Lucas 8
8
So 'aallipi ỹotauantac so Jesús
1Ca co'na' mashic shi'gom dajo, ca' so Jesús 'xoic na queetagui na'aateripi chaqai na qoỹoqote'ogalo na'aate', ra'qaataxantac, ỹa'xatetac quiyim ñi qota'olec ỹoiquentac ná'ogue najo. Nauequetecto saua doce lapaxaguinatqa. 2Chaqai 'uo' so nauequeta'pegue' 'aallipi quesauá'maq shi'co' imeuec nqai'en queca le'ec lecmaxaic chaqai na chi ralolaxa. Ỹalequetaho' aso María qohinaco' quen Magdala lase, aso'maxare shi'co' chicqaugui so siete ne'ec lecmaxaiquipi; 3chaqai aso Juana, loua so ỹale leenaxat Chuza, so'maxare idaaneguelec yi la'a' so Herodes; chaqai aso Susana, chaqai 'xoic aso liỹa 'aallipi rotaanaxansa'pegue quená'maq 'ue quesaua'maxare.
Qaraloqojnaxana so nanaxanaq
(Mateo 13.1-9; Marcos 4.1-9)
4Hua'ñi, ca 'xoico' na eec, chicqotape'oga na na'aateripi qara'ajnaxana so Jesús. Ca co'na' mashic 'xoic so lapoỹata', ca retaqaugui, qam ỹahote'e ca laloqojnaxanaxat. 'Naaco':
5—'Uo' so nanaxanaq eec, ỹanñi aso lanecse la. Ca' co'na' danaxantac, ca 'uo' aso lanecse tajlec na lahi so nayic. Ca' aso'maxare qaico'vigui, chaqai ana qo'oole anac, ca ỹa'ic. 6Ca' aso liỹa lanecse tajlec yi se no'uen 'laua, ỹalliquichigui na qa'. Ca co'na' ñaxat, chita'gue ca rashivi, ma' sqoỹoxoñi na laquitaxa na 'laua. 7Ca 'uo' aso liỹa nanecse tajlec yi 'xoic ana le, ca' sqai ñaxat, ma' qaỹapolec cana le naquetashi'megue' na' ñaxat. 8Ca' aso liỹa nanecse tajlec yi ỹaatqajam lo'yaxanec 'laua. Ca co'na' ñaxat, ca ỹaatqajam 'xoic ana la. 'Uo' ana ỹovi' cien ana la co'na' qanaqat.
Ca co'na' ime da la'qaatec so Jesús, ca' ỹaatqajam nelamaxaren, 'naaco':
—No'm qamiri 'vii caua rque'lahi lauaco, ca' 'xaiỹo'.
Dá'maq 'neeto' quiyim so Jesús ỹahote'e na naloqojnaxanaxaquiripi
(Mateo 13.10-17; Marcos 4.10-12)
9Ca' so lapaxaguinatqaipi inato' so'maxare negue' ca 'neeta ca leloxoỹaxac dajo naloqojnaxanaxaqui. 10Ca so'maxare 'naaco':
—Ñi qota'olec ỹa'deenaxanaxanque qamiri ná'maq se re'xogui leloxoỹaxac da lo'ueenataxanaxac. Qam na liỹaripi sahote'e ỹaloqojnaxanaxat, qaiyi na'maxare quená'maq iuana, qam 'ec se reuanaxan, chaqai 'qaatac, qam se ỹa'den ca 'neeta cá'maq qaỹa'xat.
So Jesús ỹa'xat ca leloxoỹaxac só'maq raloqojnaxantapega danaxantac
(Mateo 13.18-23; Marcos 4.13-20)
11Ca' 'eda da 'neeta só'maq saloqojnaxantapega: Aso nanecse la chaqaida da qaỹa'xatetac la'qaatec ñi qota'olec. 12Qam aso nanecse tajlec na lahi so nayic, 'nejem ca qom quiyim na'xaỹaxantac. Qam anac so na'ỹaapec, ca rouootaxana'gue so na'qaatec hueetagui añi le'taxanata, ca sqai huelec nqai'en, qaiyi se nca'leuec. 13Ca' só'maq nanecse tajlec yi 'laua 'xoic na lalegue' qa', ca 'nejem ca qom quiyim na'xaỹaxantapega da na'qaatec, ca' 'ue da netoonaxac. Qam sqai 'chi'iñi caua lpa'yii da na'qaatec. Cocho'qui' huelec, qam quena' ỹovita ca ne'guenaxac, ca rashiiuec. 14Ca' asó'maq nanecse tajlec yi 'laua 'xoic ana le, ca' 'nejem ca qom na'xaỹaxantapega da na'qaatec. Ime, ca' queetalec, qam shi'gom, ca qaỹapolec da na'qaatec sauaxat quiyim ỹapacqajnauec na hueetalec na 'laua, chaqai da nesallaxa, chaqai dá'maq lqo'itaxanqachic quená'ogue nanchaqaina se no'uen. Ca sqaica ca laỹaxac nqai'en da na'qaatec. 15Qam asó'maq nanecse tajlec yi lo'yaxanec 'laua, ca 'nejem ca qom lo'yaxana aca le'taxanata, ca ỹa'maxate'tegue da na'xaỹaxanaxac, chaqai huelec da na'qaatec, chaqai quejlec. Se qoshiiuec, ca' ỹaatqajam 'ue da loquigaxac da laỹaxac.
