Josué 6
6
Dá'maq 'neeta na' qanalauate'e' so neeta'ñi yi Jericó
1Qaica ca inoxonec chaqai ca inoxono quiyi Jericó, ma' mashic qaỹapoguilo naua lasomi' yijo na'a' lodegaxat, qaiyi qaica ca inoxono quena Israel llaalqaipi. 2Qam ñi qara'gaxala' 'naaco' queso Josué:
—Ỹim saanem qami' na Jericó quiyim qadoxonqui' ñi lashi chaqai ná'ogue na nalliripi. 3Ca' qamiri nalliripi na Israel llaalqaipi, 'oonoqui' lepachilec na na'a' quiyi na'xa'a, viraqchiỹauec caua seis na'xata'. 4Siete caua netaxaỹaxanqajanqa 'auesauec caso lahi' naua ỹaqataxaco, quiñi 'óna no'qoota'a aca lpe'te qagreta loua' lasote. Ca' ma' ỹovire'oga ca liỹa na'xa'a, ca' siete qallichiñi yi na'a' quiyim na netaxaỹaxaquiripi ñaq pe'teetapigui na lpe'tellipi. 5Ca ma' qamiri 'xaiỹaque cá'maq ỹaatqajam no'uen npe'taxanaxac, ca' qamiri ỹaatqajam nichiñigue ca raualaxaguii, ca' na nquepaqataxanaxat 'guiñi ma'le. Ca' ma'le, ca' quiñi 'óna caqamiri ỹalamaxateta'a yi na'a'.
6Ca' so Josué roỹaxanougui so netaxaỹaxanqajanqaipi, ca 'naaco':
—Coñiỹot añi lahi' naua laqataxaco ñi qara'gaxala'. Ca' siete caua 'auete' caqamiri, 'avitauec cañi lahi' naua naqataxaco, pi'chiitapiguilo caua rpi'chii qagreta loua' lasote.
7Ca' queso liỹa qomyipi, ca 'naaco' so Josué:
—Ca' na ỹalliripi nalauataxairipi, ca naqaletenlec na na'a', 'auetauec cañi lahi' naua laqataxaco ñi qara'gaxala'.
8Ca sá'ogue ỹo'uet dá'maq qohinapega queso Josué. Saua siete netaxaỹaxanqajanqa 'auesauec caso lahi' saua laqataxaco ñi qara'gaxala', pe'teesapigui saua siete lpe'tel. Ca' coỹaretauo aso lahi' saua naqataxaco. 9Ca' so ỹalliripi nalauataxairipi 'auetauec queso netaxaỹaxanqajanqaipi. Ca' so liỹaripi nalauataxairipi coỹaretauo caso lahi' saua naqataxaco. Ca' so netaxaỹaxanqajanqaipi se nco'majñi pe'teetapigui na lpe'tellipi. 10Qam queso nalauataxairipi 'naaco' so Josué quiyim i'maqajlem, nauaanta'a quiyim qoỹilen quiyim netenegue ca laualaxac.
Noxonec so Jericó
11Ca' so Josué ỹo'uet quiyim naqaletenlec yi na'a' aso lahi' saua laqataxaco ñi qara'gaxala'. Ime, ca' pila'a ca nco'matqa', ca hueeta'anyi queso pe. 12Ca' queso liỹa nete'e na' nete'etam, ca' so Josué ne'laxashiguim, ca' so netaxaỹaxanqajanqaipi ỹaconot aso lahi' saua naqataxaco. 13Ca' saua siete netaxaỹaxanqajanqa 'auesauec caso lahi' saua naqataxaco, sqai hua'e chaqai sqai ỹaxanñi da lpe'taxanaxac caso lpe'te. 14Ca' queso liỹa na'xa'a, ca lotqai liỹa ỹaqaletenlec yi na'a', ca lotqai pila'a ca nco'matqa'. Ca' chaqaida 'neeta'gue quesaua seis na'xata'.
