Lucas 15
15
Qaraloqojnaxana aca qagreta quiyim na'laañi
(Mateo 18.10-14)
1Ná'ogo' na sauaqhuaiquipi chaqai na ỹacona'piguit ana nishiuete so nashi quiyi Roma, nqo'neetau'a so Jesús, ỹahotaque na'xaỹaxana. 2Ca' quedajo, so fariseoipi chaqai ná'maq rapaxaguinataxanta'pegue na naqataxaquipi, queeteguelec se no'uen na ỹa'xatetac queso'maxare, 'naaco':
—Dajo ỹale ỹacoñi'chiguit na sauaqhuaiquipi, chaqai lqui'ỹaxauaripi na'maxare.
3Ca' so Jesús ỹa'uo' so raloqojnaxana, 'naaco':
4—¿Negue' cá caqamiri, no'm cien aca lalo qagreta, ca 'ue aca 'oono'lli' na'laañi, mesqai po'an aca noventa y nueve quena no'ueenaxa, ca' idaanaque acá'maq na'laañi, vire'to' ma' ỹanata? 5Ca noma' ỹanata, ca illaalec na lallaac, ca ỹaatqajam ỹa'maqachiguiñi. 6Ca' ma' ỹoviro queca la'a', ca lapoonta' ca namigollipi chaqai ca la'aayaxauaripi. Ca' 'naapega: “'Maxaraic qamiri ñitoonaxaua', ma' mashic sanata añi ilo qagreta na'laañi.” 7Ca' ỹim shinac chaqai 'nejem queda piguim ỹaatqajam 'xoic ca toonaxac quiyim 'ue ca qom sauaqhuaic netacocha queca noventa y nueve qomyipi 'maxaraic se ỹouen quiyim netacocha.
Qaraloqojnaxana aso nam chiróla na'laañi
8Loqo'm ¿negue' aca 'aalo quiyim hueeto'oto caua diez chiróla, ca 'ue aca na'laañi, mese copata'a aca lcoỹeraxanaxaqui, ca' i'lec ca la'a', qam ỹaatqajam 'xoic da letelaxa ra'iite'e vire'to' ma' ỹanata? 9Ca' ma' ỹanata, ca lapoonta' na namigallipi chaqai na la'aayaxaua 'aallipi, ca 'naapega: “Netoonaxauahi aỹim, nagui mashic sanata ayí'maq ỹam chiróla na'laañi.” 10Ca' ỹim shinapegalo qamiri ỹaatqajam 'ue qai'neeta da netoonaxac ná'maq qota'a lelaatqaipi piguim laseripi, quena' 'ue ñi netacocha quena sauaqhuaiquipi.
Qaraloqojnaxana so ñaalec iualaxain ca lesallaxa
11So Jesús qai'neeta 'naac:
—'Uo' so ỹale 'vio' saua dos llaalqa. 12Ca' so na'aasa quesaua'maxare 'naapego' so leta'a: “Qami' ita'a, nañaañirim dá'maq qatqajañisari' quiyim taalec aỹim isallaxa.” Ca' so leta'a ỹasectaqchigui da lesallaxa quesaua'maxare. 13Ca co'na' saqa' vite' saua na'xata', ca so ñaalec na'aasa imen sá'ogue só'maq chi louenec. Ca' aso laseuete i'xat, quepegue' so liỹa 'laua. Ca' quiyi, ca chi iualaxain aso lam, chaqai nalecqajantaugui na se no'uen da llicyaxac. 14Ca co'na' imeho sá'ogue aso lam, ca novi' so nqopaaxa lodegaxat queso neetalec 'laua. Ca' quiyi, so'maxare ỹaatqajam ỹoviro'ot da lqopaaxa. 15Ca' eec imitaque ca lo'ueenatec, ca quepegue' so ỹale chi la'a' sojo 'laua. Ca' sojo ỹale ilata só'maq na'laua quiyim reloxaỹa'a nqai'en aso lalo cooshipi. 16Ca' so'maxare ỹaatqajam 'ue da lishoxo quiyim ỹa'ic, ca' quema' quená'maq map ỹa'queetac so cooshipi, qam qaica ca ỹaanem. 17Ca' quiyi, ca ra'deenataxantac, 'naaco': “¡Ỹaatqajam cá'ogue ca ro'ueenataxantac queca la'a' ca ita'a ỹaatqajam se ỹouen na loq, qam ỹim quena seueta'ñi yalauat na ỹoqopaaxa! 18Aỹim sopila ma'le yi la'a' ca ita'a. Ime, ca' shinapega ma'le, shinaco': Qami' ita'a, ỹim 'uo' da ỹasauaxaset hueeto'ot ñi qota'olec chaqai caqami'. 19Ca' vichiguiño' nagui sqa taiguit quiyim 'ñirapiguiỹa' ỹim qachaalqui'. Ta'ta'a quiyim 'ñi'sahic relaachiqui'.” 20Ca' quiyi, ca' eec, pila yi la'a' so leta'a.