Qaraloqojnaxana so ncoỹeraxanaxaqui
(Marcos 4.21-25)
16Qaica ca copata'a ca lcoỹeraxanaxaqui, ca ỹapolec, loqo'm ỹano'ot na lo' ca lo'paxala'. Ta'ta'a quiyim ỹanashiguim, qaiyi no'm 'ue ca nenoxono, ỹovira'oga ca lauaq. 17Ma' sqaica ca qoỹoqtetegueñi quiyim se re'oq quet. Chaqai qaica ca se re'xogui quiyim se qaỹa'den, ca qaỹachaxantec ca re'oq nqohin.
18Vichiguiño' ỹaatqajam na'xaỹaxañita, ma' cá'maq 'ue ca hueeto'ot, ca qanoquigaxatec ca qoỹaanem; qam cá'maq qaica ca hueeto'ot, ca' qanouora'gue vire'ta cá'maq 'neetapigui lauel quiyim hueeto'ot.
Aso late'e chaqai saua lqaỹa' so Jesús
(Mateo 12.46-50; Marcos 3.31-35)
19Ca' aso late'e chaqai saua lqaỹa' so Jesús ỹovirera'a ca hueeta'ñi so'maxare, qam se ishite' inoxondo, ma' ỹaatqajam 'xoic na qom. 20Ca 'uo' so ra'qaataxanem so Jesús, 'naaco':
—Ada qachii'i' chaqai daua rqaỹachi' pa'aasauec, ỹahosaque quiyim nauanchiguita.
21Qam so'maxare 'naaco':
—Cá'maq na'xaỹaxanalo naua la'qaatqa ñi qota'olec chaqai ỹaatqajam ỹo'ueete', ca' chaqaca aca ỹate'e, chaqai ỹaqaỹaripi.
So Jesús qaguiguit nqai'en so nonot chaqai so lo'paxa na huaxaỹaq
(Mateo 8.23-27; Marcos 4.35-41)
22Ca 'uo' so na'xa'a, ca so Jesús renojñigui aso qom lahi' huaxaỹaqse, liỹaata'pe saua lapaxaguinatqa. Ca 'naapegalo, 'naaco':
—Qolaq, saqta'gue da laseego ana latogot late'ogue'.
Ime, ca' que'. 23Ca co'na' ỹapaquesa'ta aso latogot, ca' so Jesús laqo'. Ca' chi re'laqataxanta aso latogot quiyim 'uo' so nonot quesaxanaxaic. Ca' vire'ta sham i'paxañigui aso lahite' quena huaxaỹaq, chaqai mashic sham iyinñi. 24Ca qoyicpegue' so Jesús, ca qanqo'xon. Ca' qohinapega:
—Qami' napaxaguinataxanaq, mashic sham iyiñiñi qomi'.
Ca' so Jesús ne'laxashiguim, ca nelaxa so nonot, chaqai so lo'paxa so huaxaỹaq. Ca qaguiguit sá'ogue, ca ipaque'tegue quiyim nayaarichiguiñi. 25Ime, ca 'naapegalo saua lapaxaguinatqa, 'naaco':
—¿Chi negue' ca 'neeto' ca rpi'ỹaxaguii?
Qam saua'maxare ỹaatqajam no'chi', chaqai ỹaatqajam 'ue da le'laqa'. Ca chi nenatetecta', 'nerac:
—¿Nega'ỹo' dá'maq dajo ỹale? ma' quena' ila' na nonot chaqai na huaxaỹaq, ca chaqa'ma' na'xaỹaxan.
