Lucas 7
7
So Jesús ỹomatec so lelaatec so nouaataxanaq lashi le'ec yi Roma
(Mateo 8.5-13)
1Ca' so Jesús co'na' ỹomat ỹa'xatem dajo so qomyipi, ca' eec, quepegue' yi Capernaum. 2Ca' hua'ñi yi'maxare, ca 'uo' so nouaataxanaq lashi le'ec yi Roma. So'maxare 'uo' so lelaatec ỹaatqajam lauochaxat, qam so'maxare ralolaxaic, chaqai mashic ileuetac. 3Sojo lashi na nouaataxanaq co'na' 'xaiguelec so Jesús, ca ỹo'ueete' saua ilate' quená'maq qo'xoiquipi quena judioipi, quiyim ne'xoresene'tot so Jesús quiyim nanac, ca' ỹomatec so lelaatec. 4Ca' saua'maxare co'na' ỹovirera'a so Jesús, ca ỹaatqajam 'xoic da ne'xoresenaxague', 'nerac:
—Ñí'maq lashi na nouaataxanaq, ñi'maxare ỹa'maqachiguiñi quiyim tauañi', 5ma' ñi'maxare ỹaatqajam ỹauotegue na qouo' laseripi. Ñi'maxare chaqaiñi ñi relaataxanlec añi qalapoxoqui quesom quiyim qano'xonshiguim.
6Ca' so Jesús nauequetecto saua'maxare. Qam co'na' mashic qaipalatau'a ca la'a' so nashi, ca' so'maxare ilate' saua nauochaxaua' quiyim 'nerapega so Jesús, 'nerac:
—Qami' ỹa'gaxala', se ishit quiyim ỹapacauec ca rquelolaxa'e', ma' sa'deena'a quiyim ỹaatqajam sqa 'iichiguit quiyim noxoñirougui na iuo'. 7Ma' aỹim se ra'ñiigui na iuel quiyim yipaca'a quiyim se'guena'a qami'. Vichiguiño' no'uen quiyim chaqaicaata ca ra'qaachiqui' 'ỹaañirec, ca' ñi ilaatec chaqa'ma' imeuec. 8Ma' ỹim qai'neeta seueta'ñot da lelaataxanaxac na nashillipi, ca' ỹim qai'neeta 'ue na ñalliripi selaretac. Ca' quiyim 'ue ca shinapega ca 'óna quena'maxare quiyim eec, ca' eec. Chaqai no'm 'ue ca shinapega ca 'óna quena'maxare quiyim shinac: “naiquena”, ca' anac. Ca 'nejem quiyim 'ue ca selarelec ca ilaatec, ca' ỹo'uet.
9Ca co'na' 'xaỹa dajo so Jesús, ca' ỹaatqajam 'uo' da le'laxa queca ỹale. Ime, ca ỹamataugui so qomyipi, ca 'naaco':
—Ỹaatqajam llic quena Israel llaalqaipi qaica ca seuana quiyim ỹaatqajam lodegaxat ca lpi'ỹaxac 'nejem cajo ỹale.
10Ca co'na' pilda'a ca na'a' so nelaatqaipi, ca iuanejlec sojo nelaatec quiyim mashic imeuec.
So Jesús liỹa nca'laxatec so llaalec aso pa'ỹe
11Ca' co'na' mashic ime dajo, ca' so Jesús quepegue' so na'a' leenaxat Naín. Nauequeta'pegue' so lapaxaguinatqaipi, chaqai 'xoic so liỹa qomyipi. 12Ca co'na' mashic qaipalatau'a so na'a', ca' qaỹauañi'chiguit quiyim mashic qaỹodouec so mashic sou. So'maxare qaisoota llaalec aso pa'ỹe. Chaqai ỹaatqajam 'xoic so qomyipi chicqaugui yi na'a' quiyim co'uaate'ogue so'maxare. 13Ca so Jesús co'na' iuana aso'maxare, ca' ỹaatqajam 'ue da le'xorenataxanaxa, ca' 'naapega, 'naaco':
—Se ỹa'maxañi quiyim nohiñi'sac.
