Jonás 4
4
So Jonás ro'o
1Ca' so Jonás ỹaatqajam se nqo'ta da 'ne'teco' na'le ñi qota'olec, ca' ỹaatqajam 'xoic na lauel. 2Co'na'le, ca' nqouagaxainot ñi'maxare, 'naaco':
—Ñaqa 'ajñi', qami' ỹa'gaxala', chaqaida dajo dá'maq shinac quen quiyim 'neeta ma'le na' ñaqai senta'gue da ỹa'a'. Vichiguiño' chaqa'ma' sham seet, saigue da Tarsis, ma' ỹim sa'den quiyim qami' 'xorenataxanaxai chaqai 'ñaaxaic qavilli'. Ca' 'xachi' da rouaxanaxanaxaqui', qam lotqai netogochi', ma' paguelec da re'xorenataxanaxa'e'. 3Vichiguiño', qami' ỹa'gaxala', nagui ñi'xoresene'tot qami' quiyim coñita da ñachaalataxac. Ma' paguec la'maxa quiyim yileu, sqai 'nejem quiyim yca'leetauec.
4Qam ñi qara'gaxala' 'naaco' queso'maxare:
—¿'Ñiisapego' 'maxaraic quiyim 'ohi'?
5Ca' so Jonás ca'e yi na'a', ca taigue da lqodoigue quiyi'maxare. Ca' ỹo'ueeto' so laho'oqui' ỹa'daañi. Ca' nqa'xanñi queso la'al, ma' ỹahotaque quiyim ỹa'ajantac ma'le cá'maq 'neeta yi na'a' lodegaxat. 6Ca' ñi qara'gaxala' qota'olec ñaxato' nqai'en aso noueela late'el naua lauee 'ec ana lo'guilli, qaiyi na'leetalec nqai'en na lqahic so Jonás, qaiyi ỹa'maqachigui lauel. Ca' so Jonás netoonta'pegue aso noueela loỹo. 7Qam na' richiguiñi queso liỹa na'xa'a, ca' ñi qota'olec ila' so ñilo' quiyim ichic, ca' ỹaso nqai'en aso'maxare. 8Ca co'na' nenoxonshiguim aso ra'aasa, ca' ñi qota'olec nac nqai'en so nonot pa'e chicqa'gue da lqodoigue. Ca so'maxare tajlec so npa'ỹaaxa, ca' chita'co' quen ileueta, ca' ỹahotaco' quiyim ileu. Ca 'naaco':
—Paguec la'maxa queta' yileu, mesqai 'nejem quiyim yca'leetauec.
9Qam ñi qota'olec 'naaco' queso'maxare:
—¿'Ñiisapego' ỹa'maqachiguiñi quiyim 'ohi', ma' ỹaso aso ropillichi'i' noueela?
—¡Pacaco' ỹa'maqachiguiñi nqaishin! —'naaco' so Jonás—. ¡Ca ỹim sahotaque quiyim yileu paguelec na iuel!
10Co'na'le, ca' ñi qara'gaxala' 'naaco' queso'maxare:
—Qami' sqai ñi'riñi aso noueela loỹo, chaqai se noquiic da llaxataxa nqai'ñi'; ñaxat queso 'óna pe, ca' queso liỹa na'xa'a, ca' ileu. Qam 'xoriñi'sac. 11Ca huose'quet sqai paguec ca i'xorenataxanaxa quiyi na'ñi yi Nínive, yi chalego lecaic na'a', yí'maq ỹovi' ciento veinte mil na ñaaqaipioqui' neeta'ñi yi'maxare saqa'leca ca ỹa'den, chaqai 'xoic na iseripi nelo.
Currently Selected:
Jonás 4: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.