So ỹale 'uo' so le'ec lecmaxaic na'ñi yi Gadara
(Mateo 8.28-34; Marcos 5.1-20)
26Ca co'na' qaỹovita yi 'laua Gadara yi hua'ta'gue da liỹa lemanaxa aso latogot late'ogue', nalo'ojta'a yi Galilea. 27Ca co'na' chi ỹovijta so Jesús quiyijo 'laua, ca naco' so ỹale chicqaugui yi na'a'. Sojo ỹale mashic 'vio' saua ñaxari quiyim 'uo' so le'ec lecmaxaiquipi, ca' totqa ỹañiñi naua loho. Chaqai totqai naugui ca 'imec. Qaicaata hueeta'oga ca napalyipi. 28So'maxare co'na' iuana so Jesús, ca ỹa'chi'iñi naua le'cootal quiyi reloqota'ñi so'maxare, ỹaualqatari':
—¿Chi'negue ma' nishichirau'a aỹim, qami' Jesús, llaalec ñi qota'olec ma' ñí ỹapacauec? Qami' ñi'xoresene'tot nagui quiyim se qa'vi'rahic.
29So'maxare 'naac dajo, ma' só'maq Jesús ỹo'deetapeguec so le'ec lecmaxaic quiyim ca'e so ỹale. Chaqai 'xoico' quen natot so ỹale so le'ec lecmaxaic. Ca' na qomyipi nollaaño' quen so'maxare, ca qaicoñite'o' quen naua laua' chaqai naua lichil quena caréna, qaỹahotaque quiyim qanollaañi. Qam qaiyiita ỹachipiaxate'. Ca' sojo ne'ec lecmaxaic i'guenec nqai'en quenaua hua'ñi qaica qom. 30Ca' so Jesús inato':
—¿Negue' ca qadeenaxachi'?
Ca so'maxare saat, 'naaco':
—Aỹim ỹeenaxat 'xoic.
'Naaco' dajo, ma' 'xoico' so lecmaxaiquipi neetagui so'maxare. 31Ca' sojo ne'ec lecmaxaiquipi ne'xoresene'tot so Jesús quiyim se ilari'ña ca nqa'viinqa' na sauaqhuaiquipi. 32Qam 'xoico' aso cooshipi que'eetac, neetalec aso quemarelec. Ca' sojo ne'ec lecmaxaiquipi ne'xoresentac quiyim qaỹasenta taugui sojo cooshipi. Ca' so Jesús ỹasene'tem taugui so'maxare. 33Ca' sojo ne'ec lecmaxaiquipi ca'e so ỹale, ca' taugui so cooshipi. Ca' sá'ogue i'guinñigui, chicqo'tot so lemanaxa, taañigui aso latogot late'ogue', ca' homac.
34Ca' só'maq neloxoỹaq queso cooshipi co'na' ỹauanchigui dajo 'neeta, mashic ne'guentagui quena lqolonaxa, ca ra'qaataxanem ná'maq neetaugui yi na'a' chaqai na neetalec na no'ueenaxa. 35Ca' na qom eec, ra'ajnaxane'oga ca hua'ñi dajo. Ca co'na' ỹovita yi hueete'e so Jesús, ca qaiuanejlec so ỹale só'maq chicqaugui so ne'ec lecmaxaiquipi, nqa'xantañi, neeto'oto naua lichil so Jesús, ỹansañi naua loho, chaqai mashic no'ueenta. Ca' ỹaatqajam 'ue da lqolonaxa. 36Ca' ná'ogue ná'maq ỹauanchigui da 'neeta so ỹale, ca so qomyipi ra'qaataxantac, ỹa'xatetac da 'neeta co'na' qaỹomatec so ỹale 'uo' so le'ec lecmaxaiquipi. 37Ca sá'ogue so qomyipi chi la'a' yi Gadara, ca ne'xoresene'tot so Jesús quiyim ca'e yi'maxare, ma' ỹaatqajam 'xoic da lqolonaxa. Ca' so Jesús lotqai renojñigui aso qom lahi' huaxaỹaqse, ca' eec. 38Ca' so ỹale só'maq chicqaugui so lecmaxaiquipi ne'xoresentacot so Jesús quiyim qaỹa'maxarenta eec, quegue so'maxare. Qam so Jesús 'naapega quiyim no'ueenañi, ca 'naaco':
39—Pillire'ogo' ma'le ca ra'aachi'. Ca 'xachi' dá'ogue dá'maq qota'olec lo'ueenataxanaxac caqami'.
Ca' so ỹale eec, ca ra'qaataxantapougui sá'ogue so na'a' quedá'maq 'ne'teco' na'le so Jesús queso'maxare.
