Rut 3
3
Da lqouagaxa so Booz
1'Uo' so na'xa'a, ca' aso Noemí 'naaco' caso Rut:
—Qami' ỹaalole, ỹim sedaanaque ma'le ca roua'e', cá'maq ỹa'maqachiguiñi nqai'en qami'. 2Ma' so Booz só'maq lauo' le'ec yi Elimelec, quena pe quepegue' yi lanaxanqa' no'ueenaqtegue ana la na lanecsec yí'maq viise'e scavit liỹa na' 'ueenataxañi'sac. 3Ca' nagui, ca na'maxachiriñi: nachilli', nocochirigui ca nocoraxachi', chaqai ñi'riñi cauá'maq no'viiñi qatoohi'. Ime, ca' 'ire'uegue da'maxare. Qam se nachaxañita ca'maxare ma' saqa' ỹomat quiyim que'e chaqai ne'et. 4Ỹaatqajam na'ijñitetegue cá'maq viichi'ñi ma' laq. Ime, ca' quirepegue', ca' huachirelgoto naua lichil, ca' nenañiriñi. Ime, ca' chaqaica 'naapega qami' ma'le quecá'maq 'ñitetegue.
5Ca' aso Rut 'naaco':
—Ajá'a, ỹim shine'tegue ma'le dá'ogue dá'maq 'ñirapiguiỹa'.
6Ca' aso Rut quepegue' so nanaxanqa', ca' ipacqajanchigui dá'ogue dá'maq 'naac aso ni'ỹoqoro. 7Ca' so Booz co'na' ỹomat da lqui'ỹaxac chaqai da ne'taxac, ca' 'ue da netoonaxac. Ime, ca eec laq, hue'tot ca lapoonecsec la. Ca co'na' ncopa, ca' ỹoviro aso Rut se qanauate, qaica ca lauaquiaxa. Ca' ỹauajlgoto naua lichil, ca' nenanñi. 8Ca co'na' pe lauel, ca' so Booz nelouec. Ca co'na' naqalgoxoñi, ca no'daxatetec quiyim 'ue aso 'aalo nenantañi quenaua lichil. 9Ca' so Booz inato' aso'maxare, 'naaco':
—¿Negue' aqami'?
Ca aso'maxare 'naaco':
—Aỹim Rut, chaqaỹim relaata'e'. Ma' qami' lauo' le'ec yi ỹoua Mahlón, ca' chaqaiqami' ná'maq shichi' quiyim quelolliriua'. Sahotaque quiyim ỹim roua'e'.
10Ca' so Booz 'naaco':
—¡Ñi qara'gaxala' ỹaanem qami' ma'le ca lqouagaxa! Nagui, ca' re'oq quiyim se napaquiralec repaquisa'pegue' só'maq roua'e' mashic tot qaica. Ma' qami' shichi' quiyim michiraque cá'maq paguec ne'necoqui' caỹim quiyim roua'e', 'eno'm 'xoraic loqo'm nesallaxanec, qam sqai 'ñitetegue dajo. 11Totaxan ro'chi'i', qami' ỹaalole, ma' ná'ogue na qomyipi ỹa'den quiyim qami' 'maxataxarai. Vichiguiño' ỹim so'uet dá'maq 'ñirac. 12Qam 'nesa ma' llic dá'maq 'ñirac quiyim qami' i'ỹoxoua, qam 'ue só'maq liỹa ri'ỹoxoua'e' só'maq ỹaatqajam tajlec quiyim ỹo'uet dá'maq 'ñirac. 13Qam chaqaina vira'ñi quena pe. Ca ma' nete'e, no'm so'maxare ipaquejlec da qano'ueenataxac quiyim qaro'ñiguit aca ni'ỹoxoua, ca no'm ipaquichigui nqai'en, ca' chaqaiso ỹo'uet da'maxare. Ta'to'o' quiyim se ỹo'uet, ca' ỹim so'ñiguit qami'. Ca' 'qaachigui nagui aỹim ñi qara'gaxala' quiyim sepacqajanchigui so'uet da'maxare. Ca' nagui 'maxaraic quiyim liyi laqe', toco' ma' richiguiñi.
14Ca' queso pe laq aso Rut hueeta'ñoto naua lichil so Booz, ca na' mashic saqa' richiguiñi queso liỹa na'xa'a na' ñaq napaltañi. Ma' so Booz 'naaco': Qaica ma' 'ue quet ca ỹa'den quiyim ana 'aalo noviretec quenajo.
15Ca' so Booz 'naaco':
—Naqachi' na napoxogui'i', ca lo'qo'isañi.
Ca co'na' aso Rut lo'qootañi aso napoxoqui, ca' so Booz ỹocorelec queso paguelec cuarenta kilo caso cebada. Ime, ca' ỹotauan quiyim nenaqshiguim quenaua lallaaco, ca so'maxare pilo quiyi na'a'.
16Ca co'na' ỹoviro aso Rut, ca qainatetaco' caso ni'ỹoqoro, 'naaco':
—¿Tegue' chi no'uen qayicyaxaqui', ỹaalole?
Ca' aso Rut ỹa'xato' dá'ogue dá'maq 'neeto' na'le so Booz caso'maxare. 17Chaqai 'naaco':
—Nañaañim qai'neeta ná'ogue najo cebada. Ca 'naapiguiỹa': Qaiyi 'ue ca ri'ỹaaqui', ma' vichira'a aca ni'ỹoqoro'e'.
18Ca' aso Noemí 'naaco' caso'maxare:
—Hua' nagui, qami' ỹaalole, ñaq nauaañira'a negue' cá'maq 'neeta ma'le dajo. Ma' sojo ỹale se nco'matec quena na'xa'a, no'm saqa' ỹomat quiyim ỹoiquentac ca leloxoỹaxac dajo.
Currently Selected:
Rut 3: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.