1 Corintios 2
2
Sc'oplal ti Cristo ti laj yich' jipanel ta curuse
1Ja'uc le'e, Jchi'iltac, c'alal ay calboxuc ava'iic sc'oplal c'u s'elan laj spas ti Dios ti c'usi mucul to ox yu'une, ma'uc laj jpas ti ven xa ti jbijil xca'i jbae. Mi ja'uc laj cal ava'iic ti mu stac' a'yibel ti smelole. 2C'alal oyun ta atojolique, mu'yuc c'usi yan laj jnop. Ja' no'ox tsots sc'oplal laj ca'i ti laj calboxuc ava'iic sc'oplal ti Jesucristo ti jipil ta curus cham laje. 3Xinicnun ta xi'el, mu cha'bel xu' cu'un laj ca'i ti c'alal li'ay jva'an jba ta atojolique.#Hch 18.9. 4C'alal laj calboxuc ava'iic ti lequil ach' c'ope, ma'uc laj jpas ti ven xa jbijil xca'i jbae yo' ta xc'ot ta avo'ntonic. Ja' no'ox ta sventa ti Ch'ul Espíritue xchi'uc ta sventa smuc'ul stsatsal Dios ti jech c'ot ta avo'ntonique. 5Ti c'ot ta avo'ntonic ta xch'unele, liquem talel ta sventa smuc'ul stsatsal ti Diose, ma'uc ta sventa sbijil ti vinique.
Ti Diose ta xac' sba ta ojtiquinel ta sventa ti Xch'ul Espíritue
6Ta sventa ti buch'u vulem xa lec xch'ulel ta xch'unele, oy bu ta xcalcutic ti sc'op Dios ti tsots ta a'yibel ti smelole. Ti jbijilcutic taje, mu xco'olaj xchi'uc sbijil ti jpas-mantaletic li' ta sba banomile, ti po'ot xa sta yorail ta xlaje. 7Ti c'usi ta xcalcutique, ja' ti c'usi mucul to ox talel yu'un ti Diose. C'alal mu'yuc to ox meltsajem ti banomile, snopoj ono'ox ti ta xiyac'botic ti slequilal yutsilale. 8Mi ja'uc junuc ti ajvaliletic li' ta sba banomil laj ya'ibeic ti smelole. Ti yu'unuc lajuc ya'ibeic ti smelole, mu'yuc laj sjipanic ta curus ti lequil Ch'ul Ajvalil jechuque. 9Le'e, ja' c'ot ta pasel jech c'u cha'al ti xi ta xal ti ch'ul c'ope:
“Ti c'usi mu'yuc to ilbile,
ti c'usi mu'yuc to a'yinbile,
ti c'usi mu'yuc to nopbile,
chapal xa yu'un Dios ta sventa ti buch'utic c'ux ta xa'ie.”#Is 64.4.
10Scotol taje, ta xac' ta na'el ti Dios ta sventa ti Ch'ul Espíritue. Yu'un ti Ch'ul Espíritue yiloj scotol, sna'oj scotol bu c'alal snopbenal yu'un ti Diose.
11¿Mi yu'un la oy buch'u sna' c'u s'elan ta snop ti buch'uuc no'oxe? Ja' no'ox sna' stuc c'u s'elan ti yo'ntone. Ja' no'ox jech ec ti Ch'ul Espíritue ja' no'ox sna'be c'u s'elan yo'nton ti Diose. 12Ti Ch'ul Espíritu quich'ojtique ma'uc li' liquem ta banomile, yu'un ti Ch'ul Espíritue liquem talel ta stojol Dios yo' sventa yutsil slequil yo'nton ta xca'itic scotol ti oy c'usi ta xijyac'botique. 13Ti jech ta xcalcutic ti c'op taje, ja' chanubtasbiluncutic yu'un Xch'ul Espíritu ti Diose, yu'un ma'uc ta jbijil jtuccutic ti c'usi ta xcalcutique. Ti buch'utic ventainbilic yu'un ti Ch'ul Espíritue, ja' ta xcalbecutic ya'iic c'u s'elan ta xac' jna'cutic ti Ch'ul Espíritue.
14Ti buch'u mu'yuc ventainbil yu'un ti Ch'ul Espíritue, mu xich'ic ta muc' ti c'usi ta xac' ta na'el ti Xch'ul Espíritu ti Diose, yu'un naca jeche' lo'il c'op ta xa'i. Mi ja'uc xa'ibeic smelol xtoc, yu'un sc'an a'yibel ta sventa mi ta x'abtej ti Ch'ul Espíritu ta o'ntonale. 15Ja'uc ti buch'u ventainbil yu'un ti Ch'ul Espíritue sna'ic lec snopel scotol. Ti buch'u ma'uc ventainbil yu'un ti Ch'ul Espíritue mu stac' a'yeluc ta xa'i ti jech yo'nton ti jch'unolajeletique. 16Yu'un ti ch'ul c'ope xi ta xale: “¿Mi yu'un oy la buch'u sna' c'u s'elan snopben ti Diose? ¿Mi yu'un oy la buch'u xu' ta xchanubtas ti Diose?”#Is 40.13; Ro 11.34. Ja'uc ti vo'otique oy ta jtojoltic snopben ti Cristoe.
Currently Selected:
1 Corintios 2: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000