1 Crónicas 27
27
Soldadoetic ti lic svol sbaique, xchi'uc ti viniquetic c'otemic ta jtuneletic yu'un ti Davide
1Li'e, ja' sbiic ti banquilaletic yu'un ti jujuchop israeletique, ti banquilaletic ti sbainojic jmil (1,000) ta vo' soldadoetique, ti banquilaletic ti sbainojic vo'vinic (100) ta vo' soldadoetique, xchi'uc ti j'opisialetic ta xtunic ta stojol ti ajvalile. Ti jujuvoc' soldadoe ta sjelilan sbaic ta sbainel ti abtel ta jujun u ta sjunlej jabile. Ti jujuvoc' soldadoe, loc' ta chapel chanib xcha'vinic mil (24,000) ta vo' viniquetic.
2-3Ti banquilal yu'un ti jvoc' jchabivanej soldado yu'un ti sliqueb ue, ja' ti Jasobeam xnich'on ti Zabdiele, snitilul xtoc ti Farese. Ti Jasobeame c'otem ta banquilal yu'unic scotol ti banquilaletic yu'un jujuvoc' soldado ta xtunic ta chabivanej ti sliqueb ue.
4Ti banquilal yu'un ti jvoc' jchabivanej soldado yu'un ti xchibal (2) ue, ja' ti Dodai ti ja' ahohitae.
5Ti banquilal yu'un ti jvoc' jchabivanej soldado yu'un ti yoxibal (3) ue, ja' ti Benaía xnich'on ti banquilal pale Joiadae. 6Taje, jun ti x'ech' to xu' yu'un ta scotol ti lajuneb xcha'vinic (30) ta vo' tsatsal viniquetique, ti c'otem ta banquilal yu'unique. Ts'acal to un, ti xnich'on Amizabad sbie sbainoj ta spasel mantal ti jvoc' taje.
7Ti banquilal yu'un ti jvoc' jchabivanej soldado yu'un ti xchanibal (4) ue, ja' ti Asaele, xchi'il ta voq'uel ti Joabe. Lic stsacbe yabtel xnich'on ti Zebadías sbie.
8Ti banquilal yu'un ti jvoc' jchabivanej soldado yu'un ti yo'obal (5) ue, ja' ti Samhute ti ja' izraitae.
9Ti banquilal yu'un ti jvoc' jchabivanej soldado yu'un ti svaquibal (6) ue, ja' ti Ira xnich'on ti Iqués ti liquel talel ta jteclum Tecoae.
10Ti banquilal yu'un ti jvoc' jchabivanej soldado yu'un ti yucubal (7) ue, ja' ti paltita vinic ti sbiinoj Helese, snitilul ti Efraine.
11Ti banquilal yu'un ti jvoc' jchabivanej soldado yu'un ti xvaxaquibal (8) ue, ja' ti liquel talel ta Husa ti sbiinoj Sibecaie, snitilul ti Zerae.
12Ti banquilal yu'un ti jvoc' jchabivanej soldado yu'un ti sbalunebal (9) ue, ja' ti liquel talel ta Anatot ti sbiinoj Ebiezere, snitilul ti Benjamine.
13Ti banquilal yu'un ti jvoc' jchabivanej soldado yu'un ti slajunebal (10) ue, ja' ti Maharai ti liquel talel ta Netofae, snitilul ti Zerae.
14Ti banquilal yu'un jvoc' jchabivanej soldado yu'un ti sbuluchibal (11) ue, ja' ti Benaías ti liquel talel ta Piratone, snitilul ti Efraine.
15Ti banquilal yu'un ti jvoc' jchabivanej soldado yu'un ti xlajchebal (12) ue, ja' ti Heldai ti liquel talel ta Netofae, snitilul ti Otoniele.
16Ti banquilal jtsobvanejetic yu'unic ti jujuvoc' snitilultac ti Israele, xi s'elan xcholet sbiic jech c'u cha'al li'e: Ta sventa snitilul ti Rubene, ja' ti Eliezer xnich'on ti Zicrie. Ta sventa snitilul ti Simeone, ja' ti Sefatías xnich'on ti Maacae.
