Mataibo 3
3
Dibia go Juan dai gabapakonai óídakami
1Dai gokiïrï sai dibia ïmo kïïrhi Juan tïgidukami ix makïdï bapakonadami aagaiña óídakami. Ayi ïgai oidigana ami Judea munisipiogadïrï dai ami gamamaakaiña aatagi go óídakami. 2Dai potïtïdaiña ïgai go óídakami sai,
—Ka miadaimi ix gatïanïdagi Diuxi. Kaxkïdï gï agai sai ïma dukai gïn tïtïgitoagi soimaaxi ibuadamikatai aapimï— itïtïdaiña.
3Go Juan ïgai ix makïdï idui ix dukai aagai go Isaiaskaru ojadïrï tudu. Ami go ojadï ikaiti sai,
Dibiamu ïmoko ix makïdï gïïgïr ñokada agai oidigana dai potïdamu ïgai oidakami sai karhioga dibi agai gïr Tïanïdamiga ix makïdï nïnïraka aatïmï. Kaxkïdï abïr bhai gïn duka ïïgi aapimï. Ix dukai bhai buadana aapimï ïmo boi xïïxkadï gïn dibida agadagi ïmo gïï dudukami podukai abïr bhai gïn buada ïïgi aapimï saidi gïn dibidana gïr nukadakami, tïdamu ïgai go odami, podukai tudu oja go Isaiaskaru ïïki aagaitai go Juan.
4Dai go Juan yukuxidï kameyo popodïkïdï duñixikatadai dai ogi giburadï. Dai kuadana ïgai sosoyi ïmadï saiburhi papaigadï. 5-6Dai ami oidigana go gïï Jordan akiana dakatadai go Juan aidï. Dai mui daibuiña óídakami Jerusalenañdïrï dai abhiadïrï miadïrï go aki Jordan ïpï. Daibuiña ïgai bïïxi aipadïrï ami go Judea munisipiañdïrï tudu nïida ïrhiditai go Juan dai kaïka ïrhiditai aatagidï. Dai go Juan gabapakonaiña go óídakami ka aagakai go óídakami ix tumaxi soimaaxi ibuadami ïgai.
7Dai ami daibuiña mui fariseos dai saduseo ïpï gïn bapakona ïrhiditai ïpï. Go fariseos buaboitudai sai kïïgakïrï bubuaki agaitadai ïïgiditai ïgai go Moises sïïrhikamigadï. Dai go saduseo buaboidaitadai sai mai tipu duakaragai koidadï bïïtarï. Dai go Juan potïtïdaiña tïïgakai sai,
—Aa gia galtutuiga aapimï. Ïpïan tutuiga aapimï kookoyi— itïtïdaiña. —¿Xorai gïn aagidi ix bhaigobai dadana aapimï gaagaitai go kïïgakïrï bubaidaragai ipïrhiditai aapimï sai maiti gïn aiyagi go gïgïbidaragai Diuxi amadïrï?. 8Gï agai bhaiyoma sai kïïka ibuadagi aapimï dai podukai maaxitudagi ix bhai buaboikïdï ka ïmadukai gïn tïtïgito aapimï— itïtïdaiña.
9—Dai maiti abïr pokaitada ïpï sai gïn oigïldamu Diuxi piipixaradïkatai aapimï go Abraamkaru. Gobai maiti gïn soiñamu tudu— itïtïdaiña. Daiñi, kïï bhaiga Diuxi xi asta ojodaiñdïrï ibuadagi piipixaradï go Abraamkaru di. ¿Kaxkïdï dukatai po gïn ïrhidi aapimï sai gïn soiñamu piipixaradïkatai aapimï? Xadïrï gïn soiñana gobai sai maiti gïn aituldagi Diuxi gïgïbidaragai tudu— itïtïdaiña.