14Ca' so Jesús noquiiga'a so'maxare, ca ipootau'a aso lahi'. Ca' sauá'maq ỹodorec so leuaxaic, ca huere'e. Ca so Jesús 'naapega so leuaxaic, 'naac:
—Qami' ne'necolec, shinapega qami': ¡Ne'laxachirishiguim!
15Ca' só'maq leuaxaic ne'laxashiguim, ca nqa'xanñi, ca retaqa. Ime, ca' so Jesús ỹaanem aso late'e. 16Ca co'na' qaỹauanchigui dajo, ca sá'ogue so qomyipi ỹaatqajam 'uo' da lqolonaxa. Ca imaqachintac ñi qota'a, 'naaco':
—'Uo' so chalego lecaic so la'qaataxanqajnec ñi qota'a chicqochiguinguilo qomi'.
Chaqai qohine'tegueyi da na'qaatec:
—Ñi qota'olec novi', ỹahotaque quiyim ỹotauan ná'maq lalamqateripi.
17Ca' sá'ogue qaỹa'den da ỹo'uet so Jesús quenaua'que naua lahil yi 'laua Judea.
Só'maq lelaatqaipi so nachilaxanataxanaq leenaxat Juan
(Mateo 11.2-19)
18Ca' so Juan la'xaỹaxac dá'ogue dajo, ma' saua lapaxaguinatqa ra'qaataxantem so'maxare. Ca' so'maxare roỹaxanalo saua dos quesaua'maxare. 19Ime, ca' ilatalo so Jesús quiyim inate' quiyim chaqaiso' so ỹaatqajam nashi nca'laxaqui so'maxare, só'maq qanauaantaque, loqo'm ñaq qanauaanaque ca liỹa. 20Ca' saua lelaatqa co'na' ỹovirera'a so Jesús, ca' qainat, qohinaco':
—Ñí'maq nachilaxanataxanaq Juan nelate' qomi' quiyim senatqai' quiyim chaqaqami' ná'maq qanauaantaque nashi nca'laxaqui, loqo'm ñaq ñauaanqaque ca liỹa.
21Ca co'na' chi ỹovirero saua'maxare, ca so Jesús 'xoico' so qomyipi ỹomatec ỹoreta'oguit na ralolaxa, chaqai ỹo'daauec ná'maq le'ec lecmaxaic, chaqai 'xoic na nauanñi nqai'en quena qai'laqaipi. 22Ca' so Jesús 'naaco':
—Pilliho' ma'le, ca 'ñiỹapego' ca Juan quená'maq huañiichigui chaqai ná'maq 'xahichigui. Chaqai 'qaataxañim quiyim mashic nauanñi na qai'laqaipi, chaqai ná'maq ni'iraho naua lichil lotqai co'viiñi, chaqai ná'maq rishiita na loshicmaxa lotqai qaiquiỹouec na ralolaxa, chaqai na ra'ñaagui na lqahic lotqai 'qaa, chaqai ná'maq mashic tot qaica lotqai liỹa nca'leuec, chaqai ná'maq 'xoraiquipi mashic qaỹa'xatem da na'qaatec chicqaugui da nca'laxa. 23Ca' ỹaatqajam 'xoic la'maxa ca qom quiyim ỹaatqajam sqaica ca loqollictaxanaxac caỹim.
