Job 42
42
1-2Lotqai 'naac so Job:
Ỹim sa'den quiyim qaica ca rqalañiqui',
chaqai sqaica quet cá'maq sqo 'viichi'.
3¿Negue' quet ná'maq ỹim queta' se se'taxajñi da rcochaxaqui' quená'ogue?
'Ec ñichoxotari' quiyim qaica ca sa'den.
Ma' ỹim sa'xatetac ná'maq se sa'den,
ná'maq leloxoỹaxaquipi qaica nqai 'nejem se sa'den cá'maq leloxoỹaxac.
4Qami' 'ñirac caỹim: Na'xaỹaxañi', ñaq setaqa,
choxochi' ca leloxoỹaxac na inataxanaxaquipi.
5Ỹovireta'a nagui qaidaata quiyim chi sa'qaatapega qami', ca' sa'yiiñi',
qam nagui, ca' ỹaatqajam ya'iito'ot qami' quenaua ñqote'.
6Ca vichiguiño' nagui, ca 'xoic da ñitogotaxa,
ca ñqa'xantañigui na namoxoỹaxa chaqai na lo quena ỹayiloxo.
Ñi qota'olec ỹopilaxatot da lesallaxa so Job
7Ca co'na' ime da ỹa'xatetac ñi qota'olec queso Job, ca lotqai 'naac queso Elifaz:
—Ỹaatqajam yoquii'a qami' chaqai saua dos nauochaxauachi', ma' sqa 'xachii dá'maq llic caỹim, mesqai 'ñiita ñi ilaatec Job. 8Ca' nagui, ca coñiu'alo caua siete toorol chaqai caua siete qagreta louaari, ca quiipegue' ñi ilaatec Job, ca 'ỹaañiuo quiyim qaỹavigaxat. Ca' ñi ilaatec Job nqouagaxainlgoto qamiri, ca' ỹim secoñiguit ma'le ca nqouagaxainaxac. Ca' sqaica ca shinegue caqamiri ma'le, ma' 'ue quet ca nouaxanaxashichii, ma' sqai 'xachii cá'maq lliqueta caỹim, sqai 'ñiita dá'maq 'ne'tegue ñi ilaatec Job.
9Ca co'na'le, ca que' saua Elifaz, Bildad chaqai so Zofar, ỹo'ueete' dá'maq qohinapegalo quiñi qota'olec, ca ñi'maxare saachiguit na'le da nqouagaxainaxac so Job.
10Ca co'na' ime quiyim so Job nqouagaxainteguelgoto saua nauochaxaua', ca' ñi qota'olec ỹopilaxatot na'le so lesallaxa, qam ỹaatqajam ỹa'iitec nqai'en so ỹaanem. 11Ca co'na'le, ca' qara'piicha queso lqaỹaripi ỹalliripi chaqai so 'aallipi, chaqai so nauochaxauaripi, chaqai sá'ogue so ñaauapec lauanatqaipi. Ca na' queso lapoxoc, ca' qaỹo'uet so nqui'ỹaxac quiyi la'a'. Ca' ỹaatqajam 'ue da nqui'ic, ca' qaỹa'ñaxatetac queso ne'guenaxac na'le qanelata quiñi qara'gaxala'. Ca' quiñi 'óna, ca ỹa'ue ana lame lam queso'maxare, chaqai aso lichicshaqate 'oro.
12Ca' ñi qota'olec nqouaguegue so Job quesaua co'uaataxante' niñaxari, ca' paguec so ỹaanem queca 'auaxaic. Vire'ta na' ỹovi' catorce mil aso lalo qagreta, seis mil aso nauaanaxanaxa late'e, dos mil ñii'lolaipi, chaqai mil aso 'ashina, 13chaqai catorce so llaalqaipi chaqai tres saua llaale. 14Asó'maq ỹi ỹanco' leenaxat coviguiñic, ca' aso lano'o ỹanco' coraxat lo'daxaraic lahita, chaqai aso liỹa ỹanco' nashic la'meenaxat. 15Ca' quená'ogue na 'laua ỹapacauec loyaague' saua llaale so Job. Ca' so leta'a' ỹa'ue ca taalgoto quena lesallaxa 'nejme' saua lqaỹa' ỹale'.
16-17Ca co'na' ime dajo, ca' so Job lotqai ỹovi' ciento cuarenta ñaxari nca'leetauec. Ca' ileu, qam mashic qo'xoỹom, ca' ỹoviralec so llaalqaipi, lauaripi, chaqai so llaalqaipi so lauaripi.
Currently Selected:
Job 42: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.