Ca co'na' ñaq qoỹoqo'chiguit, ca so leta'a ỹauañi'chiguit so'maxare. Ca' ỹaatqajam 'uo' da le'xorenataxanaxa. Ca' ne'guenta ca'guit. Ca co'na' ỹovichiguit, ca' qa'aalegue chaqai nqo'goq. 21Ca' só'maq llaalec 'naaco': “Qami' ita'a, aỹim 'uo' da ỹasauaxaset hueeto'ot ñi qota'olec chaqai qami'. Ca' vichiguiño' sqa taiguit nagui quiyim 'ñirapiguiỹa' ỹim qachaalqui'.” 22Qam so leta'a 'naapego' so lelaatqaipi, 'naaco': “Chaqa'ma' coñiỹalo caua no'viiñi noho, ca' ỹañiñi nqai'ñii, chaqai ỹanñi nqai'ñii aca lichicshaqate chaqai caua lapelate'. 23Ime, ca' naviguiuo cá'maq ỹaatqajam 'uegaxasaq huaqui llaalec, ca' lauachii. Ime, ca ¡squi'ỹaq, so'ueetaq ca qaremaqachic! 24Ma' dajo ỹaalcolec mashic tot qaica, qam liỹa nca'leuec. Da'maxare mashic na'laañi, qam mashic sanataxa.” Ca' qaỹo'uet sojo nemaqachic.
25Qam ñaqai hueeta'oga na no'ueenaxa só'maq ỹi llaalec. Qam co'na' rapilo, ca mashic ipalatau'a yi la'a', ca 'qaatapegueu'a so neviiguellipi chaqai so rasotaxaripi. 26Ca' roỹaxana so 'óna queso ne'naqaipi, ca inatetac chi negue' ca 'em qaỹo'uet dajo. 27Ca só'maq ne'nec 'naaco': “Ñi rqaỹa'e' novi', vichiguiño' ñi qata'ahi relaataxanlec quiyim qaỹalauat so ỹaatqajam 'uegaxasaq huaqui llaalec, ma' ñi'maxare novi' 'maxaraic chaqai no'ueenta.” 28Qam só'maq lqaỹa ỹi ro'o, ca' se inoxono. Ca' vichiguiño' so leta'a que'oga, ne'xoresene'tot quiyim inoxono. 29Qam so'maxare 'naaco' queso leta'a: “Qami' 'yiiñite' ỹoto'o' naua ñaxari quiyim so'ueenataxantacot qami', chaqai se ỹauana quiyim se ña'xaỹaxana qami'. Qam se ỹauanapega quiyim 'ue ca 'oonoqui' 'ỹaañitem aỹim quetaq llaalec, qaiyi so'uet ca iqui'ỹaxac, ca ñouanta'ai' na ñamigollipi. 30Qam nagui novi' ñi qachaalqui' ma' chi iualaxain aso qadami' cana nanatqa lo'o', ca' lauataxañirelec, lauachi' so huaqui llaalec 'uegaxasaq.” 31Ca' so leta'a 'naaco': “Qami' ỹaalcolec, qami' sqoỹoqape'oga caỹim. Ca vichiguiño' ná'ogue ná'maq hueetaỹot ná'ogue qatooỹaqui'. 32Qalaxam nagui 'maxaraic quiyim so'ueetaq ca qarqui'ỹaxac quiyim ñitoonqatac. Ma' ñi rqaỹa'e', ñi'maxare mashic tot qaica, qam lot liỹa nca'leuec; ñi'maxare mashic na'laañi, qam mashic sanataxa.”
Currently Selected:
Lucas 15: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.