xich' va'anele.
4Oy yorail ti oq'uel avanele; oy yorail ti tse'inele.
Oy yorail ti ic'al me'inale; oy yorail ti muyubajel ta q'uine.
5Oy yorail ta sjipel loq'uel ti tone. oy yorail ta tsobel talel.
Oy yorail ti mey baile; oy yorail ti ch'ac baile.
6Oy yorail ti ac'bil yipal ta sa'ele; oy yorail ti jech comuc oe.
Oy yorail ti sc'an naq'uele; oy yorail ti ten xi batele.
7Oy yorail ti ch'i' xi ta jatele. oy yorail ti ts'is xie.
Oy yorail ti ts'ij xi no'oxe; oy yorail ti c'opojel ta spaquel ti c'ope.
8Oy yorail ti syail xc'uxul o'ntonale; oy yorail ti sti'emal jolile.
Oy yorail ti letovajele; oy yorail ti lajem ti c'ope.
9¿C'usi xloc' venta ta xa'i ti vinic smiloj sba ta abtel unbi? 10Avi tana une, ti Diose, laj jna' lec ti laj sbusanbe ta sba ti vinic ta spasel yo' jech ta xbat yo'nton xchi'uc. 11Toj jun yutsiquil laj smeltsan scotol ti ta yorail xae. Yu'un laj stic' ta jol o'ntonal ti mu'yuc spajeb xtal no'ox sjolilal ti c'usi stac' alel yu'unique. Ac'o mi jech un, ja' no'ox mu'yuc buch'u stabe spajeb ta sna'el ti c'usi spasoj ti Diose, xchi'uc ti c'usi yacal ta spasele.#Sal 139.17; Is 55.8-9; Ro 11.33.
12Jna' lec ti oy buch'u c'usi xch'i o xa'i ta spasele, ti x'ech' jelav no'ox c'ac'al ta sc'upinel ti xch'iel sc'opojel ta ve'el uch' vo'e. 13Ti jech xijve' xcuch'tic no'ox vo' ta sc'upinel stunesel slubel xchamel ti coc jc'obtique, loc' ayan ta yo'nton ti Dios laj yac'botique. 14Jna' lec xtoc un, ti c'usitic laj smeltsan ti Diose, j'ech'el com o.#Sal 33.11. Mi ja'uc stac' ac'bel xchi'il, mi ja'uc stac' loq'uesel. C'ot ta pasel yu'un ti Diose yo' xi'tabil ta xc'ot. 15Ti c'usi laj c'otuc ta pasele, ech' xa un. Ti c'usi nopbil ta xc'ot ta pasele, vinaj xa un. Yu'un tey ono'ox xlic xcaj ta xc'ot ta pasel yu'un ti Diose.
Mu'yuc stuq'uil ti c'usi ta xc'ot ta pasele
16Ti oy sc'oplal ti tuq'uilale, ti tuq'uil chapanele, naca soquem scotol. Mu stac' alel ti c'usitic ta xc'ot ta pasel li' ta banomil laj quile. 17Ta xcal ma' ti cuni c'op ec une ti naca oy yorail scotole. Mi tuq'uil vinic, mi mu'yuc xch'ulel xa'i sba, ta xchapanatic yu'un Dios ti c'usitic ta xc'ot ta pasel yu'unique.
18Ti c'u s'elan stalel cuxul ti lum ach'ele, ta x'ac'bat sna'ic yu'un Dios ti yojtiquinicuc sbaic ti mu yanuc xcuxlejalic jech c'u cha'al ti chon bolome, xi ma' ti cuni c'op ta xcal une. 19Melel ono'ox un, ti viniquetique, ti chon bolometique, mu yanuc ti xi s'elan ta xc'ot ta stojolique: co'ol sna' xcham xlajic jujuvoc'.#Sal 49.12,20. Mu yanuc c'u s'elan ta xich'ic ic' scotolic. Xi s'elan ti mu yu'unuc stuc c'u s'elan staoj ti vinique, mi ja'uc ti chon bolometique: naca pich' o'ntonal ta xac'. 20Jun yavil ti bu talique. Ta lum ach'el meltsaj talel. Ta lum ach'el ta xjoybij sutel.#Gn 3.19; Job 34.15. 21¿Mi oy la buch'u sna' xana' ta xbat ta cajal toyol vinajel xch'ulel ti vinique, ti ta xyal batel ta snatil banomil xch'ulel ti chon bolometique?#Ec 12.7. 22Laj quil un, ti c'usi stac' spas ti vinique, ja' ti stunuc slajesuc ti slubel xchamel ti yoc sc'obe, ja' jech yepal laj sta. Mu'yuc xa buch'u ta x'ac'bun yil ti c'usi ta to xc'ot ta pasele.
Currently Selected:
Eclesiastés 3: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000