1 Crónicas 29
29
1Ta ts'acal to ti David une xi laj yalbe ya'i scotol ti c'u yepal oyic ta tsobleje: “C'ajomal no'ox stuc t'ujbil c'ot yu'un ti jnich'on Salomone. Querem vinic to, mu jaluc ti sjabilale. Ep ta j'ech'el ti abtel sbainoje. Ma'uc no'ox sna jun vinic ta xich' va'anel. Ta sva'an jun ch'ulna ta sventa ti Dios ti ja' Ajvalile. 2Pisile, xi s'elan ma' ti laj cac'be yipal ta xchapanel scotol ti c'usitic tsots sc'oplal ta xtun ta sventa xch'ulna ti Dios cu'une: ti oroe, ti platae, ti c'anal taq'uine, ti tsatsal taq'uine, xchi'uc ti te' ta xtun ta jujutose. Oy xtoc ti ic'-ic' losantic sba stsajal baxtone, ti c'upiquil sba tonetic ta xich' paq'uele, ti spac'obiltaque, ti pechajtic ton ta spaq'uic ta yut nae, xchi'uc scotol ti ep ta tos c'upil sba tonetique, xchi'uc busul no'ox ta j'ech'el ti saquil baxtone.#1 Cr 22.5. 3Ma'uc no'ox ti va'i yepal chapanbil cu'un scotol ta sventa ti ch'ulna ti juteb ta co'nton stsuts xch'ulna ti Dios cu'une, xi s'elan ta xcac' ti cu'un jtuque, ti oroe, ti plata: 4vo'vinic mil (100,000) ta kilo ti oro ti lec t'ujbile, lajuneb xlajcha'vinic mil (230,000) ta kilo plata ti lec t'ujbil ta sventa sbontac spac'balil ti nae. 5Ta scotol ti oro taje, xchi'uc ti platae, ja' ta xich' tunesel ti butic tsots sc'oplal stunesel ta xc'ot ti jujutos taq'uine, ti ta stunesic ti j'abteletic ti buch'utic sna'ic sloc'tael ti c'usitic c'upil sbae. Avi tana le' une, ¿buch'u xloc' x'ayan ta yo'nton ta snaban sba ta yaq'uel yuni na'obil ta sventa ta xtun yu'un ti Diose?”
6Va'i un, ti banquilaletic yu'un ti jujuchope, ti banquilaletic yu'un ti jujuvoc' snitilul ti Israele, ti banquilaletic yu'un jmil (1,000) ta vo' soldadoetique, xchi'uc ti banquilaletic yu'un vo'vinic (100) ta vo' soldadoe, xchi'uc ti banquilaletic yu'un ti buch'u sbainojic ta sq'uelel abtel yu'un ti ajvalile, loc' ayan ta yo'ntonic ta snabanel sbaic ta yaq'uel ti c'usi ta xtune. 7Lic yaq'uic ta sventa abtel ta xtun ta ch'ulnae, vo'ob sbalunvinic mil (165,000) ta kilo ti oroe, xchi'uc lajunmil (10,000) ta sep ti oroe, lajuneb yuclajunvinic mil (330,000) ta kilo ti platae, nopol mu teyuc vaquib ciento mil (600,000) ta kilo ti c'anal taq'uine, lajuneb xcha'vinic ciento xchi'uc vo'lajunvinic mil (3,300,000) ta kilo ti tsatsal taq'uinetique.
8Ja' jech ec ti buch'utic oy yu'unic ep ta tos c'upil sba tone, laj yac'beic ta sc'ob ti buch'u yich'oj ta sventa xchabiel ti c'usitic ta xtun ta sventa ti ch'ulnae, ti sbainoj ti Jehiel snitilul ti Gersone.
9Xmuyubajic no'ox ti jteclum ti laj snabanan sbaic ta yaq'uel ti c'usi ta xtune, ti ta yutsil yo'ntonic laj yaq'uic ta sventa ti Diose. Xmuyubaj no'ox ta j'ech'el ti ajvalil David eque.
10Va'i ti David une xi laj yalbe yutsilal sc'oplal Dios ta stojol scotol ti c'u yepal tsobolique: “¡Sbateluc osil, lequil c'optabilucot, Dios, Diosot yu'un ti jtotcutic Israel ta vo'nee! 11¡C'otem ta aventa, Dios, ti amuc'ul atsatsale, ti avutsilal alequilale! C'otem ta aventa, Dios, ti abainoj scotole,#Mt 6.13. ti c'otemot ta Ajvalilot yu'un scotole. Yu'un scotol ti c'usi oy ta vinajele, ti ta banomile, c'otem ta avu'un. C'otem ta aventa ti ventainele, ti vo'ot cha'e, Dios, cajal c'otemot yu'un scotol. 12Yu'un ta atojolal ta xtal ti c'ulejale, ti ich'el ta muc' avu'une. Abainoj scotol. Ti muc'ul tsatsalile, oy ta avoc ta ac'ob. Oy ta avoc ta ac'ob ta yac'bel smuc'ul stsatsal scotolic. 13Jech o xal tana un, ti Diosot cu'uncutique, colaval xacutcutic. Ta jlequil-c'optacutic ti avutsil alequilale. 14¿Buch'u un la ya'yel un, buch'uic la ya'yel un ti jlumale, ti xu' cu'uncutic ta yac'belot ti c'usi ep ta tose? Ta melel liquem talel ta atojolal scotol. C'ajomal no'ox ta xcac'cutic sutel ti laj jtacutic ta atojole. 15Le'e cha'e, co'ol s'elan jyanlumuncutic ta xi'ech'cutic ta aba ta asat jech c'u cha'al ech'ic scotol ti jtot jme'cutic ta vo'nee. Ti jcuxlejcutic li' ta banomile, co'ol no'ox s'elan junuc queov, ti j'ech'el no'ox ta xjelav batele.
