Job 39
39
1¿Qami' peeta'a 'yiiñi' quena' co'o ana qagreta neuec?
¿Huañito' quena' co'o ana naueenec?
2¿'Yiiñi' ỹorete' caua shiriguiri quena' co'o?
3Quena' co'o, ca' ỹa'que'ejta',
ca' ne'qaañi ca llaalec.
4Quena'le, ca' ỹiitauec quena no'ueenaxa,
ca quena' ime, ca' eec, ca tot rapil.
5¿Negue' cá'maq ỹaanem da leuagaxa ca 'ashin neuec?
¿Negue' cá'maq ỹaxantac quiyim sootauec?
6Ỹim setan cá'maq loma' hueetalec ca 'laua qaica qom,
na ca'megue ná'maq 'ue na 'ue.
7Se nqo'ta na nauaxanaxa quena na'a',
chaqai se na'xaỹaxana na laualaxaquipi na no'ootaxanaq.
8Queeteguelgoto naua no'ueenaxari idaantaque ca 'uaqapi,
idaantaque canchaqaica 'uaqapi ladala quiyim ỹa'ic.
9¿Peeta'a 'ñiisapega shichi' 'ueenataxañirigui ca tooro neuec,
loqo'm hueetaugui ca rcoñiitaxanaxagui'i' quena qalo'e' queca pe?
10¿Peeta'a shichi' quiyim coñichiro, ca' 'ueenataxañirigui quiyim saugaxañi',
loqo'm quiyim coỹaretalec qami' quiyim moxoiqataxañisac quena no'ueenaxa?
11¿Peeta'a pi'iisa'a ca'maxare ma' ỹaatqajam quesaxanaxaic,
ca' 'xañitegue quiyim ỹo'uet ca ro'ueenachiqui'?
12¿Peeta'a 'ñiisapega quiyim ỹa'maqachiguiñi qataxañirigui ca'maxare quena qadañiguishigui' ala
chaqai quiyim lapoonta' potogola ná'maq co'teeta la?
13Ñaqai 'ajñi' so mañic:
so'maxare 'maaxaic, ỹauatetapiguilo naua laua',
'neete'm naua laua' na natagoxonaq.
14Ỹalate' ỹapolgoto naua lco'ueete' quena lo'uaxanaxa,
qaiyi viriguilo nqai'en na ra'aasa lauaq.
15Sqai huapigui lauel quiyim 'ue ca pataqarañi,
chaqai sqoue ca liỹa isecỹac co'ỹaaguilo.
16Ỹaatqajam qa'uaic quena llaalqaipi, mashic 'ec sqai llaalqaipi,
chaqai se iten quiyim na'laañi da lo'ueenataxanaxac.
17Ma' ỹim sqai saanem ca la'deenataxanaxac,
chaqai se sa'ue ca no'uen no'ueenataxac.
18Qam quena' ne'laxashiguim, ca 'eet,
ca' chi i'neetac ca shipgaq chaqai quecá'maq neetalec.
19¿Loqo'm qami' ná'maq vite ca lquesaxanaxa na shipgaq,
loqo'm 'viichi' na lanaxa' laue lemaqatet na lqosot?
20Ca' ¿qami'o' ná'maq renot nqai'ñi', 'ec nqai'ñi' aca piñai,
ca' da nemaqajnaxac quiyim rachiminaxantari', ca' ỹaatqajam 'xoic da lichic?
21Ca' ri'ỹaxantari' quena' hueetalec ana quemaralec,
chaqai qaica ca lqolonaxa quena' i'guentaugui ca lauataq.
22Chi i'neetac da lichic chaqai se no'chi,
chaqai se ỹolauqachit na lecat,
23'eno'm roviqui na lovic lahi' ná'maq neetashiguim nalauataxai,
chaqai 'eno'm 'ue lpoqo ana niqui chaqai ana nahinaxanqate.
24Ỹaatqajam se ỹoỹojlgoto naua qoỹoqojlgoto,
quena' ilamigui ana npe'te, ca' se ishit i'maqata.
25Noỹen quena' 'xaỹaque ana npe'te;
ñaq qoỹoqo'ta, qa' ita'guit na lahita na lauataq,
'qaataque na la'qaatec na nashi quena' relaataxan chaqai na naualaxaquipi.
26Ca ¿ỹaatqajam qami'o' 'deenaxanqachaqaic,
ca' paxaguiñitegue da laỹoxoc na qatañiguit lodegaxat
quena' ỹo, taigue da 'guiñi?
27Ca ¿qami'o' ná'maq lachi'o' na o'ic
quiyim ỹanalec ca lpa'gue' ana qa' ladocai?
28Na'maxare quiyi pe chaqai yi na'xa'a hueetalec ana qa',
ỹo'uet ca le'guenqa' quena lo'lo ana qa' ladocai.
29Ca hueetashiguim qoỹoqoshi'megue quenoxontac,
ra'iitaque ca loxonec.
30Na llaalqaipi ỹaatqajam loqo' naua leuo',
ca quecá'maq hua'ñi ca leuaxaic,
ca' yí hua'ñi, ca' qaỹauana.
Currently Selected:
Job 39: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.