Aso llaale so Jairo, chaqai aso 'aalo ipootau'a so napoxoqui so Jesús
(Mateo 9.18-26; Marcos 5.21-43)
40Ca co'na' mashic pilta'gue da laseego añi latogot late'ogue' so Jesús, ca co'na' ỹovijta, ca so qomyipi ỹaatqajam ỹa'maqachigui lauel, ma' sá'ogue nauaanta'guit so'maxare. 41Ca novi'o' so ỹale leenaxat Jairo. So'maxare nashi caso lapoxoqui na judioipi. Sojo ỹale ỹa'dooto naua le'cootal so Jesús, ca ne'xoresene'tot ỹahotaque quiyim qoyicpegue' ca la'a'. 42Ma' so'maxare 'uo' aso 'oono'lli' llaale. Aso'maxare mashic ỹovite' doce ñaxari, chaqai aso'maxare mashic ileuetac. Ca co'na' eec so Jesús, ca ỹaatqajam 'xoic na coỹaretaho, ca vire'ta quiyim qanpataxagui.
43Ca' queso qomyipi ỹalequetauguio' aso 'aalo 'ue so le'ne'. Aso'maxare mashic ỹovi' doce ñaxari da le'xoric quiyim naqueta'pe naua leuo'. Chi ỹomatetaho' quena natarenataxanyipi sá'ogue so louenqaipi, qam sqaica ca ishit ỹomatec. 44Ca' aso'maxare noquiiga'a so Jesús quena lelaq. Ca ipootau'a na lahi so napoxoqui. Ca chaqa'ma' so neuo' naquetac 'miguit.
45Ca' so Jesús renataxano':
—¿Negue' ca yipootau'a?
Qam sá'ogue 'naac sqaica, ca' so Pedro chaqai saua liỹa' 'neraco':
—Qami' napaxaguinataxanaq, quena qomyipi, ca npataxagui qami', chaqai sqa ỹaataq cá'maq qaramaqaitegue, qam nataxañisac: “¿Negue' cá'maq yipootau'a?”
46Qam so Jesús 'naaco':
—'Uo' ca yipootau'a, vichiguiño' ñauate'e quiyim 'ue so somatec queda iquesaxanaxa.
47Ca' aso 'aalo co'na' ỹa'den quiyim qaỹa'den da 'neeta, ca nanac, qam i'loxolta'guit, ca' ỹa'chi'iñi naua le'cootal quiyi reloqota'ñi so Jesús. Ca' ra'qaataxanem so'maxare quedá'maq 'neeta quiyim ipootau'a so'maxare, chaqai dá'maq 'neeta quiyim imeuec. Ca' sá'ogue so qomyipi 'qaachigui aso'maxare. 48Ca' so Jesús 'naapego' aso'maxare:
—Ỹaqaỹole, mashic remi'rec nagui, ma' qami' vi'relec. Mo'e', qui', sqaicanqaida nagui caqami'.
49Qam co'na' ñaq retaqatac so Jesús, ca 'uo' so novi', chicqa'a ca la'a' so Jairo só'maq na'gaxala' caso lapoxoqui na judioipi. Ca qara'qaataxanem so'maxare, qohinac:
—Ayí'maq qachaalli'i' mashic ileu. Se ỹa'maxañi quiyim 'xoic ca ledaxac nqai'ñi' na napaxaguinataxanaq.
50Ca' so Jesús co'na' 'qaachigui dajo, ca 'naapego' so Jairo:
—Totaxan ro'chi'i'. Chaqaidaata quiyim vi'relec, qaiyi aca qachaalli'i' imeuec ma'le.
51Ca co'na' ỹovira'a so 'imec, se ỹa'maxaren ca liỹa inoxono, chaqaisauate' saua Pedro, Jacobo, Juan, so leta'a chaqai aso late'e aso nequetegaxai. 52Ca sá'ogue so qomyipi noỹentagui chaqai naualqategueñi caso'maxare. Qam so Jesús 'naaco':
—Se nohiñii. Ma' yi nequetegaxai se ileu. Ayi'maxare chaqai laqata.
53Qam chaqai qai'neetac so'maxare, ma' qaỹa'den quiyim mashic ileu aso'maxare. 54Ca' so Jesús ỹacona da lqai'laxat, ca 'naapega aso'maxare, qam netenegue da la'qaatec:
—Qami' nequetegaxai, shiñirapegaxaua' ne'laxachirishiguim.
55Ca' aso'maxare rapil da lca'laxa, ca chaqa'ma' ne'laxashiguim. Ca' so Jesús relaataxanlec quiyim qaỹa'ue ca qoỹaanem loq. 56Ca' saua leta'al ỹaatqajam 'xoic da le'laqa'. Qam so Jesús 'naapegalo quiyim sqaica ca qara'qaataxanem queda 'neeto' na'le.
Currently Selected:
Lucas 8: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.