24Ca co'na' mashic que' saua lelaatqa so Juan, ca so Jesús ỹa'xatetac so Juan, ra'qaataxantapeguem so qomyipi, 'naaco':
—¿Nega'ỹo' só'maq 'ajnaxañitapegueu'a qamiri quiyi 'laua qaica qom? ¿Aca noqola late'e ỹayoctetac na nonot? 25Chaqai ¿nega'ỹo' só'maq 'ajnaxañitapegueu'a? ¿Peeta'a ỹaatqajam lo'yaxanqa naua loho só'maq sojo ỹale? Qamiri 'yiiñii queca qom chaqaidaata da no'ueetaxac, chaqai queetalec da chi no'ueenataxac, ca chaqaina na sqai ỹaxanac na la'a' na nashillipi. 26Chaqai ¿nega'ỹo' só'maq 'ajnaxañitapegueu'a? ¿La'qaataxanqajanco' ñi qota'a so'maxare? Ajá'a, ỹaatqajam llic, chaqai ỹaatqajam napacalec cá'maq la'qaataxanqajnec ñi qota'a. 27So Juan chaqaiso so qaỹa'xat quenaua nerecse' la'qaatqa ñi qota'a co'na' 'naac:
Sela' ma'le ca ỹa'qaataxanqajnec quiyim sa'auaxanta'gue da 'i'sa'gue,
qaiyi ỹa'maxatetañi ca nayiqui'.
28Qamiri shiñiỹapegaxaua', quená'ogue na qomyipi qaica ca 'nejem lecaic la'qaataxanqajnec ñi qota'a queso Juan só'maq nachilaxanataxanaq. Qam ná'maq ỹapaguec cocho'qui' queda lo'ueenataxanaxac ñi qota'a, paguec lecaic queso'maxare.
29Ca co'na' qara'xaỹa dajo, ca ná'ogue na qom chaqai ná'maq ỹacona'piguit ana nishiuete so nashi quiyi Roma, quesó'maq lachilaxanatqaipi so Juan, se qaỹoqolguit, ỹaatqajam huelec ñi qota'olec quiyim ỹaatqajam llic. 30Qam ná'maq fariseoipi, chaqai ná'maq rapaxaguinataxanta'pegue na naqataxaquipi ná'maq se qanachilaxan queso Juan, se nqo'ta dá'maq sham ỹo'uet ñi qota'olec quesaua'maxare. 31Ca' so qara'gaxala' 'naaco':
—¿Nega'ỹo' ca saloqojnaxañigui quena qomyipi nagui quenaua na'xata'? ¿Nega'ỹo' cá'maq paguec 'nejem nqaishin? 32Peeta'a 'nejem na ñaaqaipioqui' nqa'xantañi, neeta'ñi ca leuallaxauqa', ca ỹaualqatalec na liỹaripi, 'neetari': “Spe'taqatapiguilo naua qarpe'tel, qam se rasochii; chaqai so'ueenqata'pe naua nelaaco ỹaatqajam chicoxoiqa, qam se nohiñii.” 33Ma' novi'o' so nachilaxanataxanaq Juan ma' se ỹa'ic ca pan chaqai se ni'chigui ca lataxa, qam qamiri 'ñiỹac queso'maxare 'ue ca le'ec lecmaxaic. 34Ime, ca' novi' najo ỹale llaalec ma' ỹa'queetac na na'ic chaqai ne'teetac, ca' qamiri 'ñiỹac quiyim quemaraxauaic chaqai ne'taaxai chaqai nauochaxaua na sauaqhuaiquipi chaqai ná'maq ỹacona'piguit ana nishiuete ñi nashi quiyi Roma. 35Qam da la'deenaxanaxa ñi qota'olec re'oq nqai'en cá'maq 'deenaxanqachaqaiquipi.