16“¡Va'i un cha'e, Cajval, Ch'ul Dios cu'uncutic, ja' avu'un, liquem talel ta atojol scotol ti c'ulejal laj jchapancutic ta yaq'uel ta sventa smeltsanel ti ch'ulna ta ventae! 17Jna' lec ti Diosote, xavil xavojtiquin lec ti snopobile, ti lec ta xava'i ti oyuc smelol stuq'uile. Jech o xal un, ta stuq'uil jol co'nton, laj cac'bot ta atojol scotol li'e. Avi tana une, quiloj ta jba ta jsat ti xmuyubajic no'ox ti ateclumal li' tsobolic laj yaq'uic ti matanaletic ta yutsil slequil yo'ntonique. 18Cajval, Dios yu'un ti Abrahame, yu'un ti Isaaque, yu'un ti Israele, ja' ti jtot jme'cutic laj ech'icuc ta vo'nee. Oyuc ta stojolic avu'un yip yo'ntonic ti ateclumale. Ac'bo ya'i ta yo'ntonic yo' jech mu xch'ac sbaic ta atojol. 19Ac'bo stuq'uil sjol yo'nton xtoc ti jnich'on Salomone yo' jech ta xc'ot ta pasel yu'un ti amantaltaque, ti c'usitic nopbil avu'une, xchi'uc ti oy c'usi jbel tsots albile, ti chapaluc ta yabtelanel scotole yo' jech xu' ta xlic smeltsan ti ch'ulna ta sventa ti c'usi chapal xa cu'un scotol ti c'usi ta xtune.”
20Xi xcholet lic yal ti David ta stojol scotol ti c'u yepal tsobolique: “Avi tana li' une, lequil c'optaic ti Ajvalil Dios avu'unique.” Va'i un, ti c'u yepal tsobolique, jun no'ox sc'opic laj slequil-c'optaic ti Ajvalil Dios yu'un ti stot sme'ic ta vo'nee, ti xquejeletic snupilanic xa banomil ta stojol ti Diose, xchi'uc ta stojol ti ajvalile. 21Ta yoc'omal un, xi s'elan laj yac'beic milbil chic'bil matanal ti Diose: lajuneb ciento (1,000) ta cot ch'iom tot vacax, lajuneb ciento (1,000) ta cot tot chij, lajuneb ciento (1,000) ta c'ot ch'iom tot chij xchi'uc ti sts'aquebtac jech c'u cha'al ti vinoe. Busul no'ox ta j'ech'el ti matanaletic laj yich' svocol ta sjunul Israele. 22Ti c'ac'al taje, xmuyubajic no'ox ta j'ech'el ve'ic uch'ubajic ta sba ta sat ti Diose. Ts'acal to un, lic xcha'alic sc'oplal ti ta x'och ta ajvalilal ti Salomón xnich'on ti Davide. Laj yac'beic snup yabtel ta stojol Dios ti ta xc'ot ta banquilal ajvalil yu'unique, xchi'uc c'ot ta pale ti Sadoque. 23Va'i un cha'e, ti Salomone och ta ajvalil ti bu spasob mantal ti Diose, ti bu ech' chotiuc ta pas mantal ti stote.#1 R 2.12. ti spajeb xa no'ox laj sta ti bu c'alal c'ote. Ch'unbil sc'op c'ot yu'un scotol ti Israele. 24Scotol ti banquilaletique, ti banquilal letovajele, xchi'uc scotol xnich'nab ti ajvalil Davide, laj sva'an sbaic ta stojol ti ajvalil Salomone. 25Ti Diose, c'ot ta pasel yu'un ta stojol ti Salomone, ti spajebal xa no'ox lec x'ile ta sba ta sat scotol ti Israele, ti jun no'ox yutsil slequil laj yac'be sta ti tiq'uil ta ajvalilale ti mu junuc ajvalil yu'un Israel laj sta jech c'u cha'al laj sta ti stuque.
Cham ti Davide
(1 R 2.10-12)
26Ti Davide, xnich'on ti Isaie, ech' ta ajvalilal yu'un scotol ti Israele. 27Cha'vinic (40) jabil och ta ajvalilal ta sjunul Israel. Vucub (7) jabil ech' ta ajvalilal ta jteclum Hebrón. Oxlajuneb xcha'vinic (33) jabil ech' ta ajvalilal ta jteclum Jerusalén.#2 S 5.4-5; 1 Cr 3.4. 28Lequil chamel laj ya'i, smolibel xa cham, ti jal xa xch'iel sc'opojele. Mu albajuc sc'ulejal laj sta. Ich'bil ta muc' ic'ot. Lic cuchbatuc comel yabtel ta ajvalil yu'un ti Salomón ti ja' xnich'one.
29Ti sliquebal sc'oplal ya'yejal ti ajvalil Davide, ti c'ot c'alal to stsutsebe, ts'ibabil com ta jpoc svunal slo'il ya'yej ti j'alc'op Samuele. Ts'ibabil com ta jpoc svunal slo'il ya'yej ti j'alc'op Natane. Ts'ibabil com ta jpoc svunal slo'il ya'yej ti j'alc'op Gad ti jamal sba sate. 30Scotol ts'ibabil com ti c'u s'elan ech' ta ajvalilale, ti c'u s'elan cuchem yu'une, ti c'usitic laj c'otanuc ta stojole, ti c'usitic c'ot ta stojol ti Israele, xchi'uc ti c'usitic c'ot ta stojol ti yan jteclumetique.
Currently Selected:
1 Crónicas 29: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000