17Ta sventa snitilul ti Levie, ja' ti Hasabías xnich'on ti Kemuele. Ta sventa snitilultac ti Aarone, ja' ti Sadoque. 18Ta sventa snitilul ti Judae, ja' ti Elihue, jun xchi'il ta voq'uel ti Davide. Ta sventa snitilul ti Isacare, ja' ti Omri xnich'on ti Micaele. 19Ta sventa snitilul ti Zabulone, ja' ti Ismaías xnich'on ti Abdiase. Ta sventa snitilul ti Neftalie, ja' ti Jerimot xnich'on ti Azriele. 20Ta sventa snitilul ti Efraine, ja' ti Oseas xnich'on ti Azaziase. Ta sventa o'lol jvoc' snitilul ti Manasese, ja' ti Joel xnich'on ti Pedaiase. 21Ta sventa o'lol jvoc' nitilulil ti oyic ta Galaade, ja' ti Iddo xnich'on ti Zacariase. Ta sventa snitilul ti Benjamine, ja' ti Jaasiel xnich'on ti Abnere. 22Ta sventa snitilul ti Dane, ja' ti Azarel xnich'on ti Jerohame. Ti va'i yepal taje, naca banquilal jtsobvanejetic yu'un jujuvoc' snitilul ti Israele.
23Ti David une mu'yuc laj stsacbe sbi ti buch'utic mu to ta sta jtob jabil yich'ojique, yu'un yaloj ono'ox ti Diose ti ta sboles ta j'ech'el ti israeletic jech c'u cha'al ti c'analetic ti oy ta vinajele.#Gn 15.5; 22.17; 26.4. 24Laj ox sliques stsaquel biil ti Joabe. Ja'uc le' une, mu'yuc tsuts yu'un. Vul ta loq'uel chopol ta stojol ti israeletic ta scoj taje.#2 S 24.1-15; 1 Cr 21.1-14. Jech o xal mu xvinaj c'u yepal sbiic ti oy ta jpoc svunal slo'il ya'yejal yabtel ti ajvalil Davide.
25Ti banquilal jchabiej taq'uin yu'un ti ajvalile, ja' ti Azmavet xnich'on ti Adiele. Ti sbainoj ta sventainel ti jujubej naetic noj ep ta tos sbeel ti oy ta osiltique, ti ta jteclume, ti ta bic'tal jteclume, ti ta sti'iltac xa bu ta x'ech' talel ti ts'aque, ja' ti Jonatán xnich'on ti Uziase.
26Ti jq'uelvanej yu'un j'abteletic ta yabtelanel ti banomile, ja' ti Ezrí xnich'on ti Quelube. 27Ti jq'uelvanej yu'un ti jtsob-uvaetique, ja' ti Simei ti liquel talel ta Ramate. Ti buch'u sbainoj ta yich'el ta venta ti vino ta jujun snailtaque, ja' ti Zabdi ti liquel talel ta Sefame. 28Ti jq'uelvanejetic yu'un ti jtsob sat olivoe, xchi'uc ti jtsob sat te'tical icuxetic ta stenlejaltique, ja' ti Baal-hanán ti liquel talel ta Guedere. Ti buch'u yich'oj ta sventa ti sts'anlebtac aceitee, ja' ti Joase. 29Ti buch'u sbainoj ta sq'uelel vacax yu'un ti Sarone, ja' ti Sitrai ti oy ono'ox ta Sarone. Ti buch'u sbainoj ta sq'uel vacax ta stenleje, ja' ti Safat xnich'on ti Adlaie. 30Ti buch'u sbainoj ta sq'uelel ti camelloetique, ja' ti Obil ti ismaelitae. Ti buch'u sbainoj ta sq'uelel ti burroetique, ja' ti Jehediase, ti liquel talel ta Meronote. 31Ti buch'u sbainoj ta sq'uelel ti chijetique, ja' ti agareno ti sbiinoj Jazize. Scotolic taje, sbainojic ta sventainel ti c'usitic oy yu'un ti ajvalil Davide.
32Ti Jonatán sjuntot ti Davide, jun vinic ti chanubtasbile, ti oy sbijile, c'otem ta jbijubtasvanej. Ti Jehiel xnich'on ti Hacmonie sbainoj ta xchi'inel xnich'nab ti ajvalile. 33Ja' jech ec ti Ahitofele, ja' jbijubtasvanej yu'un ti ajvalile. Ti arquita ti sbiinoj Husaie, ja' jun vinic ti stuc'ulanojbe lec c'usi oy yu'un ti ajvalile. 34Ti Joiada xnich'on ti Benaiae, xchi'uc ti Abiatare, laj xcuchbe comel yabtel ti Ahitofele. Ti Joabe oy ta banquilal jpas-mantal yu'un yajsoldado ti ajvalile.
Currently Selected:
1 Crónicas 27: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000