So Jesús neeta'ñi yi la'a' so Simón só'maq fariseo
36Ca 'uo' so 'oonoqui' queso fariseoipi ỹal so Jesús quiyim lqui'ỹaxaua. Ca' so Jesús eec, quepegue' ca la'a' so'maxare. Ca co'na' ỹoviro, ca' nqa'xanñi, reloqotalec yi nqui'ỹaxala'. 37Ca 'uo' aso 'aalo qaỹa'deenta nanatqa lo'o' na'ñi yi na'a'. Ca co'na' 'ue ca la'xaỹaxac queso Jesús neeta'ñi yi la'a' so fariseo quiyim lqui'ỹaaqa', ca aso'maxare eec, ỹachita aso no'ueenata qa' leenaxat alabastro, no'qaatagui queso coraxat. 38Ca noỹentac quena lichil so Jesús, ca' quiỹota'pe, quiỹoxonalo naua lachi'. Ime, ca' ỹashiviaqte' naua lichil so'maxare, ỹahote'e na laue. Ca qo'goqota'pe chaqai ỹocorelgoto queso coraxat lo'daxaraic lahita. 39Ca co'na' ỹauanchigui dajo so fariseo só'maq lalecsec so Jesús quiyim lqui'ỹaxaua, ca' ra'deenataxantac, 'naaco': “Ñijo ỹale quiyim ỹaatqajam llic la'qaataxanqajnec ñi qota'a, ca' ishit ỹa'den añi 'aalo ipooteta'pe naua lichil, ma' añi'maxare nanatqa lo'o'.” 40Ca' so Jesús 'naapego' so fariseo, 'naaco':
—Shimoñi', 'uo' da shim sa'xatem qami'.
Ca' so fariseo 'naaco':
—Ajá'a, 'xachi', qami' napaxaguinataxanaq.
41Ca' so Jesús 'naaco':
—'Vio' saua dos ỹale' 'uo' aso la'uale' hueeto'ot so na'ualaxanaxala'. So 'óna quesaua'maxare ỹovi' quinientos denarios aso la'uale, qam so liỹa ỹovi' cincuenta. 42Ca' saua'maxare se ishite' ishiuetene' aso la'uale'. Ca' so na'ualaxanaxala' i'xorene' saua'maxare, ca' ỹapalaxat aso la'uale'. Ca' nagui, ca 'xachi', ¿nega'ỹo' ca quesaua'maxare paguec ca lqo'iichi?
43Ca' so Simón 'naaco':
—Peeta'a só'maq ỹale só'maq ỹapaguec aca qaỹapalaxat.
Ca' so Jesús 'naaco':
—Ajá'a, llic da 'ñirac.
44Ca' so Jesús ra'ỹo'ot aso 'aalo. Ime, ca' 'naapega so Simón, 'naaco':
—¿Qami' peeta'a ra'iisa'a ñijo 'aalo? Cana' ñinoxonougui na qauochi', qam se nañaañi' ca huaxaỹaq lquiỹoqte' naua ichil. Qam añí'maq ñijo 'aalo quiỹo' naua ichil, quiỹoxonalo naua lachi', chaqai ỹashiviaqte', ỹahote'e na laue. 45Se yqo'goqai', qam añi'maxare quena' ñoviro, chaqa'ma' nqo'goqota'pe naua ipiaate'. 46Chaqai sqai cochirigui na ỹaqahic quena coraxat, qam añi'maxare ỹocorelgoto naua ipiaate' queso coraxat lo'daxaraic lahita. 47Ca' vichiguiño' nagui shiñirapegaxaua', cañi'maxare queda lodegaxat le'xorenataxanaxa chicqochigui quiyim 'xoic ca lasauaxaset qaỹapalaxat; ma' ca qom quiyim sqailligueme' ca lasauaxaset qaỹapalaxat, ca' chaqai 'nejem sqailligueme' re'oq ca le'xorenataxanaxa.
48Ime, ca 'naapega aso 'aalo, 'naaco':
—Na rasauaxashichi' nagui ná'ogue mashic qaỹapalaxat.
49Ca' so nalecseripi nqa'xanta'ñi' so Jesús, ca ra'deenataxantac, 'naaco':
—¿Nega'ỹo' ñí'maq ñijo ỹale? ma' vire'ta na nasauaxaseteripi ishit quiyim ỹapalaxat.
50Qam so Jesús 'naapega aso 'aalo:
—Qami' nagui rca'llirec, ma' vi'relec. Ca' mo'e', qui', qaica huapigui qavilli'.
Currently Selected:
Lucas 7: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.