15Ca na' ỹovire'oga so liỹa na'xa'a na' nalagaxashiguim so na'xa'a, ca qaỹaqaleten yi na'a' dá'maq chi qohinta'co' quen, qam quesojo na'xa'a, ca' siete qanaqaletenlec. 16Ca co'na' so netaxaỹaxanqajanqaipi siete pe'taxan. Ca' so Josué 'naaco' queso qomyipi:
—¡Raualaxahi! Ñi qara'gaxala' ỹo'uet quiyim qadoxoñiguii najo na'a'. 17Najo na'a' chaqai ná'ogue ná'maq hueetaugui na'maxare, na'maxare qoỹaanec quiyim ná'ogue nomachiichiguiñi, ma' ñi qara'gaxala' chaqaida dá'maq ỹahotaque. Qañiita añi nanatqa lo'o' leenaxat Rahab qanca'laxatetauec chaqai ná'maq neeta'ñi yi la'a', ma' ñi'maxare ỹoxochiñi na'le saua na'ajnaxana' ñilataxai' na'le. 18Qam quena' qamiri qaico' ca coñiỹa chaqai ca pochiỹau'a quená'maq 'ue quenajo na'a', ma' ñi qara'gaxala' ỹaatqajam ỹaanec quiyim ná'ogue nomachiichiguiñi. Ma' no'm 'ue ca 'ue ca iconau'a quena'maxare, ca' ishit quiyim qaỹa'ue ca nouaxanaxaset na nco'matqa' na llaalqaipi so Israel, ỹaatqajam chalego lecaic ca ne'guenaxac nqohin. 19Ca' na 'oro, plata, bronce chaqai ná'ogue na lecat fierro qoỹaanot ñi qara'gaxala' quiyim lalamaxat.
20Ca' so qomyipi co'na' ỹaualaq chaqai so netaxaỹaxanqajanqaipi pi'chigui so lpe'tellipi. Ca co'na' 'qaa so Israel llaalqaipi queso lelamaxa so npe'tellipi, ca' ỹaatqajam netenegue da laualaxac, ca' so lapoxonaxat yi na'a' 'guiñi. Ca' qaỹalamaxatau'a yi'maxare, ca' noxonec. 21Ime, ca qanalauajñi, qaỹahote'e na lecat, na ỹalliripi chaqai na 'aallipi, ne'naqaipi, chaqai na qo'xoiquipi, vire'ta na ñii'lolaipi, na qagretaipi, na 'ashinyipi, ná'ogue qanomachichiguiñi.
22Ca' so Josué 'naaco' quesaua dos lelaatqa sauá'maq ra'ajnaxanto na'le yi 'laua:
—Quiipegue' yi la'a' aca nanatqa lo'o', ca' naviguiuec chaqai cá'ogue ca lauo' laseripi, pacqajñichigui dá'ogue dá'maq ra'qaachiguio' na'le.
23Ca saua'maxare quera'a, ca' naueguerec aso Rahab, chaqai so leta'a, aso late'e, so lqaỹaripi, chaqai sá'ogue so lauo' laseripi. Ca' qaỹa'ue ca qoỹana'ñi qaỹa'maxachichiguiñi ỹoqota'oga nqohin queso lanatqa' so Israel llaalqaipi. 24Ime, ca' so Israel llaalqaipi copata'a yi na'a' chaqai ná'ogue ná'maq hueetaugui yi'maxare. Ca quená'maq qaicona qainaata na 'oro, plata, chaqai na nouenec bronce, chaqai na fierro, ca' qaỹo'uet quiyim lalamaxaret ñi qara'gaxala'. 25Ca' so Josué nca'laxatetauec aso Rahab chaqai sá'ogue so lauo' laseripi, ma' ỹoxochiñi na'le saua na'ajnaxana' ilate' na'le so Josué quiyi Jericó. Ca' chaqaiyi viichigui, ca' so llaalqaipi aso Rahab ỹalequetaugui na Israel llaalqaipi.
(6.26—9.27 So nalliripi so llaalqaipi so Israel ỹa'queetalec so Josué ỹovita yi Canaán, noxonec yi na'a' lodegaxat Hai. Qaỹayin so qomyipi, ca na'deene'e' so na'ñi yi Gabaón.)
Currently Selected:
Josué 6: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.