10—Daiñi— itïtïdaiña go Juan. —Kïïga maatï aapimï sai ïmo uxi xïïxkadï mai kïïgadukagi ibhiadï gï guikutai gobai dai gï mïmïidi. Dai aapimï ïr ïpïan dukami ïmo uxi ix makïdï mai kïïgadu ibhiadï mai kïïga ibuadatai aapimï. Dai Diuxi ïr ïpïan dukami ïmo kïïrhi ix makïdï ka uxi sonoana kïi tupuradï dai nïnïidi ix bhai kïïgadu ibhiadï. Dai ix mai kïïgadukagi ka daituda agai go uxi. Ïpïan dukami aapimï go uxi tudu ix makïdï mai kïïgadu ibhiadï. Dai Diuxi ka bhai gï duu ix gïn maakiagi gïgïbidaragai taiyïrï— itïtïdaiña Juan go fariseos dai saduseos ix makïdï ami dada gïn bapakona ïrhiditai.
11Daidi potïtïdai Juan go odami ïpï sai,
—Aanï maiti ïr go otosadï Diuxi ix makïdï nïnïraka aapimï. Gokiïrioma dibiamu ïgai kia— itïtïdai. —Gïïpi bamioma gatïanïi ïgai xi aanï tudu. Aanï tomarhi maiti gin ajïga xi ibuadagi go bamioma arhidukïdï aaduindagai ïgai bïïtarï. Maiti gin ajïga aanï tomarhi xi upasdagi aanï sususakadï ïmo arhi pioñigadï dukai. Dai aanï mosïkaxi sudagikïdï gïn bapakonai ka ïmadukai gïn tïtïgitokatai aapimï. Dïï gia Diuxi otosadï gia Diuxi Ibhïadïkïdï gïn bapakonadamu ïmadï táíkïdï. Sïïrhikïdï ïr gïdukami ïgai tudu daidi ïr gubuakami— itïtïdai.
12—Gïn aagidamu aanï ix duñimu ïgai odami— itïtïdai. —Daiñi, ïpïan duñimu ïgai ïmo kïrhibadami tïrhigi. Kïïga gaboixikai ïgai go tuixiki xako gakïrhiba ïgai go tïrhigi. Dai ïmpaidi ïgai go tïrhigi dai bhai tuayi dïï go kosadï gobai gia taiyïrï surhigai ïgai. Podukai iduñimu ix makïdï nïnïraka aapimï tudu. Ka bhai gï duu ïgai xi ïko bubaidagi jaa odami dai jaa taiyïrï surhiga agai xako tomarhi ïmo imidagai mai tutukui tai— itïtïdai.
Gï bakoi go Suxi
13Dai aidï jii go Suxi Galilea munisipiañdïrï dai ayi ami go aki Jordanïrï xako dajatadai go Juan. Ipïrhiditadai ïgai sai go Juan bakuanana kaxkïdï. 14Dïï gia go Juan maiti ipïrhi tukamïrï daidi potïtïdai,
—Gï agaitadai xi aapi gin bakuanamudai bhaiyoma. ¿Ix tuixi gin aagidi aapi an sai gï bakuanana aanï tudu?— itïtïdai.
15Dai Suxi potïtïdai aidï,
—Gï agai sai gin bakuandana aapi saidi podukai bïïxi pogïduna ix dukatai Diuxi ipïrhidi— itïtïdai.
Dai aidï gia bhai aa go Juan dai bakoi ïgai go Suxi.
16Dai kaxi gï bakuanakai go Suxi sai busai ïgai sudagiañdïrï daidi kupioka go tïbagi dai tïï ïgai Diuxi Ibhïadï sai tïbai tïbagiañdïrï ïmo tugu dukai dai Suxi daama daiba. 17Dai Diuxi ño tïbagiañdïrï aidï dai potïtïdai ïgai go odami,
—Idi ïr gin Maara dai sïïrhikïdï oigïdai aanï. Idi tudu ïr gin bhai ïrhiaraga— ikaiti Diuxi aagaitai go Suxi.
Currently Selected:
Mataibo 3: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida